“Oisãmbyhy aja koʼã mburuvicha, Ñandejára yvagapegua omoĩta peteĩ goviérno noñehundimoʼãiva arakaʼeve. Ndoʼamoʼãi avaveichagua tetã poguýpe. Ohundietéta guei opavave koʼã goviérno ha ndopamoʼãi arakaʼeve.” (Daniel 2:44, NM.)

Ñandejára Rréino ningo peteĩ goviérno yvagapegua. Ha Jesúspe ojeporavo ogoverna hag̃ua. Haʼe opytáta umi goviérno koʼag̃agua rendaguépe, ikatu hag̃uáicha ojejapo Ñandejára rembipota ko yvy ape ári ojejapoháicha yvágape (Mateo 6:9, 10). Ndaiporimoʼãi ótro goviérno ojupítava hendaguépe, ‘ñande Ruvicha ha Salvadór Jesucristo Rréino ndopamoʼãi arakaʼeve’. Upévare ikatu jaʼe jaikotaha pyʼaguapýpe opa ára g̃uarã (2 Pedro 1:11).

‘Satanás voi oiko oñemonde ánhel omimbipávaramo. Upévare ndahecharamói avei hembiguaikuéra oikoha oservi guaʼu Ñandejárape. Péro chupekuéra oñemyengoviáta umi hembiapokuére.’ (2 Corintios 11:14, 15, NM.)

Ojehechakuaáta umi rrelihión japu oĩha Satanás poguýpe, ha ni peteĩva ndopytamoʼãi. Ndaiporimoʼãvéima hénte ifanátikova ha ndoikomoʼãvéima gérra ikausarekuéra. Upéicha oĩta ‘peteĩ jeroviánte’ ha umi ohayhúva “Ñandejára teete ha oikovévape” omombaʼeguasúta chupe “espíritu sánto poguýpe ha añeteguápe”. ¡Javyʼaite ikatúta rupi jaiko pyʼaguapýpe ha peteĩ ñeʼẽme! (1 Tesalonicenses 1:9; Efesios 4:5; Juan 4:23.)

“Ñandejára voi oĩta hendivekuéra. Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma.” (Revelación [Apocalipsis] 21:3, 4.)

Jehová okumplíta ko promésa Itaʼýra Jesús rupive. Haʼe ningo omano vaʼekue ñanderehehápe  (Juan 3:16). Jesucristo ogovernáta ko yvy ape ári ha oipytyvõta yvyporakuérape iperfékto hag̃ua. Ndaiporimoʼãvéima ohasa asýva, ‘Ñandejára voi oĩtagui ñanendive’ ha haʼe ‘omokãmbaitéta ñande resay’. Koʼẽrõitéma ñandeperféktota ha umi mbaʼe ñanembohasa asýva opytáta tesaráipe. La Biblia heʼi voi: “Hekopotĩvape opytáne ko yvy, ha upépe haʼekuéra oikóne opa árare” (Salmo 37:29).

“[Jesús] ojagarra pe dragónpe, pe mbói ypykue haʼéva Diablo ha Satanás ha oñapytĩ chupe mil áñore. Omombo chupe pe yvykua pypukúpe omboty ha oasegura porã, anive hag̃ua pe dragón ombotavy umi tetãnguérape.” (Revelación [Apocalipsis] 20:2, 3, NM.)

Satanás ha idemoniokuéra ojejagarráta ha oñemombóta pe “yvykua pypukúpe”, upéva heʼise ndaikatumoʼãveimaha ojapo mbaʼeve. Ndorekomoʼãvéima hikuái ipoguýpe yvyporakuérape. ¡Ajépa igustoitéta Satanás ha idemoniokuéra ndaikatuvéi vove ombotavy avavépe!

“Umi ára paha” og̃uahẽta huʼãme oñepyrũ vove pe “jehasa asy guasu”. Jesús heʼi vaʼekue voi: “Oúta jehasa asy guasu, arakaʼeve oikoʼỹ haguéicha ko múndo ñepyrũmby guive koʼág̃a peve, ha upe rire ndoikomoʼãvéima arakaʼeve.” (Mateo 24:21, NM.)

Pe jehasa asy guasúpe oikóta hetaiterei mbaʼe ijetuʼúva arakaʼeve ndoikóiva gueteri. Ha og̃uahẽta huʼãme ou vove “Armagedón” haʼéva hína pe ‘gérra oikótava Ñandejára Ipuʼakapáva ára guasúpe’ (Revelación [Apocalipsis] 16:14, 16, NM).

Umi ohayhúva Ñandejárape oipotaitereíma opa umi mbaʼe vai oĩva koʼág̃a. Jahechamína mbaʼéichapa ojeikóta Ñandejára Rréino poguýpe.

Peteĩ “aty guasu” oikóta pyʼaguapýpe ko yvy ape ári: Ñandejára Ñeʼẽ heʼi peteĩ “aty guasu” ojesalvataha ou vove pe “jehasa asy guasu” ha oikotaha pyʼaguapýpe ko yvy ape ári (Revelación [Apocalipsis] 7:9, 10, 14, NM; 2 Pedro 3:13). Haʼekuéra ohechakuaáta ojesalvaha Jesucristo rupive, haʼe ningo “Ñandejára Ovecharaʼy, oipeʼáva yvyporakuéra pekádo” (Juan 1:29, NM).

Ñandejára ñanerekomboʼéta ha jahupytýta heta mbaʼe porã: Ñandejára múndo pyahúpe ‘ko yvy henyhẽta Jehová arandúgui’ (Isaías 11:9). Ñande Apohare ñanerekomboʼéta jaiko hag̃ua pyʼaguapýpe enterovévandi ha avei ñañangareko hag̃ua ñande yvýre. Haʼe opromete: ‘Che hína Jehová, nde Jára, nemboʼéva reiko hag̃ua hekoitépe, rohekomboʼe ha ahechaukáva ndéve nde raperã’ (Isaías 48:17, ÑÑB).

Umi omano vaʼekue oikove jeýta: Oĩrõ guare ko yvy ape ári Jesús omoingove jey vaʼekue iñamígo Lázarope (Juan 11:1, 5, 38-44). Upéicha ohechauka mbaʼépa ojapóta ág̃a ogoverna vove ko yvy ape ári (Juan 5:28, 29).

Ojeikóta pyʼaguapýpe ha tekojojápe: Cristo ogoverna vove ndaiporimoʼãvéima umi mbaʼe vai apoha. ¿Mbaʼérepa jaʼekuaa upéva? Haʼe ningo ohecha oĩva ñande pyʼapýpe ha oikuaáta mávapa ndojaposéi Ñandejára rembipota. Ha peteĩ tapicha ndohejaséiramo hembiapo vai ndaikatumoʼãi osegi oiko Ñandejára múndo pyahúpe (Salmo 37:9, 10; Isaías 11:3, 4; 65:20; Mateo 9:4).

Ndahaʼéi koʼã mbaʼe jahecha vaʼekuénte Ñandejára oprometéva, oĩve gueteri heta mbaʼe porã. Irréino ogoverna vove ko yvy ape ári jaikóta “pyʼaguapýpe” opa árare (Salmo 37:11, 29). Ha opaite mbaʼe ñanembohasa asýva ndaiporimoʼãvéima. Ñandejárama heʼi: “¡Péina! Ambopyahu hína opa mbaʼe. [...] Koʼã ñeʼẽ ningo añetegua ha ikatu pejerovia hese” (Revelación [Apocalipsis] 21:5, NM).