Koʼág̃arupi ñande testígo de Jehová jarresivi en fórma dihitál hetaiterei puvlikasión ha vidéo arakaʼeve oikoʼỹ haguéicha. Péro hetaiterei párte ko múndope ñane ermanokuéra ndorekói jepi Internet. Oĩ avei umi lugár pe Internet nofunsionaporãihápe, imbegueterei, térã katu ndaiporiete voi.

 Péro koʼág̃arupi hetaiterei ñane ermanokuéra ikatu omboguejy umi puvlikasión ndorekóiramo jepe Internet. ¿Mbaʼéichapa ojapo hikuái upéva?

 Haʼekuéra oipuru JW Box, haʼéva peteĩ aparatoʼi ojeguerahakáva umi kongregasión oĩvape umi lugár nofunsionaporãihápe pe Internet. Upéva ningo oreko peteĩ rrúter ojejogua vaʼekue peteĩ emprésagui, oreko avei peteĩ prográma informátiko ojapo vaʼekue pe Departamento de Computación oĩva Betélpe, ha umi puvlikasión ha vidéo oĩva jw.org-pe. Káda kahaʼi ovale 75 dólar rupi (516.000 guaranírupi).

 Salónpe umi ermáno ha ermanakuéra ikatu okonekta iselulár térã távlet pe JW Box wifi rehe, ha péicha odeskarga umi vidéo ha puvlikasionkuéra. Umi selulár térã távlet itujámava ha ivarátova jepe ikatu oñekonekta hese. Péro peteĩ kongregasión ndorekóiramo Internet, ¿mbaʼéichapa pe JW Box ikatu oreko umi puvlikasión osẽ ramovéva? Pe sukursál omondo jepi peteĩ pendrive ovaléva 4 dólar (27.500 guaranírupi), ha upévape oĩ umi puvlikasión ipyahuvéva osẽ vaʼekue jw.org-pe. Upéi umi pendrive oñekonekta pe JW Box rehe umi ermanokuéra odeskarga hag̃ua umi informasión.

 ¿Mbaʼéichapa oipytyvõma ermanokuérape pe JW Box? Nathan Adruandra, peteĩ túa oikóva República Democrática del Cóngope, heʼi: “Heta tiémporema añehaʼã aikóvo amboguejy umi pelíkula ‘Jehová, che ajerovia nderehe’ ha Penemanduʼákena Lot rembirekóre, péro núnka ndaikatúi adeskarga ha upéva chedesanimaiterei. Koʼág̃a ikatúma amboguejy koʼã vidéo che selulárpe, ha upéva oréve tuakuérape tuichaiterei orepytyvõ romboʼe hag̃ua ore famíliape”.

 Peteĩ ermáno oipytyvõva umi kongregasión oĩvape Nigériape oinstala hag̃ua pe JW Box heʼi: “Umi ermánope g̃uarã, JW Box haʼe peteĩ rregálo ijojahaʼỹva oúva Jehovágui. Ovyʼaiterei hikuái koʼág̃a fásilmente ikatu haguére omboguejy umi vidéo ha puvlikasión oĩva pe kit de enseñánzape”.

 Más de 1.700 JW Box oñemondóma umi kongregasión oĩvape África, Oceanía ha Sudaméricape. Ha ojehecha hína oñemondo hag̃ua hetave kongregasiónpe. ¿Moõguipa osẽ pe pláta ojejapopa hag̃ua koʼã mbaʼe? Umi kontrivusión ojejapóvagui óvra mundiálpe g̃uarã, ha heta umíva ojejapo donate.isa4310.com rupive. Roagradeseterei ningo peẽme pendepojera haguére pemeʼẽvo pene kontrivusión.