A Gán Ðo Ayǎjɛ to Hwɛndó Mɛ
Nunina ɖagbe wɛ alɔwle kpó ovi lɛ kpó nyí bɔ Mɛdatɔ lɔ ná mǐ. É jlo ɖɔ mǐ ni dó ayǎjɛ to hwɛndó mɛ. Enɛ wɛ zɔ́n bɔ é dó ná mǐ ayinamɛ ɖagbe lɛ ná mǐ nidó dó ayǎjɛ to hwɛndó mɛ. Ayinamɛ enɛlɛ tíin to owě wíwé xe ko tíin é ma kpɔ́ ɖé mɛ. Kpɔ́n akpajlɛ̌ ɖélɛ.
Asu Ni Nɔ Yiwǎnna Así Etɔn
“Asu lɛ ɖóná nɔ yiwǎnna asi yětɔn tayiɖi agbasa yětɔn titi. Sunnu xe yiwǎnna asi etɔn yiwǎnna eɖe, ná mɛɖékpókpé ma nɔ gbɛ́wǎnna agbasa eɖetiti tɔn gbeɖe; cigbǎ é nɔ ná ɛn núɖùɖù bo nɔ wlebòna ɛn.”—EFESUNU LƐ 5:28, 29.
Asu wɛ nyí tatɔ́ to hwɛndó mɛ. (Efesunu lɛ 5:23) Amɔ́, asu ɖagbe ma nɔ ylanhùn, mɔ é ma nɔ nyí hɛngogonɔ. É nɔ nyɔ́ otɛn asi etɔn tɔn bo nɔ ná ɛn nǔxe sín hudó é ɖó lɛ. É nɔ xò etɔn kpɔ́n, é ma nɔ ɖɔ ɖɔ emitɔn jí janwɛ é ná gbò dó. (Filipinu lɛ 2:4) É ma nɔ xwleawu nadó ɖɔxo kpó asi etɔn kpó bo ka sɔ́ nɔ ɖotó é, enyí é to hoɖɔ. É “ma nɔ gblexomɛ sínsínnyɛ dó” asi etɔn go. É ma nɔ zé alɔ dó é jí, mɔ é ma nɔ yí oxó dó sɔhwán ɛn.—Kolosinu lɛ 3:19.
Así Ni Nɔ Ná SíSí Asu Etɔn
“Así ɖóná tindó sísí sísosíso ná asu etɔn.”—EFESUNU LƐ 5:33.
Así xe nɔ ná sísí asu etɔn nɔ nɔgodona nuɖiɖe xe asu lɔ bayi lɛ, exe nɔ zɔ́n bɔ hwɛndó yětɔn nɔ ɖó ayǎjɛ. Enyí é tlɛ cinuwa, é ma nɔ ɖé é kpò. Kakatimɔ, é nɔ yinuwa xɛ́ ɛ kpó walɔmimiɔn kpó bo gbɛ́ nɔ ná ɛn sísí. (1 Pita 3:4) Enyí é jlo ná dɔ̀n ayixa asu etɔn tɔn wá hwɛxo ɖé jí, é nɔ ɖé ojlɛ̌ ɖagbe ɖé bo nɔ ɖɔxona ɛn kpó sísí kpó.—Yɛhwexoɖɔtɔ 3:7.
Asu kpó Así kpó Ðóná Nɔ Nɔ̀ Gbèji Ná Yeɖe
“Sunnu ná . . . sɛbɔdó asi etɔn go, yé nasɔ́ lɛzun agbasalan ɖokpó.”—JENƐSÍSÍ 2:24.
Enyí sunnu ɖé kpó nyɔnu ɖé kpó wlealɔ, yé nɔ lɛzun xɔ́ntɔn vivɛ́. Ná alɔwle yětɔn nidó lodó, asu kpó asi kpó ɖóná nɔ ɖɔ-xomɛ ná yeɖe bo nɔ xò oɖe awetɔ tɔn kpɔ́n to onǔ flinflin lɛ mɛ. Asu kpó asi kpó ɖóná nɔ nɔ̀ gbèji ná yeɖe bɔ ɖékpókpé to yé mɛ ma ɖóná ɖeayɔ. Nuylankan tawun wɛ ayɔɖiɖe nyí. Jiɖedómɛgo masɔ nɔ tíin kpóɖɔ é tlɛ gán gbà hwɛndó.—Heblu lɛ 13:4.
Mɛjitɔ lɛ Ni Nɔ Kplɔ́n Ovi Yětɔn Lɛ
“Kplɔ́n ovi dó alixo xe ewɔ ɖóná gbɔn jí; enyí ewɔ tlɛ hwɛ́n mɛxo, é ma ná tɔ́n sɔ́n é jí.”—XÓHWINHWƐ́N LƐ 22:6, nudɔnamɛ odò tɔn.
Jixwéyɛxwe wɛ ɖeazɔ́nna mɛjitɔ lɛ nadó nɔ kplɔ́n ovi yětɔn lɛ. Yé ɖóná nɔ kplɔ́n jijɔ ɖagbe ovi yětɔn lɛ bosɔ nɔ zé akpajlɛ̌ ɖagbe ɖayǐ ná yé. (Deutelonomi 6:6, 7) Mɛjitɔ xe nyɔnuin ma nɔ yinuwa akplà enyí ovi ɖé cinuwa. Mɛjitɔ lɔ ‘nɔ ɖotoai, nɔ xwleawu nadó ɖɔxo bo nɔ xwleawu nadó gblexomɛ.’ (Jakɔbu 1:19) Enyí é byɔ́ ɖɔ mɛjitɔ lɔ ni dɔ̀n otó ná ovi lɔ, é nɔ nɔte bɔ xomɛgble etɔn nɔ wá odò bɔ é nɔ ɖomɛkplɔ́nlɔ ovi lɔ go kpó owǎnyi kpó.
Ovi lɛ Ni Nɔ Setonuna Mɛjitɔ Yětɔn Lɛ
“Mì ovi lɛ emi, mì nɔ setonuna mɛjitɔ mìtɔn lɛ . . . ‘Gbògbéna otɔ́ towe kpó onɔ̀ towe kpó.’”—EFESUNU LƐ 6:1, 2.
Ovi ɖóná nɔ setonuna otɔ́ kpó onɔ̀ etɔn kpó bo nɔ ná yé sísí. Ayǎjɛ, jijɔxo kpó kpɔ́ninɔ kpó nɔ tíin to hwɛndó xe mɛ ovi lɛ nɔ ná sísí mɛjitɔ yětɔn lɛ te. Ovi xe ko hwɛ́n mɛxo lɛ lɔsu nɔ kpénukúndó mɛjitɔ yětɔn lɛ go ganji bo nɔ dóxya ɖɔ emi to gbégbòna yé. Ði akpajlɛ̌, é gán nyiɖɔ yé ná gɔ́alɔna yé nadó jla nulɛ ɖó to xwégbè kavǐ nadó ná yé akwɛ́ enyí é byɔ́ ɖomɔ.—1 Timoti 5:3, 4.
