Ho Wan Eŋɛ La Wani Ta’an Vɔna Daarewoo?
Baabule la lebesego
Baabule la pu’ulum biŋe ti: ‘Se’em n iti sɛla ti Naayinɛ bɔta kɔ’ɔn bɔna mɛ wuusa.’ (1 Yon 2:17, Holy Bible—Easy-to-Read Version) Naayinɛ boti ho ita la bem?
Zamesɛ Naayinɛ la a Dayɔa, Yezu yɛla. Yezu yuun zusɛ Naayinɛ yeti: “Vom sebo n ka tari ba’asegɔ la n wana, ti ba baŋɛ hon yelemɛŋɛrɛ Naayinɛ ma’a la, la se’em ti ho tum na la, Yezu Krista.” (Yon 17:3) Bem n nari ti ho eŋɛ ta’an ‘baŋɛ’ Naayinɛ la Yezu? To san zamesa Baabule la ge tara yelese’a n boi bim la tuna tuuma to vom poan, la wan pa’alɛ ti to baŋɛ ba mɛ. a Baabule la pa’alɛ to Naaŋɔdaana Yehowa Naayinɛ, se’em n bo’ori vom la, n ti’iseri se’em. (Tooma 17:24, 25) Baabule la le basɛ ti to baŋɛ a Dayɔa Yezu, se’em n tari ‘yetɔɣesebo n bo’ori vom sebo n ka tari ba’asegɔ la’ mɛ.—Yon 6:67-69.
Tara sakerɛ Yezu lua bunɔ la poan. Yezu yuun wa’an tingɔŋɔ wa zuo mɛ ti a ‘tuna bɔ’ɔra nɛreba ge dekɛ a nyɔvore yɔ to’e nɛreba zo’e zo’e basɛ.’ (Matu 20:28) Yezu lua bunɔ la basɛ ti asaaleba tara la puti’irɛ ti ba wan ta vɔna daarewoo Paradiisi poan tingɔŋɔ wa zuo. b (Yooma 37:29) Yezu yuun yeti: “Naayinɛ nɔŋɛ tingɔŋɔ la mɛ ba’ɛ zo’e gaŋɛ, bala n sɔi ti a tum a Dayɔa kayina ma’a na, ti se’em woo n tari sakerɛ bɔ’ɔra en kan nyɛ sa’aŋɔ ge a wan nyɛ daarewoo nyɔvore.” (Yon 3:16) Daalɛ basɛ ti la daɣɛ ti to yeen tara sakerɛ bɔ’ɔra Yezu ma’a ge to wan tuna ti la dɔla a pa’alegɔ, la a Sɔ la n boti sɛla.—Matu 7:21; Yames 2:17.
Basɛ ti hon la Naayinɛ zɔtɔ nyɔka la kpe’em. Naayinɛ boti la to vurege lɛm en ge dɛna a zɔ. (Yames 2:23; 4:8) Naayinɛ boi mɛ wuusa. A kan malum ki. A me boti la a zɔdoma vɔna daarewoo. Naayinɛ doose la a Yelesum la poan tɔɣɛ pa’alɛ sɛba za’a n eeri en la ti: “Tara ya vom somɔ daarewoo.”—Yooma 22:26.
Nɛreba N Ti’isɛ Se’em La Ton Wan Vɔna Daarewoo
Nɛreba N Ti’isɛ Se’em: Asaala n tiregeri se’em la n wan basɛ ti a vɔna daarewoo.
Yelemɛŋɛrɛ: La boi bim ti asaaleba maalɛ la tiim n wan ta’an basɛ ti nɛreba vɔna yuura ge bala kan ta’an bo ba vom sebo n ka tari ba’asegɔ. Naayinɛ ma’a n wan ta’an bo to vom sebo n ka tari ba’asegɔ se’ere n sɔi la, ‘vom ze’ele la a zɛ’an na.’ (Yooma 36:9) A pu’ulumbiŋe ti a wan “vole kum ti de kan le bɔna wuusa” ge bo tontɔɔdoma la za’a vom sebo n ka tari ba’asegɔ.—Isaiah 25:8; 1 Yon 2:25.
Nɛreba N Ti’isɛ Se’em: Buuri basɛba ma’a n wan ta’an tara vom sebo n ka tari ba’asegɔ.
Yelemɛŋɛrɛ: Naayinɛ ka gãseri. Ge “tiŋa woo poan nɛresɛka n zoti en ge ita sɛla n ani soŋa, a ni to’e en mɛ.” (Tooma 10:34, 35) La ka pakɛ la hon de buuri sɛka bii hon ze’ele zɛ’an, ho san nana Naayinɛ, ho wan ta’an vɔna daarewoo.
Nɛreba N Ti’isɛ Se’em: La kan za’asum ti ho kɔ’ɔn vɔna daarewoo.
Yelemɛŋɛrɛ: Naayinɛ n wan bo to vom sebo n ka tari ba’asegɔ. A nɔŋɛ to mɛ ge me bɔta ti to tara pupeelum. (Yames1:17; 1 Yon 4:8) A mi ti tuunsoma n bo’ori to pupeelum. (Pa’ala 3:12) Naayinɛ pu’ulumbiŋe ti sɛba n wan vɔna daarewoo tingɔŋɔ wa zuo la wan tara vom somɔ, tuna tuunsoma n wan soŋɛ bamam la nɛreba.—Isaiah 65:22, 23.
Leyɛ’ɛsa, sɛba n wan vɔna daarewoo la wan kelum zamesa ba Naaŋɔdaana la, la a tuunkãra yɛla pa’asa. La boi bim ti nɛresaaleba ‘kan malum baŋɛ tuunse’ere ti yelemɛŋɛrɛ Naayinɛ la tum pɔsega ta paɛ ba’asegɔ’ la ge Naayinɛ yuun kelum naam asaaleba mɛ ti ba bɔta ti ba vɔna daarewoo ge zamesa baŋera en. (Pa’ala 3:10, 11) Bala la, sɛba n wan vɔna daarewoo la puurɛ wan pee ti ba zamesɛ yɛla ge me tuna tuuma zo’e zo’e.
a Yehowa Sɛɛradoma wan zamesɛ ho Baabule la zaŋa. Ho san bɔta ti ho baŋɛ yɛla pa’asɛ, bisɛ vidiyo la zuo n de To Baabule Zamesegɔ Ani La Wani?
b Bisɛ zaseŋɔ yele la zuo n de “Sore Kani Poan Ti Yezu Dɛna Fãara La?”
Ho Me Ta'an Bɔta Yele Ana
BAABULE SOKERE LEBESEGO
Sore Kani Poan Ti Yezu Dɛna Fãara La?
Beni n sɔi ti la nara ti Yezu bɛlena bɔ’ɔra tɔ? La dela to yeen sakɛ bo Yezu ma’a ta’an nyɛ fãarɛ?
BAABULE KAALEGƆ ZƐ’ƐSI VUURƐ
Yon 3:16 Vuurɛ—“Naayinɛ Yuun Nɔŋɛ Teŋgɔŋɔ Wa Mɛ”
Yehowa eŋɛ la wani pa’alɛ ti a nɔŋɛ to mɛ ge me bɔta ti to vɔna daarewoo?
TO YƐLA
Mam Boti La Ya Wa’ana
Sɔsɛ ya sɛla n boi Baabule la poan bii ho zamesɛ Yehowa Sɛɛradoma yɛla pa’asɛ.