Por que o sacrificio de Xesús é un “rescate por todos”?
O que di a Biblia
O sacrificio de Xesús é o medio que usa Deus para liberar ou salvar a humanidade do pecado e da morte. A Biblia explica que o sangue de Xesús foi o prezo que se pagou como rescate ou redención (Efesios 1:7; 1 Pedro 1:18, 19). Por iso, Xesús dixo que veu “pra redimento de moitos” (Mateo 20:28, AGL).
Por que se necesitaba un rescate?
Deus creou o primeiro home, Adam, perfecto, é dicir, sen pecado. El tiña a oportunidade de vivir para sempre, pero perdeuna porque escolleu desobedecer a Deus (Xénese 3:17-19). Cando tivo fillos, estes herdaron del o pecado (Romanos 5:12). Por iso a Biblia di que Adam se vendeu a si mesmo e os seus fillos como escravos do pecado e da morte (Romanos 7:14). Como todos somos imperfectos, ningún de nós pode recomprar o que Adam perdeu (Salmo 49:8, 9 [49:7, 8, TNM]).
Ó ver que os descendentes de Adam estaban sen esperanza, Deus sentiu compaixón por eles (Xoán 3:16). Pero as normas de xustiza de Deus non permitían que simplemente pasase por alto ou escusase os seus pecados sen unha base válida (Salmo 89:15 [89:14, TNM]; Romanos 3:23-26). Como Deus ama a humanidade, non só proveu o medio legal necesario para perdoar os nosos pecados senón tamén para eliminalos (Romanos 5:6-8). O rescate é ese medio legal.
En que consiste o rescate?
Na Biblia, o termo “rescate” implica estes tres conceptos:
É un pago (Números 3:46, 47).
Con el conséguese unha liberación ou redención (Éxodo 21:30).
O seu valor equivale ou cobre o valor de aquilo polo que se paga. a
Vexamos a relación que teñen estes tres conceptos co sacrificio de Xesucristo.
O pago. A Biblia di que os cristiáns foron comprados por un prezo (1 Corintios 6:20; 7:23). Ese prezo é o sangue de Xesús, co que adquiriu para Deus “xentes de toda raza, lingua, pobo e nación” (Apocalipse 5:8, 9).
A liberación. O sacrificio de Xesús libéranos do pecado (1 Corintios 1:30; Colosenses 1:14; Hebreos 9:15).
A equivalencia. O sacrificio de Xesús equivale exactamente ó que Adam perdeu: unha vida humana perfecta (1 Corintios 15:21, 22, 45, 46). A Biblia explica: “Como a desobediencia dun único home [Adam] volveu pecadores a tódolos homes, así tamén a obediencia dun só [Xesucristo] volveu xustos a todos” (Romanos 5:19). Isto explica por que a morte dun só home serve para rescatar moitos pecadores. De feito, o sacrificio de Xesús é un “rescate por todos” os que dan os pasos necesarios para beneficiarse del (1 Timoteo 2:5, 6).
a Na Biblia, os termos orixinais que se traducen como “rescate” transmiten a idea de pagar un prezo ou entregar algo de valor a cambio doutra cousa. Por exemplo, o verbo hebreo cafar basicamente significa “cubrir” e normalmente fai referencia a cubrir ou perdoar un pecado (Salmo 65:4 [65:3, TNM]). Este verbo está relacionado co substantivo cófer, que se refire ó prezo que se paga para conseguir unha redención (Éxodo 21:30). Do mesmo xeito, a palabra grega lítron, que normalmente se traduce como “rescate”, tamén pode facer referencia ó prezo de redención (Mateo 20:28). Os escritores gregos usaban este termo para falar do pago que se facía para rescatar un prisioneiro de guerra ou liberar un escravo.
Pode que tamén che guste
PREGUNTAS SOBRE A BIBLIA
Como nos salva Xesús?
Por que necesitamos que Xesús interceda por nós? Chega con só crer en Xesús para salvarnos?
ENSINANZAS BÁSICAS DA BIBLIA
Por que morreu Xesús?
Poida que escoitases que morreu polos nosos pecados. Pero, pode un único sacrificio beneficiar a millóns de persoas?
