Eyin e ma yin Jiwheyẹwhe wẹ nọ hẹn yajiji wá, etẹwẹ nọ hẹn huvẹ, ohẹ́n klókló, awhàn, azọ̀n ylankan, gọna nugbajẹmẹji jọwamọ tọn lẹ wá lo? Ohó Jiwheyẹwhe tọn, Biblu dọ onú voovo atọ̀n delẹ he nọ zọ́n bọ gbẹtọvi lẹ do nọ jiya:

1. Ṣejannabi, Nukunkẹn po Wangbẹna Po. “Gbẹtọ ko dugán do gbẹtọ ji na awugble etọn.” (Yẹwhehodọtọ 8:9) Nuyiwa gbẹtọvi mapenọ, ṣejannabinọ kavi kanylantọ lẹ tọn wẹ nọ zọ́n bọ mẹsusu nọ saba jiya.

2. Ojlẹ po Kosọ Po. Gbẹtọ lẹ nọ saba jiya “na yemẹpo ji wẹ ojlẹ po kosọ po nọ wá.” (Yẹwhehodọtọ 9:11) Ehe zẹẹmẹdo dọ mẹlẹ nọ gbọn kosọ dali tin to fie nuylankan de na jọ te, kavi asidan de gán jọ, na yamakinanu kavi nuṣiwa mẹde tọn wutu.

3. Mẹylankan Wẹ to Gandu Do Aihọn lọ Ji. Biblu dọ nuhe nọ zọ́n taun bọ gbẹtọvi lẹ do nọ jiya. E dọmọ: “Aihọn lọ pete tin to huhlọn mẹylankan lọ tọn glọ.” (1 Johanu 5:19) Satani Lẹgba wẹ yin “mẹylankan” enẹ lọ, yèdọ nudida gbigbọnọ de he yin angẹli Jiwheyẹwhe tọn to bẹjẹeji, ṣigba bo ma wá “nọte to nugbo mẹ.” (Johanu 8:44) Angẹli devo lẹ kọnawudopọ hẹ Satani bo diọnukunsọ Jiwheyẹwhe nado sọgan doafọna ojlo ṣejannabi tọn yetọn lẹ bo gbọnmọ dali lẹzun aovi lẹ. (Jenẹsisi 6:1-5) Sọn whenue Satani po aovi lẹ po ko ṣiatẹ wẹ yé ko to anadena aihọn ehe to aliho ylankan mẹ. Ehe lọ họnwun taun to ojlẹ mítọn mẹ. Todin, na homẹgble daho Lẹgba tọn wutu, e “to aigba fininọ lẹpo klọ,” bọ ehe ko dekọtọn do ‘dindọn mẹ na aigba.’ (Osọhia 12:9, 12) Na nugbo tọn, aṣẹpatọ fifiẹtọ de wẹ Satani yin. E nọ mọ awuvivi to yajiji gbẹtọvi lẹ tọn mẹ. Satani wẹ nọ hẹn yajiji wá gbẹtọvi lẹ ji, e ma yin Jiwheyẹwhe.

LẸNNUPỌN: Lẹgba he yin mẹylankan podọ kanylantọ janwẹ gán hẹn yajiji wá homẹvọnọ lẹ ji. Amọ́, Biblu dọ dọ: “Jiwheyẹwhe wẹ owanyi.” (1 Johanu 4:8) Na owanyi etọn wutu, “e dẹn do Jiwheyẹwhe nugbo lọ nado yinuwa po kanyinylan po, yèdọ Ganhunupotọ lọ nado waylan!”—Jobu 34:10.

Amọ́, a gán kanse dewe dọ, ‘Nawẹ Jiwheyẹwhe Ganhunupotọ lọ na jo Satani do bọ e na yí kanyinylan do to anadena aihọn lọ dẹnsọ?’ Dile mí ko mọ do, Jiwheyẹwhe gbẹwanna kanyinylan podọ e nọ vẹna ẹn taun eyin mí to yaji. Humọ, Ohó etọn dọna mí dọmọ: “Mì to magbọjẹ mìtọn lẹpo bẹ dlan ewọ ji, na e to mìtọn hòpọn [lẹnpọn] wutu.” (1 Pita 5:7) Dile hosọ he bọdego na dohia do, Jiwheyẹwhe yiwanna mí bo dohuhlọn nado de yajiji po mawadodo lẹpo po sẹ̀. *