Atọ̀họ̀-Nuhihọ́ lọ Tọn 1^er juin 1912 tọn, dọ dọ: “E yọnbayi dọ susu to wehiatọ mítọn lẹ mẹ wẹ jẹakọ hẹ nukuntọ́nnọ lẹ. Nukuntọ́nnọ lẹ gán mọ nue yé na hia yí vọnu . . . . Owe nukuntọ́nnọ lẹ tọn ehe nọ yin zinzinjẹgbonu po wekun titli he nọ fọ́n wá aga bọ nukuntọ́nnọ lẹ gán hia lẹ po.” Atọ̀họ̀-Nuhihọ́ lọ Tọn lọ yidogọ dọ: “Nukuntọ́nnọ susu wẹ e nọ vivi na dọ ojlẹ dagbe de ja aihọn mẹ bọ yé na mọ dona susu.”

 To ojlẹ he mẹ yè kàn hogbe enẹlẹ te, otò he nọ do Glẹnsigbe lẹ ma nọ wleawuna nukinkan nukuntọ́nnọ lẹ tọn to aliho dopolọ mẹ. Etomọṣo, Kunnudetọ Jehovah tọn lẹ ko to awuwlena nugbo Biblu tọn lẹ po “wekun titli he nọ fọ́n wá aga” lẹ po—enẹ wẹ nukinkan nukuntọ́nnọ lẹ tọn. Podọ mí gbẹ́ to mọwà! Todin, mí do owe nukuntọ́nnọ lẹ tọn to ogbè 50 linlán mẹ. Nawẹ e nọ yin awuwlena gbọn?

 Nutintan he nọ yin wiwà nado wleawuna owe nukuntọ́nnọ lẹ tọn wẹ nado vọ́ ẹ kàn po wekun he nukuntọ́nnọ lẹ nọ hia po. Michael Millen he nọ wazọ́n po Azọ́nwatẹn Nukinkan Tọn po to Patterson, New York dọ dọ: “To dai, mí nọ zan tito ọdinatẹẹ ji tọn he azọ́nwhé devo lẹ bayi do nọ wleawuna nukinkan nukuntọ́nnọ lẹ tọn, amọ́ e ma nọ wazọ́n na ogbè he sin hudo mí do lẹpo. Todin, mí nọ zan Azọ́nwanu Lẹdogbedevomẹ Tọn Watchtower Tọn, na e nọ hẹn ẹn bọawu nado wleawuna nukinkan nukuntọ́nnọ lẹ tọn to suhugan ogbè he tin lẹ tọn mẹ. N’mọdọ azọ́nwanu ehe nkọ ma tin to fidevo de.”

 Owe nukuntọ́nnọ lẹ tọn sọ nọ bẹ zẹẹmẹ yẹdide lẹ tọn hẹn ga. Di apajlẹ, yẹdide he to wepa owe lọ Duvivi Ogbẹ̀ Tọn Kakadoi! nukuntọ́nnọ lẹ tọn ji yin zẹẹmẹ basina dole: “Dawe de jẹ zọnlinzin ji gbọn ali hihá de ji bọ ogbé, okọ̀ta po osó he yọ́npọ́n taun lẹ po to ali lọ ji.” Jamshed he yin nukuntọ́nnọ bo to sinsẹ̀n taidi devizọnwatọ lizọnyizọnwiwa tọn podọ gbehosọnalitọ whepoponu tọn de, dọ dọ “Zẹẹmẹ yẹdide lẹ tọn họakuẹ na mi taun.”

 Eyin yè ko vọ́ zinjẹgbonu de kàn do nukinkan nukuntọ́nnọ lẹ tọn mẹ godo, yè nọ do nuhe yè vọ́ kàn lọ lẹ hlan alahọ he nọ bayi owe lọ. Eyin e jẹ dọ́n, yè nọ zín wekun he nọ fọ́n wá aga do owe titli he ma na tọ́n odò de ji, bo ma nasọ yawu gble eyin yè tlẹ zan ẹn whlasusu. Enẹgodo, yè nọ tò weda etọn lẹ debọdo-dego bo nọ blá ẹ dopọ bosọ nọ do e hlan to pọmẹ hẹ owe he nọ yin didohlan agun lẹ kavi do e hlan gbọn posu ji taidi “nunina vọnu de na nukuntọ́nnọ lẹ” eyin posu lọ do tito enẹ. To whedelẹnu, alahọ tlẹ gán bayi tito na owe lọ lẹ nido yawu jẹ mẹ’sunnu nukuntọ́nnọ lẹ kavi mẹ’sunnu he ma nọ mọnú ganji lẹ dè, na yé nido mọ yé zan na opli agun tọn lẹ.

 Azọ́n ehelẹ wiwà nọ biọ whenu po akuẹ susu po. Nado dọ hójọhó, to wezintẹn mítọn he to Wallkill, New York, whenu he yè nọ zan do bayi Biblu 50 000 dopolọ wẹ yè sọ nọ zan do bayi Biblu nukuntọ́nnọ lẹ tọn awe poun. Biblu nukuntọ́nnọ lẹ tọn to Glẹnsigbe mẹ bẹ bladopọ 25 hẹn, podọ azọ́nwanu he e nọ biọ nado wleawuna bladopọ enẹ lẹpo nọ hugan akuẹ he yè do nọ bayi Biblu he ma yin nukuntọ́nnọ lẹ tọn whla 123. E nọ biọ dọla Amelika tọn 150 nkọ (nudi 82 500F CFA) nado wleawuna adà dopo wepa bladopọ 25 lọ lẹ tọn!

 Numọtolanmẹ tẹwẹ mẹhe nọ wleawuna owe nukuntọ́nnọ lẹ tọn nọ do gando azọ́n yetọn go? Nadia he to sinsẹ̀n to alahọ Afrique du Sud tọn mẹ dọ dọ: “Nulẹ ma nọ bọawuna mẹ’sunnu po mẹ’yọnnu mítọn he yin nukuntọ́nnọ lẹ po gọna mẹhe ma nọ mọnú ganji lẹ, enẹwutu n’nọ mọdọ dona de wẹ e yin na mi nado nọ wà nude do gọalọna yé. E họnwun dọ Jehovah yiwanna yé taun.”

 Etẹwẹ lo, eyin nukuntọ́nnọ de ma yọ́n owe nukuntọ́nnọ lẹ tọn hia? To owhe delẹ die wayi, mí de owe de tọ́n to Glẹnsigbe mẹ he nọ yin Learn to Read Braille (Plọn Owe Nukuntọ́nnọ lẹ Tọn Hihia), podọ nuplọnwe ehe bẹ nukinkan nukuntọ́nnọ lẹ tọn po wekun tlọlọ lẹ po hẹn. E yin awuwlena na mẹhe nọ mọnú po mẹhe ma nọ mọnú lẹ po nado zan ẹn to pọmẹ. Alọnuwe ehe yin dopo to azọ́nwanu he bẹ nuhe nukuntọ́nnọ lẹ gán zan do kannu lẹ mẹ hẹn. Mẹhe to nukinkan nukuntọ́nnọ lẹ tọn plọn nọ zan azọ́nwanu ehelẹ do kàn wekun nukuntọ́nnọ lẹ tọn dopodopo na ede. Mọwiwa nọ zọ́n bọ e nọ bọawuna mẹhe to nukinkan lọ plọn lẹ nado flin wekun dopodopo bosọ nọ gọalọna yé nado yọ́n wekun lọ lẹ eyin yé doalọ e go.

 Ale tẹlẹ wẹ zinjẹgbonu ehelẹ ko hẹnwa na mẹ’sunnu po mẹ’yọnnu nukuntọ́nnọ lẹ po gọna mẹhe ma nọ mọnú ganji lẹ? Ernst he nọ nọ̀ Haïti nọ yì opli agun tọn lẹ, amọ́ e ma do zinjẹgbonu nukuntọ́nnọ lẹ tọn depope. Enẹ zọ́n bọ e dona nọ plọn nuhe e na dọ lẹ eyin e do azọ́n to opli ji gọna gblọndo he e na na lẹ do tamẹ. E dọ dọ: “Amọ́ todin, whedepoponu wẹ n’gán ze alọ bo na gblọndo. N’mọdọ n’to kọndopọmẹ hẹ mẹ’sunnu po mẹ’yọnnu ṣie lẹ po nugbo. Núdùdù gbigbọmẹ tọn dopolọ wẹ mímẹpo nọ mọyi!”

 Jan yin mẹho agun tọn de to Autriche bo ma nọ mọnú ganji, podọ e nọ deanana Oplọn Atọ̀họ̀-Nuhihọ́ lọ Tọn po Biblu Pinplọn Agun Tọn po. E dọ dọ, “Zinjẹgbonu mítọn lẹ họnwun ganji hugan owe nukuntọ́nnọ lẹ tọn devo he n’ko hia lẹ. Di apajlẹ, e bọawu nado mọ sọha weda lẹ tọn po nudọnamẹ odò tọn he to e mẹ lẹ po gọna zẹẹmẹ yẹdide lẹ tọn.”

 Seon-ok he yin gbehosọnalitọ de bo nọ nọ̀ Corée du Sud yin nukuntọ́nnọ podọ tókunọ de. To dai, yè nọ zan aliho de he yè do nọ dọho hẹ mẹhe tọ́nnukun bosọ kúto lẹ do gọalọna ẹn to opli lẹ ji, amọ́ todin e nọ hia owe nupinplọn tọn nukuntọ́nnọ lẹ tọn na ede. E dọ dọ: “Zinjẹgbonu nukuntọ́nnọ lẹ tọn devo lẹ gán vẹawu nado hia na wekun delẹ nọ busẹ, ohù lọ lẹ ma nọ jlọ kavi dọ owe lọ lẹ ni fẹdẹ́ gbau. Amọ́, owe titli lẹ wẹ Kunnudetọ Jehovah tọn lẹ nọ zan, ehe nọ zọ́n bọ yè nọ yawu doayi wekun lẹ go bọ ehe nọ hẹn wehihia bọawuna mi. To dai, mẹdevo lẹ wẹ nọ gọalọna mi nado plọn owe sinai do Biblu ji lẹ. Amọ́, yẹnlọsu wẹ nọ plọn yé na dee todin. Homẹ ṣie nọ hùn nado wleawuna opli sẹmẹsẹmẹ tọn lẹ podọ nado do mahẹ to yé mẹ to gigọ́ mẹ. Zinjẹgbonu nukuntọ́nnọ lẹ tọn mítọn lẹpo wẹ n’nọ hia. N’ma gán nọ ma hia owe lọ lẹ.”

 Owe mítọn he nọ yin zinzinjẹgbonu lẹ nọ bẹ hodidọ ehe hẹn: “Owe ehe ma nọ yin sisà gba. E yin awuwlena taidi apadewhe azọ́n Biblu pinplọnmẹ lẹdo aihọn pé tọn mítọn he nọ yin godonọna gbọn nunina sọn ojlo mẹ wá lẹ dali.” Mọ wẹ e nọ yin kinkando to owe nukuntọ́nnọ lẹ tọn mẹ ga. Mì wanu taun na nunina he mì nọ bayi sọgbe hẹ nudọnamẹ he yin nùdego to donate.isa4310.com ji lẹ. Alọtútlú mìtọn wẹ nọ hẹn ẹn yọnbayi nado wleawu núdùdù gbigbọmẹ tọn lẹ na mẹlẹpo kakajẹ nukuntọ́nnọ po mẹhe ma nọ mọnú ganji lẹ po ji.