Khoro Dev zaun asa Rochnnar, zannem soglleo vostu rochleat. Taka orombh nam ani kednanch xevott-ui aschona. (Stotram 90:2) Bible-ant ji bori khobor asa, ti Tacheach thaun ieta. (1 Timotak 1:11) Tannem amkam jivit dilam, tea khatir ami Takach bhozunk favo.​—Prokasovnni 4:11 vachat.

Bible sangta, Devak konnech pollounk nam. Taka munxa sarki rogta-masachi kudd nam. Tachi jinn ekdom Vorti. (Juanv 1:18; 4:24) Torui, tannem rochleat teo vostu polloun Tache gunn amkam kollon ietat. Udharonnak, veg-veglle torenchim follam ani fulam, Dev kitlo mogall ani zannvaien bhorlolo tem dakhoun dita. Xim-mer naslolo amcho vixv, Devachi podvi dakhoita.​—Romkarank 1:20 vachat.

Bible vachlear amkam Devache gunn ani Tachem mon odik borem somzotolem. Udharonnak, Devak kitem manvota ani kitem manvona ani lok borem vo vaitt kortat tedna, To tanchem thaim koso vagta tem amkam Bible dakhoita.​—Stotram103:7-10 vachat.

Jezun mhunnttlem: “Amchea Bapa sorginchea, Tujem nanv povitr zaum.” (Matev 6:9) Zaite pavtt Devak, Sorvespor vo Dev mhunnttla, punn him Tachim nanvam nhoi. Taka ekuch nanv asa. Dor ek bhaxent tem nanv veglle toren vapurlam. Amche bhaxent, tem nanv “Jehova.” Thodde lok, “Yahweh” oxem-i mhunnttat.​—Stotram 117:1 vachat.

Bible aiz zaitea bhasanim vachunk melltta, punn chodd-xea Bible-ant Devachem nanv kaddun, tachea zagear Sorvespor vo Dev, oxim utram uzar keleant. Adim Bible boroil’lo tedna, Devachem nanv tantunt sumar 7,000 pavtti aslem.  Deva vixim lokank xinkoitana, Jezun Devachem nanv kollit kelem.​—Juanv 17:26 vachat.

Devak Nanv Asa Kai? ho viddeo polloiat

Aiz sonvsaracher dukh posorlam tem polloun Jehova amchi kallji ghena, oxem tumkam dista kai? Amcher tras ani dukh dhaddun, Dev amkam tallnneant ghalta vo amchi porikxa gheta oxem thoddo lok somzota. Punn hem khorem nhoi.​—Jakob 1:13 vachat.

Devan munxak borem-vaitt vinchun kaddpachi svotontrtai dilea. Tachi seva korchi vo nam korchi, hem vinchun kaddunk Devan amkam svotontrtai dilea mhunn ami Tache upkari nhoi kai? (Joshua 24:15) Zaitim zannam apleak dil’le svotontrtaiecho boro upeog korinant ani dusreank vaitt kortat, tea passot lokank tras bhogunk poddtat. Tancher on’neai zatat tem polloun, Jehovak dukh zata.​—Utpoti 6:5, 6 vachat.

Jehova amchi khub kallji gheta. Taka zai ami khuxalbhorit jivit jiel’lim. Veginuch Dev, noxttea munxancho xevott korun, sogllem dukh ani tras kabar kortolo. Tea mhonnosor, vaitt poristhitink Tannem porvangi dilea ani toxem korunk Tachea lagim ek borem karonn asa. Tem karonn kitem tem amkam, atthvea odheai-ant kolltolem.​— 2 Pedru 2:9; 3:7, 13 vachat.

Jehova amkam magnnea udhexim, apleak lagim ieunk apounnem dita. Taka zonn ekleachi porva asa. (Stotram 65:2; 145:18) Ami thodde pavtti chuktanv, punn amche chukim poros, Devak manvota tem korunk ami kitlim vavurtat, tem To borem zannam. Tea passot To amkam bhogsunk toiar asa. Ani taka lagun, ami opurnn vo patki asun-ui, Deva thaim ek lagincho, ghott sombondh zoddum ieta.​—Stotram 103:12-14; Jakob 4:8 vachat.

Jehovan amkam jivit dilam dekhun, ami soglleam poros tacho chodd mog korunk zai. (Mark 12:30) Jitlim chodd ami Deva vixim xinktolim, titloch Tachea passot amcho mog vaddtolo ani Taka mandta tem korunk amkam sompem zatolem. Oxem korun ami Devachea anink-ui lagim sortolim.​—1 Timotak 2:4; 1 Juanv 5:3 vachat.