E berita te Baibara ni kangai: “E teimatoa n aki toki ane e kakaraoa nanon te Atua.” (1 Ioane 2:​17) Tera ae e tangiria te Atua bwa ko na karaoia?

•   Reiakina taekan te Atua ma Natina ae Iesu. E taku Iesu ngke e tataro nakon te Atua: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” (Ioane 17:3) Tera ae irekereke ma ‘ataakin’ te Atua ao Iesu? Ti kona n ataiia ngkana ti ukeuke n reirei n te Baibara ao ni maiuakini baike a taekinaki iai. a E oti n te Baibara ana iango ara tia Karikiriki, ae Iehova ae te Atua, are te tia Anga te maiu. (Mwakuri 17:​24, 25) E tuangira naba te Baibara taekan Natina are e angareirei i aon “taeka aika kairiri nakon te maiu are aki toki.”​—Ioane 6:​67-​69.

•   Onimakina ana karea ni kaboomwi Iesu. E roko Iesu n te aonnaba “bwa e na riki bwa te tabonibai, ao e na anga maiuna bwa te kaboomwi.” (Mataio 20:28) E kauka te kawai nakon te maiu ae aki toki n te Bwaretaiti n te aonnaba, ana karea ni kaboomwi Iesu. b (Taian Areru 37:29) E taku Iesu: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane e onimakinna, ma e na reke irouna te maiu are aki toki.” (Ioane 3:​16) Noria bwa e bati riki ae kainnanoaki nakon tii kakoauaan Iesu. Ti riai n “onimakinna,” n arora ni kaboraoa maiura ma ana angareirei ao nanon Tamana.​—Mataio 7:​21; Iakobo 2:​17.

•   Karekea am iraorao ae kaan ma te Atua. E tangiria te Atua bwa ti na kaania ao n riki bwa raoraona. (Iakobo 2:​23; 4:8) E teimatoa n aki toki te Atua. E bon aki kona ni mate ao e tangiriia raoraona bwa a na maiu n aki toki. E kaota rinanon Ana Taeka te bae e tangiria ibukia naake a ukoukoria, ae kangai: “Kam bia karekea te maiu n aki toki.”​—Taian Areru 22:26.

 Te iango ae kairua: E na kabotu te maiu n aki toki.

 Te koaua: Te bwaintangira ae te maiu n aki toki boni mairoun te Atua, ae tangirira ao e tangiria naba bwa ti na kukurei. (Iakobo 1:​17; 1 Ioane 4:8) E ataia ae ti kainnanoa te mwakuri ae uaana, bwa ti aonga ni kukurei. (Te Minita 3:12) E berita te Atua bwa naake a na maiu n aki toki n te aonnaba a na karaoi mwakuri aika a na rauaki iai aika manena, ae a na kakabwaiaaki iai ma naake a tangiriia.​—Itaia 65:​22, 23.

 Irarikin anne a na teimatoa naake a na maiu n aki toki, n reiakini baika boou ibukin aia tia Karikiriki ao ana mwakuri ni karibwai aika mwaitikurikuri. E karikiia aomata ma te kani maiu n aki toki ao kan reiakinan taekana, e ngae naba ngke “a aki kona aomata n atai raoi ana mwakuri nako te Atua ae koaua ake e karaoi.” (Te Minita 3:​10, 11) Ngaia are a na bon teimatoa n iai baika kamimi aika a na reiakini ao ni karaoi naake a na maiu n aki toki.