ƝAAKWƐLƐI 9
Ka kwɛli hwilɛn Zehova ɓa ka yəi bɛlɛn
« Yálái ŋɛi yələkɔlɔn da lɔi [...] di pɛli, ka kwɛli hwilɛn ma. » (Kulɔ ponoŋa 14:7).
Yɛ pələi yaa gaa la ɉɛɓɛi ŋɛi hu, liɛwoo tamaa kaa Biblə hu. Da pɛli kpɔnmaa tɛɛi yɛ́ ka ə́ yəi bɛlɛn nua ka pɔ. Zehova kaa bɔ ka kɛ kwəinɛɛ hu. Aa mo yɛ ka matoo mɛni laa mɛni kəlee tɔwɔ, ɉɛnŋaa yiiɠaa tii maakpaan gaa ma a dɛɛ ka pɔ (Matie 6:33). Gaa kpɔ bɔ ka kɛ a məlaa. Mɛni kəlee hu, gɛ pələ kwɛli ma ə ŋɔ nɛɛlaa kwɛli. Mɛinɛɛ kɛnɛɛ kpɔ nukan a pɛli ɉɔlɔɓoi, yaa li (Matie 22:37, 38).
1 KA KA WƆ NƐƐLAA HU WALA-WALA KA ZEHOVA NI
YII BIBLƏ KAA MOI : « [Ŋa] kɛ a ka nan, ka kɛ a nón ɉinaa da nón nɛaa. Huwala-wala kəlee Namu Yálá woo li » (Kɔlɛntə veelɛnaa 6:18). Yálá kaa bɔ ə́ kɛ a məlan mun nwala-wala. Gbaaləɠaa ya pɛli tɛɛi la yɛ́ məlan naa tii hɔlɔɓo, da ɓaa Yálá hwɛliɛ. Zehova kaa bɔ hó kpəla vɛlii (Tesalonikə dɔlɔɔ 5:17). Gaa bɔ yɛ́ ə́ wɔ kiliŋahiɛɠaa da ə́ maa liihɛlɛnŋaa ɓo ma (Filipə 4:6). Ka ə́ yəi bɛlɛn nua ka kɛi Yálá hwɛli, pələi Yálá kaa la ə́ ɲɛi mu yɛ nu leelee, da bələ kaa.
Ə́ ma kɛ hwaai Yálá pɔ, maanɛɛ yɛ́ ə́ wəli tɔɔ ma. Ya pɛli yili kɛi a Biblə kalanŋaa, awala kɛtii ɉɛɓɛ yiliɠaai da Biblə hukulɔ, yɛ́ di kalan (Somə 1:1, 2, TMN). Yii ə́ kaa galan ɉii, kɛ ə́ kiliŋahiɛi ma a ɉu kweaa (Somə 77:11, 12, TMN). Ə́ wəli tɔɔ pələ Yálá ɓa, gbaalə ta ɓaa, yɛ́ li Kilistalea di wɔ ŋaakpɔnŋaa diɛ kɛlɛ-kɛlɛ (Somə 122:1-4, TMN).
Ya kɛi Zehova maa mɛni ɓo nu takpɛliɠaa diɛ, yili kaa a kpaalə takpɛli, yii a ka Zehova ka wɔ nɛɛlaa huwala-wala. Ə́ kaa lɔ pai kɛi yili kɛi, yɛ́ gaa yɛ́ ma ə́ maa kaa lɛɠɛi ma (Matie 28:19, 20).
YII KA PƐLI GƐI :
-
Kɛ lowai həɠəi ɉu holo kəlee, yɛ́ Biblə ɓo ə lɛɛ yɛ́ Yálá hwɛli
-
Ka kɛ ka yəi bɛlɛn, maanɛɛ ka Yálá mɛni laa mɛni kəlee tɔwɔ, ka vialaɓo ka dɛɛ pə́lə́ kɛɛ ɓa
2 KA KWƐLI HWILƐN YÁLÁ ƁA KA YƏI BƐLƐN A NAA ƝAANƐƐ PƏLƏ
YII BIBLƏ KAA MOI : « Ka ka maalɛɠɛ Yálá ɓa, Yálá a maalɛɠɛ kaa » (Zaakə 4:8). Pələi maanɛɛ ka kwɛli hwilɛn na Yálá ɓa ka yəi bɛlɛn, ka bələ hee gbanŋa, ə lɛɛ kaa gɛ kɛlɛ-kɛlɛ (Zənɛsə 18:19, TMN). Kəlaa dakpɛli kaa nwɔnɔ laa. Maanɛɛ Yálá ə kɛ ka wɔ yɛnɛɛ hu a yələ kəlee. Kɛ́ Yálá maa mɛni ɓoi ə́ yəi bɛlɛn nua diɛ « ɓɛlowai ya kɛ́ la heeni ə́ yəi bɛlɛn, ɓɛlowai ya kɛ́ hiɛi la pələ mɛi, ɓɛlowai ya kɛ́ la laani, ə lɛɛ ə́ muhəɠɛɛ pulu ». (Detelonɔmə 6:6, 7, TMN.) Ka kɛi yili kɛ, ka Yálá ni ka wɔ nɛɛlaa hu kaa pai wala-walai. Gɛ yɛ pələi Zosue ə gɛ la. Ə mo yɛ ma « nwɛ́i kwa ɲəi bɛlɛn nua, ku kaa tii Zehova ɓa ». (Zosue 24:15, TMN.)
YII KA PƐLI GƐI :
-
Ka ka wɔ kalan gɛ pələ hee gbanŋa a nɛlɛɛ ka yəi bɛlɛn, nu tɛi-tɛi yɛ pɛli ŋɔɔ hɔlɔɓoi ɉu
