1. Amkam Jehovachea margdorxonachi kiteak goroz asa tem ek udharonn diun somzaiat.

 CHINTAT! Tumi vatt chukon eka ranant pavleant. To zago ekdom bhirankull asa, karonn thoim ranvotti zonvaram, vikari jiv ani zhaddam asat. Tea bhair thoim zaitea koddem vhoddle-vhoddle fondd asat. Tor tumchea jivak dhoko asa. Punn to zago bore bhaxen zannam aslolo konn tori tumchea borabor asa zalear, tumkam kitlem borem distolem nhoi! Karonn tea dhokeam thaun pois ravonk ani eka surokxit zagear pavonk to tumkam modot kortolo. Aiz ho sonvsar tea rana bhaxen asa. Karonn Jehova sangata amchi ixttagot piddʼddear zata tosle zaite dhoke hanga asat. Punn amkam margdorxon diunk Jehova asa. To amkam hea dhokeam thaun pois ravonk ani novea sonvsarant sasnachea jivitak pavoita tea vatter cholonk modot korta.

2. Jehova amkam koso margdorxon dita?

² Jehova amkam koso margdorxon dita? Mukhel mhunnttlear, tachem Utor Bible-a udexim. Toxench, to munxankui uzar korta. Udharonnak, ami bore nirnnoi gheunk lagon to ‘visvaxi ani xannea chakrak’ uzar korta, zo amkam sarkea vellar jevonn dita. (Mt. 24:45) Tea bhair, Jehova purte aslolea dusrea munxank uzar korta. Zoxem sorkittachi dekhrekh korpeank, toxench sobhechea vhoddilank. Te amkam kotthin poristhitincho fuddo korunk urba ani nirdexon ditat. Tor xevott ieunchea poilim hea kotthin vellacho fuddo korunk, Jehova amkam itlea bore bhaxen margdorxon dita mhunn ami khub upkari asat. Karonn te amkam Jehovache ixtt zaun ravonk, toxench atam ani fuddarak borem jivit jieunk modot kortat.

3. Hea lekhant ami kitem polloitolim?

 ³ Thodde pavtti, Jehova thaun ieta tem margdorxon pallunk amkam kotthin zaunk xokta. Ani khas korun hem margdorxon amkam opurnn munxam koddlean melltta tednam. Karonn te amkam ditat tem margdorxon amkam avoddna zait. Vo tanchem margdorxon pallʼllolean kosloch faido zauncho na, oxem ami chintit. Tor tem margdorxon Jehova koddlean ieunkuch xokona oxem amkam disot. Oslea poristhitimnim hea munxam vorvim Jehova amkam margdorxon dita, ani tachem margdorxon pallʼllolean amkam besanvam mellttolim mhunn ami amchi khatri ghott korunk zai. Tor oxem korunk amkam modot zaunk, hea lekhant ami tin mudʼde polloitolim: (1) Bible-achea kallar Jehovan tachea lokank koxem margdorxon dilem, (2) Jehova aiz amkam koso margdorxon dita, ani (3) tachem margdorxon pallʼllolean amkam koslim besanvam mellttat.

JEHOVAN IZRAEL RAXTTRAK KOXEM MARGDORXON DILEM?

4-5. Moizesa udexim apunn Izraelitkarank margdorxon dita mhunn Jehovan koxem dakhoun dilem? (Chitr polloiat.)

⁴ Izraelitkarank Ejipttantlean soddounk, Jehovan Moizesak vinchun kaddlo. Ani Moizesa udexim apunn aplea lokank margdorxon dita mhunn Jehovan spoxttponnim dakhoun dilem. Udharonnak, Izraelitkaram mukhar disacho ek kupacho khambo astalo, ani ratcho ek ujeacho khambo astalo. (Sutt. 13:21) Ani Moizes, toxench Izraelitkaram tea khambea fattlean choltalim. Oxe toren cholon-cholon tim Tambddea Doria lagim pavlim. Punn Ejipttkar tanchea fattik laglole mhunnttoch atam kainch vatt na, ani Moizesan tankam thoim haddun chuk keli oxem lokank dislem. Punn khorem mhunnttlear, Moizesa udexim Jehovanuch aplea lokank thoim haddun pavoilʼlim. (Sutt. 14:2, 3a) Karonn uprant, tannem ojapache ritin tankam salvar kelim.—Sutt. 14:26-28.

⁵ Hachea uprant, 40 vorsam poriant, tea ranvott vattarant aplea lokank margdorxon diunk, Jehova to kupacho khambo uzar kortalo mhunn Moizesan visvas dovorlo. a Ani thoddea vella khatir Jehovan to khambo Moizesachea tombu voir dovorlo. Ani akʼkhi porza tem pollounk xoktali. (Sutt. 33:7, 9, 10) Tea khambea vorvim, Jehova Moizesa lagim uloitalo ani uprant Moizes tem nirdexon lokank ditalo. (St. 99:7) Tor Jehova aple porjek margdorxon dita mhunn soglim Izraelitkaram pollounk xoktalim.

6. Choddxea Izraelitkaramnim kitem kelem? (Lokgonnti 14:2, 10, 11)

⁶ Punn dukhachem mhunnttlear, puravo asonui choddxea Izraelitkaramnim, Jehova Moizesa udexim tankam margdorxon dita mhunn manun gheunk na. (Lokgonnti 14:2, 10, 11 vachat.) Oxem tim porot-porot kortalim. Hea pasot Jehovan tankam Bhasailʼlea Desant vochonk diunk nant.—Lok. 14:30.

7. Jehovachem margdorxon apnnailem tanchim udharonnam diat. (Lokgonnti 14:24) (Chitr pasun polloiat.)

⁷ Punn, thoddea Izraelitkaramnim Jehovachem margdorxon apnnailem. Udharonnak, Jehovan sanglem: “Kaleb . . . mhaka visvaxi ravla.” (Lokgonnti 14:24 vachat.) Hea pasot Jehovan Kalebak besanv dilem, ani Bhasailʼlea Desant apleak zai to zago vinchun kaddunk dilo. (Josh. 14:12-14) Izraelitkaranche fuddle pillgen pasun Jehovachem margdorxon apnnailem. Moizes melea uprant, Joshua Izraelitkarancho fuddari zalo tednam, tea lokamnim “Joshuak tachea akʼkhea jivitant man dilo.” (Josh. 4:14, NW) Hea pasot, Jehovan tankam zaitim besanvam dilim, ani Bhasailʼlea Desant pasun vochonk dilem.—Josh. 21:43, 44.

8. Razanchea tempar, Jehovan aplea lokank koxem margdorxon dilem tem somzaiat. (Chitr pasun polloiat.)

⁸ Zaitea vorsam uprant, aplea lokank margdorxon diunk Jehovan fuddari nemle. Ani magir razanchea tempar tannem provadeank  nemle. Jehovak visvaxi aslolea razamnim hea provadeanche solʼle apnnaile. Udharonnak, provadi Nathanan Raza Davidak solʼlo dilo tednam, tannem khaltikaien apli chuk manun ghetli. (2 Sam. 12:7, 13; 1 It. 17:3, 4) Toxench, Raza Jehoshafatan, provadi Jahazielan dilʼlem margdorxon apnnailem, ani lokankui ‘Devachea provadeancher visvas dovrunk’ urba dili. (2 It. 20:14, 15, 20) Tea bhair kotthin poristhiti vellar, Raza Hezekian Izaias provadea lagim modot magli. (Iz. 37:1-6) Dor ek pavtt, raza Jehovachem margdorxon apnnaitale tednam, tankam besanvam mellttalim ani porjechi rakhonn zatali. (2 It. 20:29, 30; 32:22) Tor Jehova provadeam udexim aplea lokank margdorxon ditalo mhunn dubhavunk koslench karonn naslem. Tori astana, choddxe raza ani lok pasun provadeanche solʼle kanar ghenasle.—Jer. 35:12-15.

JEHOVAN POILEA XEKDDEANTLEA KRISTANVANK KOXEM MARGDORXON DILEM?

9. Jehovan poilea xekddeantlea Kristanvank koxem margdorxon dilem? (Chitr pasun polloiat.)

⁹ 33 K.X.-achea Ponʼnasavea disa, Jehovan Kristi sobha ghoddoun haddli. Tor hea poilea xekddeantlea Kristanvank Jehovan koxem margdorxon dilem? Jehovan Jezuk Kristi sobhecho mukheli mhunn nemlo. (Ef. 5:23) Punn Jezu dor eklea xisa lagim uloun tannim kitem korunk zai tem sangonaslo. Tachea bodlek, tannem fuddakar gheunk Jeruzalemantlea apostlank ani vhoddilank uzar kele. (D.I. 15:1, 2) Toxench, sobhank margdorxon diunk vhoddil nemle.—1 Tes. 5:12; Tit. 1:5.

10. (a) Poilea xekddeantlea choddxea Kristanvamnim kitem kelem? (D.I. 15:30, 31) (b) Adlea kallar, Jehovan margdorxon diunk uzar kelʼlea munxank thoddea lokamnim kiteak nakarle? (“ Thoddeamnim Kiteak Nakarlem?” hem boks polloiat.)

¹⁰ Poilea xekddeantlea Kristanvamnim kitem kelem? Choddxea zannamnim tankam mellʼllolem margdorxon apnnaun ghetlem. Khorem mhunnttlear, “tankam khub urba mellʼlli ani te khub khuxal zale.” (Itihas 15:30, 31 vachat.) Punn Jehova amchea disamnim lokank koxem margdorxon dita?

JEHOVA AIZ AMKAM KOSO MARGDORXON DITA?

11. Aplea lokank margdorxon diunk, Jehova aiz munxank koso uzar korta tem dakhoun dita toslem ek udharonn diat.

¹¹ Aiz pasun Jehova tachem Utor, ani tacho Put zo sobhecho mukheli zaun asa, tache vorvim amkam margdorxon dita. Toxench, to munxank  pasun uzar korta. Hem amkam koxem kolltta? Hea vixim, 1870 vorsa uprant, kitem ghoddlem tacher dhean diat. Charles Taze Russell ani tachea sangateank Devachea Utracho kholaien obheas kelea uprant, 1914 vorsa Devachea Rajeachea babtint kitem tori khas ghoddttolem mhunn kollon ailem. (Dan. 4:22, 23) Ani Bible-antleo sogleo bhasaunneo ghoddon ietoleo mhunn tankam khatri asli. Hea sodh kortoleank modot korunk Jehovacho hat aslo kai? Hoi. Karonn 1914 hea vorsak, osleo thoddeo ghoddnneo ghoddleo jea vorvim Devachem Raj, raz cholounk laglem mhunn spoxtt dison ailem. Zoxem, Poilem Vixv Zhuz zalem, ani tachea uprant veg-vegllea zageancher pidda posorli, bhuimkamp zaleo ani bhuk poddli. (Luk. 21:10, 11) Tor hantuntlean, Jehova tachea lokank margdorxon diunk tea khaltea kallzachea munxank uzar kortalo mhunn kollon ieta.

12-13. Dusrea Vixv Zhuza vellar porgottnnechem kam vaddounk fuddakar gheupi bhavamnim kitem kelem?

¹² Toxench Dusrea Vixv Zhuza vellar, kitem ghoddlem tachem dhean diat. Mukhel Ofisantlea fuddakar gheupi bhavamnim Prokasovnni 17:8, hea versacher bariksannen obheas kelo. Ani obheas kelea uprant tankam kollon ailem ki Vixv Zhuza uprant Armageddon nhoi, punn xanticho ek vell ietolo jea vorvim tankam anik chodd porgottnni korunk mellttoli. Tor songottnnen, Watchtower Bible College (School) of Gilead stapon kelem. Hea vellar, oxem korop ghoddie sarkem nhoi oxem disonk xoktalem. Tori astana, hea School-a vorvim sonvsarbhor aslolea lokank porgottunk ani xikounk, mixinori bhav-bhoinnank proxikxonn diunk tannim manddavoll keli. Ani zhuz choltalem tednam pasun, mixinorink porgottunk dhaddlim. Tea bhair, sobhentlea bhav-bhoinnank borim porgottpi ani xikoupi zaunk proxikxonn diunk, visvaxi chakran Course in Theocratic Ministry b hachi manddavoll keli. Tor hea toren, fuddem zaunchem aslem tea porgottnnechea kamam pasot Devachea lokank toiar kelim.

¹³ Tor tea kotthin vella vixim aiz ami chintʼtat tednam, Jehova aplea lokank margdorxon ditalo mhunn amkam spoxtt toren kollon ieta. Karonn Dusrea Vixv Zhuza uprant thaun, Jehovachim Sakxi zaitea desamnim addkholl nastana porgottnni korunk xokleant. Toxench, aiz sonvsarbhor porgottnnechem kam zata ani anikui zaito lok bore khobrek kan ditat.

14. Jehovache songottnne thaun, toxench vhoddilam thaun melltta tem margdorxon sarkem asa mhunn ami purnn khatri kiteak dovrunk zata? (Prokasovnni 2:1) (Chitr pasun polloiat.)

¹⁴ Aiz Sonchalon Monddollantle bhav margdorxona pasot Jezu Kristacher patieun ravtat. Ani te bhavank jem margdorxon ditat, tem Jehova ani Jezuchea chintpa pormonnem aslolem tankam zai. Hench margdorxon, uprant sorkittachi dekhrekh korpi ani vhoddil soglea sobhank ditat. c Makhlole vhoddil, toxench sobhentle her sogle vhoddil, Jezu Kristachea “uzvea hatant” asat. (Prokasovnni 2:1 vachat.) Punn te opurnn asat ani tanche lagim chuki zatat. Adlea kallar Moizes, Joshua ani apostlamnim pasun thodde pavtti chuki keleo. (Lok. 20:12; Josh. 9:14, 15; Rom. 3:23) Tori astana visvaxi chakrak, toxench soglea sobhentlea vhoddilank Jezu bore toren margdorxon dita, ani “sonvsarachea xevottachea vella poriant” to tem di-it ravtolo. (Mt. 28:20) Tor hea bhavam koddlean melltta tem margdorxon sarkem asa mhunn ami purnn khatri dovrunk zata.

JEHOVACHEM MARGDORXON PALLʼLLOLEAN BESANVAM MELLTTAT

15-16. Jehovachem margdorxon pallʼllem tanchea onnbhovantlean tumkam kitem xikonk mellʼllem?

¹⁵ Ami Jehovachem margdorxon pallit ravtat tednam, amkam atam pasun zaitim besanvam mellttat. Hea vixim amkam bhav Andy ani bhoinn Robyn-acho onnbhov asa. Tanchem jivit sadem dovrunk dilʼlo solʼlo tannim apnnailo. (Matev 6:22-acho study note polloiat.) Oxem kelolean, songottnnechea bandkamant tim vantto gheunk pavlim. Hea vixim bhoinn Robyn sangta: “Ami oslea khub lhan zageancher ravlim, zoim jevonn randunk pasun amkam suvat nasli. Toxench, mhaka photography khub avoddttalem. Punn mhaka mhoje zaite camera ani lenses vikcheo poddleo. Oxem kortana hanv khub dukhi zalem. Punn Abrahamachi bail Sara bhaxen, hanvem kitem soddlem tacher nhoi, punn hanv atam Jehovache sevent kitem kortam tacher dhean diun khuxal zaunk hanvem nichov kelo.” (Heb. 11:15) Oxem kelʼlean hea zoddpeak koslim besanvam mellʼllim? Bhoinn Robyn sangta: “Amche lagim asa tem soglem ami Jehova pasot uzar kortat hem zannam zaun amkam dhadosponn melltta. Toxench ami songottnnechea bandkamant vantto ghetat tednam, novea sonvsarant amchem jivit koxem astolem tem amkam kollon ieta.” Bhav Andy-k pasun toxench dista. To sangta: “Ami Jehovachea kamant amcho soglo vell ani takot uzar kortat dekhun, amkam khuxalkai melltta.”

¹⁶ Jehovachem margdorxon ami pallit ravtat  tednam, amkam anik koslim besanvam mellttat? Hea vixim amkam Marcia-cho pasun onnbhov asa. Tachem iskol zalea uprant, purnn vellachi seva korunk dilʼlo solʼlo tannem apnnailo. (Mt. 6:33; Rom. 12:11) Tem mhunntta: “Mhaka char vorsam university-nt xikonk scholarship mellʼlloli. Punn hanv Jehovak mhojem boreantlem-borem diunk sodhtalem dekhun, hanv ek osli kola xiklem, jea vorvim hanv pioneer seva toxench kamui korunk xoktalem. Ani ho hanvem ghetlolo ekdom boro nirnnoi zaun aslo. Karonn atam hanv khuxalkaien niemit pioneer mhunn seva kortam. Ani hanv kednam kam kortolem tem hanv tharaunk xoktam dekhun, hanv Bethel-ant pasun modot korunk pavtam, ani Jehova pasot anikui zaitem korunk xoktam.”

17. Ami Jehovachem margdorxon apnnaitat tednam amkam anik koslim besanvam mellttat? (Izaias 48:17, 18)

¹⁷ Thodde pavtt, Jehovache songottnne koddlean amkam zaitem margdorxon melltta, jem amchi rakhonn korta. Zoxem poixeanche axe thaun pois ravop, ani Jehova lagim amchi ixttagot moddtta tea vostum thaun pois ravop. Tor hem margdorxon apnnailolean amkam ek nitoll ontoskornn asta, ani zaitea trasam thaun ami pois ravonk xoktat. (1 Tim. 6:9, 10) Oxem kelʼlean, ami purnn kallzan Jehovachi bhokti korunk pavtat. Hea vorvim amkam khub khuxalkai, xanti ani dhadosponn melltta.—Izaias 48:17, 18 vachat.

18. Tumi Jehovachem margdorxon pallit ravonk kiteak nichov kela?

¹⁸ Jehova amkam vhodd sonkoxttachea vellar ani Kristachea Ek Hozar Vorsanchea Razvottkechea Vellar, munxank uzar korun margdorxon di-it ravtolo mhunn kainch dubhav na. (St. 45:16) Tor atam amkam melltta tem margdorxon amkam borem disona zalear pasun ami tem pallttat zalear, fuddarak amkam melltta tem margdorxon pallunk amkam sompem zatolem. Tor ami sodanch Jehovachem margdorxon pallit ravom-ia, zantunt fuddakar gheunk nemlolea bhavanchem margdorxon pasun mellon asa. (Iz. 32:1, 2; Heb. 13:17) Ani oxem kortana amkam Vatt Dakhoupi Jehovacher, amkam purnn khatri asa mhunn dakhoun dium-ia, zo amkam tachea sangata amchi ixttagot moddunk xokta toslea dhokeam thaun rakhta, ani novea sonvsarant sasnachea jivitak pavoita tea vatten cholonk modot korta.