EYIN nuylankan de ko jọ do go we pọ́n, a na yọ́n nuhe dọ mẹhe ko gbọn onú mọnkọtọn mẹ pọ́n lẹ te, yè nọ jẹflumẹ pete, biọ bẹwlu mẹ, bo nọ lẹzun magbọjẹnọ, bosọ nọ kudlọ ylankan lẹ. Apọ̀ nọ ṣì suhugan mẹhe ko gbọn ninọmẹ mọnkọtọn mẹ lẹ tọn.

Eyin a ko hẹn nutindo towe lẹpo bu to nujijọ ylankan de whenu pọ́n, e gán ko hẹn apọṣi hiẹ lọsu. A tlẹ gán nọma yọ́n nuhewutu a gbẹ́ togbẹ̀. Amọ́, Biblu dohia dọ a gán gbẹ́ duvivi gbẹninọ tọn bo tindo todido dagbe de na sọgodo.

Yẹwhehodọtọ 7:8 dọmọ: “Opodo whẹho de tọn pọnte hú bẹjẹeji etọn.” Eyin a jugbọn nujijọ ylankan de mẹ, sọgodo gán dózin do we. Amọ́, eyin a yí sọwhiwhe do jẹ vivẹnudo ji nado vọ́ gbẹzan towe jlado, nulẹ gán wá pọnte.

Biblu dọ dọ ojlẹ de na wá bọ “avigbè kavi awhágbe ayimajai tọn ma nasọ nọ yin sisè . . . ba.” (Isaia 65:19) Ehe na wá jọ to whenue aigba na yin didiọ zun paladisi to Ahọluduta Jiwheyẹwhe tọn glọ. (Salmu lẹ 37:11, 29) Nuylankan depope ma nasọ jọ ba. Oflin ylankan lẹ po odlọ ylankan lẹ po na lẹzun otàn, na Jiwheyẹwhe Ganhunupotọ lọ ko dopà dọmọ: “Onú hoho tọn lẹ ma nasọ yin finflin ba, mọ yé ma na gọwá ahun mẹ ba.”—Isaia 65:17.

Yí nukun homẹ tọn do pọ́n: Mẹdatọ lọ ko basi tito nado na we “sọgodo dagbe de po todido de po,” yèdọ gbẹzan jijọho tọn de to gandudu pipé Jiwheyẹwhe tọn glọ. (Jelemia 29:11) Be nugbo ehe yinyọnẹn gán gọalọna we nado gbẹ́ duvivi gbẹninọ tọn ya? Sally he mí dọho etọn to hosọ tintan mẹ lọ dọmọ: “Nudagbe he Ahọluduta Jiwheyẹwhe tọn na wá wà na mí to sọgodo lẹ finflin dewe na gọalọna we nado wọn nuhe ko jọ wayi lẹ bo doakọnna ninọmẹ he mẹ a te todin.”

Dovivẹnu nado plọnnu dogọ gando nuhe Ahọluduta Jiwheyẹwhe tọn na wà na gbẹtọvi lẹ to madẹnmẹ go. Mọwiwà na gọalọna we nado kudeji dọ mahopọnna nuylankan he ko jọ do go we lọ, a gán gbẹ́ duvivi gbẹninọ tọn todin dile a to nukundo aihọn he mẹ nuylankan de ma nasọ nọ jọ te. Amọ́ todin whẹ́, Biblu na ayinamẹ delẹ he na gọalọna we nado doakọnna kọdetọn he nujijọ ylankan nọ hẹnwa lẹ. Gbọ mí ni gbadopọnna delẹ to yé mẹ.