Jesu dọna devi etọn lẹ dọ: “Mìwlẹ na yin kunnudetọ ṣie . . . kaka yì awà he dẹn hugan aigba tọn lẹ ji.” (Owalọ lẹ 1:8) To egbé, Kunnudetọ Jehovah tọn lẹ nọ yí zohunhun do hẹn azọ́ndenamẹ enẹ di. Etomọṣo, kunnu ma ko yin dide mlẹnmlẹn to fidelẹ to aigba ji, ehe bẹ fihe gblo bọ gbẹtọ sù te taun lẹ hẹn. Podọ Kunnudetọ lẹ ma sù sọmọ to otò delẹ mẹ. (Matiu 9:37, 38) Nawẹ mí nọ wagbọn do jẹ mẹsusu dogọ dè dile e yọnbasi do?

 Nado setonuna gbedide Jesu tọn, Wedegbẹ́ Sinsẹ̀nzọn tọn Hagbẹ Anademẹtọ Kunnudetọ Jehovah tọn lẹ tọn nọ deazọ́nna mẹdehlan he to aigba-denamẹ ji lẹ hlan lẹdo he mẹ hudo sù te lẹdo aihọn pé lẹ. To alọnu, mẹdehlan 3 090 wẹ to aigba-denamẹ ji lẹdo aihọn pé. a Suhugan yetọn wẹ mọ azọ́nplọnmẹ yí to wehọmẹ Biblu pinplọn tọn de, taidi Wehọmẹ Wẹndagbe-Jlatọ Ahọluduta lọ tọn lẹ tọn. Mẹdehlan lẹ nọ desọn jlo mẹ bo nọ jo owhé yetọn lẹ do nado sẹtẹn yì otò devo mẹ. Na mẹdehlan nugbonọ enẹlẹ nọ yin mẹhe whèwhín bo nọ mọ azọ́nplọnmẹ yí bosọ tindo numimọ wutu, yé nọ má wẹndagbe lọ pé bosọ nọ ze apajlẹ dagbe dai na devi yọyọ lẹ.

 To alahọ dopodopo mẹ, Azọ́nwatẹn Lizọnyizọnwatọ He to Aigba-Denamẹ Ji lẹ Tọn he to glọ na Azọ́nwatẹn Sinsẹ̀nzọn tọn nọ wazọ́n dopọ hẹ Wedegbẹ́ Alahọ tọn bo nọ na mẹdehlan lẹ nuhe sin hudo yé do, taidi adọtẹn, nukunpipedo agbasalilo yetọn go gọna apòmẹ-kuẹ kleun de nado penukundo nuhudo yetọn lẹ go. To owhe sinsẹ̀nzọn tọn 2020 tọn mẹ, Kunnudetọ Jehovah tọn lẹ zan nudi dọla Amelika tọn livi 27 nado penukundo mẹdehlan lẹ go. Awuwledainanu enẹlẹ zọ́n bọ, mẹdehlan lẹ gán ze ayiha do lizọnyizọn lọ ji mlẹnmlẹn po huhlọn yetọn lẹpo po bo hẹn agun he mẹ yé te lodo.

 Nawẹ mẹdehlan he to aigba-denamẹ ji lẹ ko hẹn ale wá to azọ́n yẹwhehodidọ tọn lọ mẹ gbọn? Frank Madsen he to sinsẹ̀n to Wedegbẹ́ Alahọ Malawi tọn mẹ, dọ: “Adọgbigbo po azọ́nyinyọnẹn mẹdehlan lẹ tọn po ko zọ́n bọ yé gọalọna agun lẹ nado jẹ kunnude ji gbọn aigba-denamẹ he nọ kàn dẹpẹ biọ lẹ ji to gigọ́ mẹ, taidi lẹdo he do owhé he yè lẹ́ pákàn do lẹ gọna aigba-denamẹ jonọgbè tọn lẹ. Humọ, vivẹnu he yé nọ do nado plọn ogbè po aṣa lẹdo lọ tọn po yin apajlẹ dagbe de na mẹdevo lẹ, podọ yé nọ gọalọna jọja lẹ nado biọ sinsẹ̀nzọn whenu gigọ́ tọn mẹ. Mí dopẹ́ na Jehovah na azọ́n he wà mẹdehlan he to aigba-denamẹ ji lẹ te.”

 Hagbẹ Wedegbẹ́ alahọ tọn de sọn otò devo mẹ dọ: “Mẹdehlan lẹ yin apajlẹ jọnun he dohia dọ omẹ Jehovah tọn lẹ to kọndopọ mẹ lẹdo aihọn pé. Mẹhe ma tlẹ yin Kunnudetọ lẹ lọsu gán mọ hezeheze dọ dile etlẹ yindọ aṣa voovo lẹ wẹ mí do, enẹ ma nọ klan mí, amọ́ nuplọnmẹ Biblu tọn lẹ ko gọalọna mí nado lẹzun whẹndo he to kọndopọ mẹ lẹdo aihọn pé.”

 Nawẹ mẹdehlan lẹ nọ gọalọna wẹnlatọ he to agun he mẹ yé yin didohlan lẹ gbọn? Paulo he wá sọn Timor-Leste, yọ́n pinpẹn mẹdehlan he yin didohlan agun etọn mẹ lẹ tọn taun. E dọ: “Lẹdo mítọn nọ hùnmiyọ́n taun. Amọ́ mahopọnna dọ mẹdehlan lọ lẹ wá sọn lẹdo he mẹ aimẹ nọ fá te de mẹ, yé ma nọ dike gbede bọ ninọmẹ aimẹ tọn ni glọnalina yé nado dọyẹwheho. Yé nọ wá opli sinsẹ̀nzọn kunnudegbe tọn to afọnnu lẹ janwẹ. N’nọ mọ yé whẹwhẹ bọ yé nọ to gọyìpọn lẹ basi to owhè ṣádada mẹ, podọ to whèjai lẹ. Yé ko gọalọna mẹsusu nado plọn nugbo lọ, kakajẹ yẹn lọsu ji. Yé nọ yí zohunhun po jejejininọ po do sẹ̀n Jehovah po gbẹzan yetọn lẹpo po, podọ enẹ nọ whàn agun lọ blebu nado sẹ̀n ẹn to gigọ́ mẹ dogọ.”

 Ketti he yin gbehosọnalitọ whepoponu tọn de to Malawi, dọ lehe asu po asi po mẹdehlan de gọalọna whẹndo etọn do. E dọ: “Whenue asu po asi po mẹdehlan de yin didohlan agun mítọn mẹ, yẹn kẹdẹ wẹ yin Kunnudetọ to whẹndo ṣie mẹ. Amọ́, asu po asi po lọ gọalọna mi taun, podọ yé vẹ́ po whẹndo mítọn po. Apajlẹ dagbe yetọn gọalọna ovi ṣie lẹ nado mọ lehe Jehovah sinsẹ̀n nọ namẹ ayajẹ po pekọ po to gbẹ̀mẹ do. Na nuyiwadomẹji dagbe mẹdehlan lọ lẹ tọn wutu, viyọnnu ṣie atọ̀n lẹ to sinsẹ̀n taidi gbehosọnalitọ whepoponu tọn todin, podọ asu ṣie ko jẹ opli lẹ wá ji.”

 Fie wẹ mí nọ mọ akuẹ he e nọ biọ nado penukundo mẹdehlan he to aigba-denamẹ ji lẹ go sọn? Nunina he nọ yin bibasi na azọ́n lẹdo aihọn pé tọn lọ gblamẹ wẹ, podọ susu yetọn wẹ nọ yin bibasi gbọn donate.isa4310.com ji. Mí yọ́n pinpẹn nunina alọtútlú tọn mìtọn lẹ tọn taun.