ENTEROVE ningo jajepyʼapy jave ñaikotevẽ peteĩ ñanepytyvõ vaʼerã. Upévare jaheka umi ñane amígo ñanentendétavape, oñemoĩva ñande lugárpe ha ikatúva ñanepytyvõ. Katuete ningo ñamombaʼeve umi ñane amígo ohasámavape heta mbaʼe ha oiporiahuverekokuaáva hapichápe.

Heta hénte opensa avei upéicha oñemboʼéta jave. Hetápe hasy oñemoag̃ui hag̃ua Ñandejárare openságui haʼe ipoderosoitereiha. Upévare oñemboʼe hikuái umi sántope, oimoʼãgui umíva ontendevetaha chupekuéra ohasáma rupi umi mbaʼe ñande jahasáva. Por ehémplo, umi okañýva chugui peteĩ mbaʼe ohayhúva, oñemboʼe San Antóniope, ojeʼégui haʼeha umi mbaʼe okañýva jára. Ambue katu, hasýramo chugui hymba térã oikotevẽramo, oñemboʼe San Francisco de Asíspe, ha isoguéramo katu oñemboʼe San Cayetánope.

Péro, ¿heʼípa la Biblia iporãha ñañemboʼe umi sántope? ¿Ohendúpa Ñandejára umichagua ñemboʼe? ¿Mbaʼéichapa oñeñandu Ñandejára ñañemboʼéramo umi sántope?

Umi katóliko omboʼe oñeñemboʼe vaʼerãha umi sántope ikatu hag̃uáicha umíva oavoga ñanderehe Ñandejára renondépe. Peteĩ ensiklopédia heʼi: “Umi sánto ikatu oñeʼẽ ñande favórpe Ñandejárape. Haʼekuéra oĩ porã Ñandejárandi iñeʼẽrendu rupi chupe oikórõ guare ko yvy ape ári” (Catecismo de la Iglesia Católica). Heta hénte opensa umi sánto oĩ porãveha Ñandejára renondépe, ha oñemboʼéramo umíva rupive, ohupytytaha heta mbaʼe porã.

Péro ¿omboʼépa la Biblia upéva? Oĩ heʼíva upeichaha, ha upearã oiporu apóstol Pablo ohai vaʼekue umi kristiáno Romaguápe: “Koʼág̃a che ermanokuéra, ñande Ruvicha Jesucrístore ha pe mborayhu espíritu omeʼẽvare ñandéve, ajerure peẽme peñemboʼe meme hag̃ua cherehe Ñandejárape” (Romanos 15:30, NM). ¿Ojerurépa upérõ Pablo iñermanokuérape oavoga hag̃ua hese Ñandejára renondépe? Nahániri. Haʼe heʼínte kuri chupekuéra ikatuha peteĩ kristiáno ojerure ótro ermánope oñemboʼemi hag̃ua hese Ñandejárape. Péro upéva ndeʼiséi ikatuha ñañemboʼe peteĩ tapicha ñaimoʼãvape oĩha yvágape oavoga hag̃ua ñanderehe Ñandejárape. ¿Mbaʼérepa ndovaléi jajapo upéva?

Juan kuatiañeʼẽme, Jesús heʼi vaʼekue: “Che ningo pe tape, pe añetegua ha pe tekovete, avave ndaikatúi og̃uahẽ che Ruete rendápe chereheʼỹ” (Juan 14:6, ÑÑB). Heʼi avei: “Opa mbaʼe peẽ pejeruréva ñande Ruetépe che rérape, Haʼe  katuete omeʼẽta peẽme” (Juan 15:16, ÑÑB). Jesús ndeʼíri ñañemboʼe vaʼerãha chupe ha haʼe oavogataha ñanderehe. Haʼe heʼínte ñañemboʼe vaʼerãha hérape añoite, Ñandejára ohendu hag̃ua ñane ñemboʼe.

Peteĩ jey hemimboʼekuéra ojerure Jesúspe ohechaukami hag̃ua chupekuéra mbaʼéichapa ikatu oñemboʼe. Upérõ haʼe heʼi chupekuéra: “Peñemboʼe jave peje: ‘Ore Ru reiméva yvágape, toñemomarangatu nde réra’” (Lucas 11:2, BNP). Upéicharõ, ñañemboʼe vaʼerã Ñandejárape añoite, ndahaʼéi Jesúspe ni ótrope. Jesús heʼi vaʼekuére jahechakuaa siémpre ñañemboʼe vaʼerãha Ñandejárape, péro Jesucristo rérape, ndahaʼéi jajeruréva umi sántope oavoga hag̃ua ñanderehe.

Ñane ñemboʼe rupive ningo ñamombaʼeguasu avei Ñandejára Jehovápe, upévare iñimportanteterei chupe añoite ñañemboʼe. La Biblia heʼi porã voi ndovaleiha ñamombaʼeguasu ótrope (Juan 4:23, 24; Revelación [Apocalipsis] 19:9, 10).

Pe Sermón del Móntepe, peteĩ ehémplope Jesús oñeʼẽ kuri peteĩ mitã ojerurévare itúvape hoʼumi vaʼerã. Haʼe heʼi: “¿Máva piko oĩ pende apytépe itaʼýra ojeruréramo chupe pan, omeʼẽtava chupe ita? Térã ojeruréramo peteĩ pira, nomeʼẽmoʼãingo chupe peteĩ mbói, ¿ajépa?” (Mateo 7:9, 10, NM). ¡Arakaʼeve ningo ndojapomoʼãi upéicha peteĩ túva ohayhúva itaʼýrape!

Jahechamína peteĩ situasión: ñamoĩ chupe peteĩ túva oñehaʼãha ojogueraha porã itaʼýra ndive, siémpre oñemongeta hendive ha ohendu chupe. Péro peteĩ árape, itaʼýra ojerurese chupe peteĩ mbaʼe iñimportánteva, ha okyhyjégui itúva ipochýrõ g̃uarã, ojevale ótrore heʼi hag̃ua chupe. ¿Mbaʼéichapa oñeñandúta itúva upévare? ¿Ogustátapa chupe itaʼýra ojepokuaáramo ojapo upéicha? Ni mbaʼevéicharõ. Peteĩ túva ningo oipota itaʼýra oñeʼẽ chupe voi ha ndoipotái otĩ ojerure hag̃ua chupe oikotevẽva.

Jesús oñeʼẽrõ guare pe mitã ojerurévare itúvape hoʼumi vaʼerã, heʼi umi ohendúvape chupe: “Peẽ peneñañáramo jepe, pemeʼẽ rregálo iporãva pende raʼykuérape, ¡koʼytevéntema upéicharõ pende Ru oĩva yvágape omeʼẽta mbaʼe porã umi ojerurévape chupe!” (Mateo 7:11, NM). Upeichaite ningo añete, tuvakuéra omeʼẽse iporãvéva itaʼyrakuérape, ha koʼytevéntema ñande Ru yvagapegua omeʼẽse iporãva yvyporakuérape, upévare ohendu ha ombohovái ñane ñemboʼe.

Ñandejára oipota chupe añoite ñañemboʼe, ñañeñandu vaíramo jepe peteĩ mbaʼe jajapo vaʼekuére. Haʼe ndojeruréi ótrope ñanerendu hag̃ua. La Biblia heʼi: “Ñandejára pópe emoĩ umi mbaʼe ndepyʼapýva, ha haʼe oñangarekóta nderehe” (Salmo 55:23 [55:22, NM]). Ndovaléi ñañemboʼe umi sántope ni ótrope oavoga hag̃ua ñanderehe Ñandejára renondépe. Ñandejára Jehovápe añoite ñañemboʼe vaʼerã, ndaipóri jakyhyje hag̃ua chugui.

Ñande Ru yvagapegua ojepyʼapy káda únore. Upévare haʼe ñanepytyvõse ñaneprovléma jave ha oipota voi ñañemoag̃ui hese (Santiago 4:8). ¡Ajépa javyʼaite ikatu haguére ñañemoag̃ui ñande Ru Jehováre, Haʼe ningo ‘ohendu maymáva ñemboʼe’! (Salmo 65:3 [65:2, NM].)