To juillet 2022, linlin lẹ dohia lẹdo aihọn pé dọ yozò hugan:

•   “Whla awetọ die to osun ehe mẹ he ahọluzọnwatọ lẹ to Chine na avase dọ yozò na sinyẹn taun to tòdaho 70 nkọ mẹ.”—Linlin CNN Wire Service tọn to 25 juillet 2022.

•   “Na yozò sinyẹn zẹjlẹgo to Europe pete wutu, zungbo lẹ to miyọ́n ji taun to otò susu mẹ.”—Linlin The Guardian tọn to 17 juillet 2022.

•   “To Sẹgbe, yozò sù hugan lehe e ko nọ nọ̀ dai to tòdaho susu mẹ to États-unis, bọ yozò alunlun [ehe] mẹ tọn sinyẹn taun to huto whèzẹtẹn tọn gọna fidelẹ to hùwaji po whèyihọ États-unis tọn po.”—Linlin The New York Times tọn to 24 juillet 2022.

 Etẹwẹ ehe lẹpo dohia? Be e na wá jọ bọ aigba ji ninọ na glo wẹ ya? Etẹ Biblu dọ gandego?

 Mọwẹ. Yozò sinsinyẹn he to ogbẹ̀ lọ mẹ sọgbe hẹ nudelẹ he Biblu dọ dọ e na jọ to ojlẹ mítọn mẹ. Di apajlẹ, Jesu dọ dọ mí na mọ “nujijọ dobu lẹ” kavi “ohia daho” he dabla lẹ. (Luku 21:11) Yozò he to sinsinyẹn deji to ogbẹ̀ lọ mẹ ko zọ́n bọ mẹsusu nọ dibu dọ gbẹtọ lẹ na wá hẹn aigba lọ gble.

 Lala. Jiwheyẹwhe dá aigba na gbẹtọ lẹ nido nọ nọ̀ e ji kakadoi. (Salmu lẹ 115:16; Yẹwhehodọtọ 1:4) E ma na dike na gbẹtọ lẹ ni và ẹ sudo. E dopà dọ emi na hù “mẹhe to aigba husudo lẹ.”—Osọhia 11:18.

 Awe poun to nudevo he Jiwheyẹwhe dopà dọ emi na wà lẹ mẹ die:

•   “Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.” (Isaia 35:1) Jiwheyẹwhe ma na dike aigba ni wá lẹzun fie gbẹtọ ma gán nọ, amọ́ e na vọ́ fie ko gble to e go lẹ jlado.

•   “Hiẹ nọ penukundo aigba go, bo nọ hẹn ẹn dojó taun bọ e nọ de sinsẹ́n susugege tọ́n.” (Salmu lẹ 65:9) Jiwheyẹwhe na jla aigba do bọ e na lẹzun paladisi.

 Eyin a jlo na plọnnu dogọ do lehe ninọmẹ aimẹ tọn he nọ diọ lẹ sọgbe hẹ nuhe Biblu dọ wayi lẹ do ji, hia hosọ lọ “Etẹ Biblu Dọ Gando Ninọmẹ Aimẹ Tọn He Nọ Diọ lẹ po Sọgodo Mítọn po Go?”

 Biblu dopà dọ Jiwheyẹwhe na jla aigba do. Eyin a jlo na plọnnu dogọ gandego, hia hosọ lọ “Qui sauvera la terre ?”