1 Samuel 2:1-36
2 Upémarõ, Ana oñemboʼe ha heʼi:
“Che korasõ mbytete guive avyʼa Jehová chepytyvõ rupi,+Jehová ningo chemombarete.*
Koʼág̃a chepyʼaguasúma ambohovái hag̃ua che enemigokuérape.
Che avyʼaiterei haʼe oporosalva haguére.
2 Jehová, nde ningo nepotĩeterei, ndaipóri ndeichagua,ndaipóri avave ikatúva oñekompara nderehe.+
Ñandejára, nde rejogua peteĩ ita imbaretévape, ndaipóri nderupytýva.+
3 Peẽ hénte aña, pejoko la pende juru ha anive peñemombaʼeguasu.
Anive pejekreeterei ha pepoi rei reínte pende jurúgui,pórke Jehová oikuaa opaite mbaʼe ha ohecha umi hénte ojapóva.+
Ñandejára oporohusga porã hína.
4 Umi kuimbaʼe ipoderósovagui oñemopẽmbaite iflécha,péro umi hoʼa potávape oñemombarete jey.+
5 Umi oreko rasapáva hoʼu vaʼerã koʼág̃a ombaʼapo vaʼerã ótro oreko hag̃ua tembiʼu.
Umi iñembyahýiva katu koʼág̃a hyg̃uatãma.+
Pe kuña ndaikatúi vaʼekue imemby 7 imemby,+péro pe heta imemby vaʼekue opyta haʼeño rei.
6 Jehová omeʼẽ ñandéve ñande rekove, péro ikatu avei oipeʼa ñandehegui,haʼe ikatu ñanemondo pe Sepultúrape* ha ikatu ñanemopuʼã jey upégui.+
7 Jehová ikatu omeʼẽ ñandéve heta rrikésa ha ikatu ñandereja po nandi,+haʼe ikatu ñanembotuicha ha ikatu avei oheja ñañemotĩ.+
8 Haʼe ohecha umi imboriahúvape ha umi iñumíldevape.
Haʼekuéra ningo haʼete oĩva yvýpe umi tanimbu apytépe,*
péro Ñandejára omopuʼã chupekuéra upégui.+
Haʼe omboguapy chupekuéra umi governánte apytépe, umi asiénto iporãvape.
Jehová omoĩ pe yvy hendápe porã,+haʼete voi ipópe orekóva umi simiénto.
9 Ñandejára oñangareko umi iñeʼẽrendúvare,+péro umi iñañáva opáta pe sepultúra iñypytũetévape,+pórke nodependéi hína ñane mbaretekue rehe ñasẽ porã hag̃ua.+
10 Jehová omonguʼíta* entéro umi oñemoĩvape hese.+
Upe tiémpo og̃uahẽ vove, hatã osunúta pe yvágape.+
Jehová ohusgáta umi héntepe ko yvy tuichakuére.+
Ñandejára omeʼẽta podér pe rréi haʼe omoĩvape,+ha omombaretéta* upe haʼe oiporavo* vaʼekuépe”.+
11 Upéi Elcaná oho hógape, opytáva Ramápe, ha pe mitãʼi opyta oservi Jehovápe+ ha oipytyvõ pe saserdóte Elípe.
12 Elí raʼykuéra katu iñaña+ ha ndorrespetái Jehovápe.
13 Ojagarra rangue hikuái la okorrespondéva chupekuéra pe sakrifísiogui,+ ou jave peteĩ persóna omeʼẽ hag̃ua isakrifísio, omondo hikuái peteĩ hembiguáipe tenedór puku reheve ha ojagarra pe soʼo opupu aja gueteri,
14 ha omoinge pe tenedór oimeraẽ óllape onohẽ hag̃ua chugui pe soʼo. Oimehaichagua soʼo pedáso osẽva pe tenedór rehe, ojagarra imbaʼerã. Upéicha ojapo jepi Elí raʼykuéra ha umi hembiguái enterove umi oúvare Silópe.
15 Pe ojapóva sakrifísio ohapy raẽ vaʼerã pe soʼo kyra Ñandejárape.+ Péro pe persóna ojapo mboyve upéva, ou pe saserdóte rembiguái ha heʼi chupe: “Emeʼẽ pe saserdótepe soʼo haʼe ombojy hag̃ua. Haʼe ndojagarramoʼãi ndehegui soʼo ojy pyréva, síno ipýrante”.
16 Ha upe persóna heʼírõ: “Pehapy raẽna ikyrakue+ ha upéi pegueraha peipotáva”, pe saserdóte rembiguái heʼi: “Nahániri, emeʼẽ katu chéve koʼág̃a, osino mbaretépe aipeʼáta ndehegui”.
17 Jehovápe g̃uarã ivaieterei umi mbaʼe ojapóva koʼã kuimbaʼe. Haʼekuéra tuichaiterei opeka+ pórke ndorrespetái umi ofrénda ojejapóva Jehovápe.
18 Ha Samuel imitãramo jepe oservi+ Jehová rógape, ha omonde peteĩ delantál.*+
19 Isy ojapo jepi chupe peteĩ ao ijyvakuareíva ha oraha Samuélpe káda áño oho jave iménandi ojapo hag̃ua sakrifísio.+
20 Upéi Elí ovendesi Elcaná ha hembirekópe ha heʼi chupe: “Jehová tomeʼẽ ndéve ótro mitã ko ne rembirekógui, hekovia hag̃ua imemby omeʼẽ vaʼekue Jehovápe”.+ Upe rire haʼekuéra oho jey hógape.
21 Upéi Jehová oiporiahuvereko Ánape, ha ovendesi chupe. Upévare haʼe imemby+ jey mbohapy kuimbaʼe ha mokõi kuña. Ha Samuel osegi okakuaa oservi aja Jehovápe.+
22 Elí katu itujáma, ha oñemombeʼu chupe umi mbaʼe vai itaʼyrakuéra ojapóva umi héntere.+ Oikuaa avei haʼekuéra oñenoha oikóvo umi kuña oservíva ndive pe tavernákulo* rokẽme.+
23 Elí heʼími chupekuéra: “¿Mbaʼére piko pesegi pejapo ivaíva? Naiporãiete ningo umi mbaʼe oñemombeʼúva chéve pejapoha.
24 Anína péicha che raʼykuéra, Jehová puévlope oñeñeʼẽ oikóvo penderehe, ha ivaieterei la heʼíva hikuái.
25 Peteĩ persóna opekárõ hapicha kóntrape, oĩ la ikatútava ojerure Jehovápe hese, péro opekáramo Jehová kóntrape,+ ¿máva piko la oñemboʼétava hese?”. Péro haʼekuéra nohendúi itúape pórke Jehová ja odesidíma ohunditaha chupekuéra.+
26 Upe aja Samuel okakuaa ohóvo, ha Jehová ha umi hénte ohayhuve chupe.+
27 Upéi peteĩ Ñandejára siérvo oho Elí rendápe ha heʼi chupe: “Péicha heʼi Jehová: ‘Che ningo ajekuaauka vaʼekue nde tuakuéra ypykuépe, haʼekuéra oĩrõ guare esklávoramo Egíptope ha oservi pe faraón rógape.+
28 Che aiporavo ne familiakuérape Israel trívu apytégui,+ oservi hag̃ua de saserdóte ha ojapo hag̃ua sakrifísio che altárpe.+ Che aiporavo chupekuéra ohapy hag̃ua pe insiénso ha omonde hag̃ua pe delantál okumpli jave iservísio. Che haʼe nde tuakuéra ypykue rogayguápe ikatuha ojagarra peteĩ párte pe soʼo umi israelita oguerúvagui ohapy hag̃ua chéve ofréndaramo.+
29 Upéicharõ, ¿mbaʼére piko peẽ pedespresia* umi ofrénda ha sakrifísio che amandáva ojejapo hag̃ua che rógape?+ ¿Mbaʼére piko remombaʼeve nde raʼykuérape chéve chemombaʼe rangue, ha peʼu umi párte iporãvéva káda ofrénda oguerúvagui che puévlo?+
30 Upévare, Jehová Israel Jára heʼi: “Che haʼe kuri nde rogayguápe ha umi nde tuakuéra ypykue rogayguápe siémpre peservitaha che rógape”.+ Péro koʼág̃a Jehová heʼi: “Che napermitimoʼãvéima ko situasión osegi péicha. Amombaʼéta umi chemombaʼévape,+ péro umi chedespresiávape katu che adespresiáta”.
31 Upévare koʼẽrõite aipeʼáta pendehegui pe podér* perekóva, nde ha ne familiakuéra, ha ni peteĩva ne família apytégui ndaitujamoʼãi pórke omanombátama upe mboyve.+
32 Che puévlo Israélpe oho porãta, péro nde rehecháta peteĩ ne enemígo che rógape.+ Núnka nderehechamoʼãi peteĩ itujáva nde rógape.
33 Péro ne hentekuéra apytégui peteĩmi opytáta oservi hag̃ua che rógape. Ha ikáusare nde resufríta, ha nderehechamoʼãvéi detánto ke nerasẽta. Péro haimete enterove ne hentekuérape ojejukáta espádape.+
34 Ha reikuaa hag̃ua siertoha la haʼéva ndéve, ameʼẽta ndéve ko señál: nde raʼy Hofní ha Finehás omanóta el mísmo día.+
35 Upéi aiporavóta peteĩ saserdóte iñeʼẽrendúva oservi hag̃ua nde vése.+ Haʼe ojapóta opaite mbaʼe che aipotáva. Pe saserdóte siémpre oipytyvõta upe rréi che aiporavóvape. Ha ifamiliakuéra siémpre oservíta de saserdóte.
36 Ha oimeraẽ opytáva nde rógape oúta oñesũ ha ojerure asy traváho che saserdótepe, ikatu hag̃uáicha ojogua pan. Haʼe heʼíta: “Emeʼẽmína chéve che travahorãmi aipytyvõ hag̃ua umi saserdotekuérape. Péicha ikatúta peteĩ pan pehenguemi jepe haʼu”’”.+
Nóta
^ Ikatu avei: “oñemombohápe yty”.
^ Ikatu avei: “omongyhyjéta”.
^ Térã: “omopuʼãta hatĩ”.
^ Hebréope: “pepyvoi”.
^ Hebréope: “jyva”.
