La Bíbliape heʼíma vaʼekue voi ñane tiémpope oikotaha gérra, yvyryrýi, péste térã epidémia ha ‘ojehechataha heta mbaʼe oporomongyhyjéva’ (Lucas 21:10, 11). Pe áño de servísio 2022-pe a jahecha porãiterei ko profesía oñekumpliha. Por ehémplo hetaiterei persónape operhudika pe gérra oikóva Ucrániape. La majoría jajerrekuperáiti jahávo pe pandémia de COVID-gui. Ha hiʼarive hetaiterei persóna ohasa asy umi desástre naturál káusare. Por ehémplo, Haitípe oiko yvyryrýi, ha Centroamérica, Filipinas ha suréste de Áfricape katu oiko torménta ivaietereíva. ¿Mbaʼéichapa umi testígo de Jehová oipytyvõ umi ohasa asývape koʼã mbaʼére?

 Septiembre de 2021 guive agosto de 2022 peve, ñane organisasión oipytyvõ de diferénte fórma umi osufri vaʼekuépe 200 desástre káusare. En totál ojegasta haimete 12 millón de dólar. b Jahechamína mbaʼéichapa ojepuru umi donasión oñepytyvõ hag̃ua umi persóna osufri vaʼekuépe mokõi desástre naturál káusare.

 El 14 de agosto de 2021 Haitípe ojerrehistra peteĩ terremóto tuichaitereíva de magnitu 7.2. Rombyasyeterei 2 ñane ermána ha peteĩ ermáno omano hague. Ko terremóto káusare hetaiterei hénte opyta erído ha hetápe ojagarra provléma emosionál. Peteĩ Testígo hérava Stephane heʼi: “Hetaiterei hénte omano ore siudápe, upévare 2 mése aja oiko atyraite funerál káda semána”. Ótro Testígo hérava Éliézer heʼi: “Hetaiterei Testígo operde hóga, opyta ao ha sapatuʼỹre ha ndorekói hikuái ni umi mbaʼe tekotevẽkuete káda diarã. Ha káda tánto oiko jey kuri umi yvyryrýi, upévare heta mésere oĩ oiko vaʼekue kyhyjepópe”.

 Ensegidamínte ñane organisasión oñepyrũma ombaʼapo oajuda hag̃ua umi oikotevẽvape. Pe sukursál oĩva Haitípe orreparti óga kárpa, frasáda, kochõ, kargadór solár selulárpe g̃uarã ha 53 mil kílo aliménto. Avei oñemyatyrõ térã oñemopuʼã jey 100 óga rasárupi. Ojegasta mas de un millón de dólar oñemeʼẽ hag̃ua koʼã ajúda.

 Umi ermanokuéra oagradese ipyʼaite guive la ojejapóva hesehapekuéra. Lorette omombeʼu: “Pe terremóto ohundiete ore róga ha ore negósio. Ndoroguerekói kuri ni roʼumi vaʼerã. Péro Jehová organisasión oĩ ore ykére ha omeʼẽ oréve entéro mbaʼe roikotevẽmíva”. Ermána Micheline heʼi: “Che ha umi mokõi che memby roiko peteĩ ogaʼi ndahaʼéivape de materiál. Ha pe terremóto sarambi ojapo la ore rránchogui. Añemboʼe Jehovápe pórke upévante la ikatúva ajapo, ha Jehová orresponde chéve iñorganisasión rupive. Umi ermáno orepytyvõ rupi, koʼág̃a ore róga iporãve ha isegurove. Jehová ningo ojapo hetaiterei mbaʼe cherehehápe, ha che ahechaukase aagradeseha chupe che pyʼaite guive”.

 Umi autorida lokál ohechakuaa avei umi mbaʼe jajapóva ñaipytyvõ hag̃ua ermanokuérape. Pe direktór munisipál L’Asilegua heʼi: “Pofelisitase pyaʼeterei peju haguére peipytyvõ pende rapichápe. Ha ndahaʼéi voi upévarente, síno avei siémpre perrespeta haguére umi autoridápe. Ha la aguerohoryvéva penderehe es ke ndapejepyʼapýi mboýpa ojegastáta, síno pejepyʼapy pende rapicháre. Ojekuaa opa mbaʼe pejapóva pejapoha peporohayhúgui”.

 El 24 de enero de 2022 pe torménta tropikál Ana og̃uahẽ Mozambíquepe ha upéi oho Maláuipe. Pe torménta káusare hatãiterei oky yvytu atã reheve, ohupytýva voi 100 kilómetro por óra. Avei oitypa umi kávle de elektrisida, umi puénte ha opárupi oiko inundasión.

 Mas de 30 mil testígo de Jehová oikóvape Malaui ha Mozambíquepe oafekta pe torménta. Charles peteĩ ermáno oipytyvõva umi ojeperhudika vaʼekuépe heʼi: “Ahechárõ guare mbaʼeichaitépa osufri ermanokuéra ha entéro umi mbaʼe oñehundi vaʼekue chuguikuéra, añeñandu vaieterei ha che pyʼa hoʼa yvýre”. Ha ivaive hag̃ua la situasión, oñehundi anga chuguikuéra umi provísta mimi oreko vaʼekue ñongatupy ha umi plantasión. Heta oĩ operde vaʼekue hóga, ha ñambyasyeterei anga peteĩ ñane ermánogui omano hague hembireko ha mokõi itajyraʼi. Peteĩva umi láncha de rreskáte ojevolka ha upépe ojahoga hikuái.

 Pe torménta ivaieterei kuri. Família Sengeredo oiko Nchalo Maláuipe. Ha pe la una de la madrugádarupi oñemondýi hikuái pórke ohendu peteĩ y ryapu hatãitereíva. Aviasído mokõi rrío orrevosapa ha umi y og̃uahẽma pe óga kostaitépe. Ermáno Sengeredo odesidi osẽmante vaʼerãha hikuái upégui. Haʼetépe ojapo upéva, pórke osẽmírente hikuái pe y oity hóga, ha ikosakuéra mimi oñehundi térã oguerahapa pe y. Família Sengeredo oho pe Salón del Réinope opytáva yvýrupi 30 minúto hógagui, péro ko vuéltape og̃uahẽ hikuái 2 órape. Hykue sópa og̃uahẽ hikuái ha ikaneʼõiterei anga, péro mbaʼevete asy ndojehúi chupekuéra.

 Umi sukursál oĩva Malaui ha Mozambíquepe pyaʼe oñeorganisa oñepytyvõ hag̃ua umi osufrívape pe torménta káusare. Haʼekuéra ojerure umi superintendénte de sirkuíto ha ansianokuérape ohecha hag̃ua mbaʼépa la oikotevẽva hína ermanokuéra ha avei okonsola ha omombarete hag̃ua chupekuéra. Umi mokõi sukursál oasigna unos kuánto Komite de Sokórrope osupervisa hag̃ua umi traváho ojejapóva. Péicha umi ermanokuéra pyaʼeterei orresivi aliménto, ha umi ótro artíkulo de primera nesesida. Ojepuru mas de 33 mil dólar oñepytyvõ hag̃ua umi héntepe, ha mas de 300 mil dólar oñemyatyrõ ha oñemopuʼã jey hag̃ua hogakuéra.

 Umi Komite de Sokórro oipuru porãiterei umi donasión. Upéva ideprovechoiterei pórke degolpete ojupipaite kuri umi kosakuéra. Por ehémplo, umi primero 7 mésepe pe avatikuʼi hepyetereive haimete voi el dóvle, upéva ningo ojepurueterei Maláuipe. Pe kombustívle ojupipaite avei. Umi enkargádo ojogua koʼã mbaʼe por kantida, péicha ojejapo chupekuéra présio ha saʼive avei ojepaga la envíore.

 Entéro mbaʼe ojejapóva oñepytyvõ hag̃ua ermanokuérape opoko ñane korasõre. Felisberto peteĩ ermáno Mozambiquepegua heʼi: “Ndahecháiva peteĩ organisasión peichaite peve ipojeráva, omeʼẽ oréve materiál oñemopuʼã jey hag̃ua ore róga, transpórte, aliménto ha ou jey ombaʼapo hikuái, ha avei mborayhúpe oregia. Haʼekuéra ohechauka pe mborayhu teete Jesús oñeʼẽ hague Juan 13:34, 35-pe”. Ester ningo peteĩ ermána oikóva Maláuipe, haʼe viúda ha pe torménta ohundi hóga. Haʼe heʼi: “Ndaikuaái kuri mbaʼépa ajapóta, che ningo ndarekói pláta amopuʼã jey hag̃ua peteĩ óga. Upévare ahechárõ guare umi ermáno omopuʼãha chéve che rogarã, avyʼaiterei, haʼete voi aimémava pe paraísope mbaʼe”.

 Umi desástre ningo hetavéta ohóvo og̃uahẽ meve pe múndo pyahu (Mateo 24:7, 8). Péro pemeʼẽ rupi pene donasión ikatu jaʼe Jehová siervokuéra siémpre orresivitaha pe ajúda oikotevẽva. Pe páhina donate.isa4310.com-pe ikatu petopa mbaʼéichapa pemeʼẽkuaa pene donasión. ¡Roagradeseterei ningo peẽme pendepojera haguére!