E taku Sylvia are e mwakuri n te bitineti ae irekereke ma bwainnaoraki: “A bati raou n reirei n te kauarinan ake a taekinna bwa a taua te Aro. Ma a babakanikawai n tain te ukeuke ao a anai taian drug aika tabu kamenaaia i aan te tua. Bon akea ana ibuobuoki te Aro ibukin ruanikaini maiuia aomata.”

E taku te mwaane ae arana Lionel: “A kewe raou ni mwakuri ngke a tareboon bwa a aoraki ma a bon aki. Bon iai aia Aaro ma a aki maiuakinna kaanga ai aron bwain te auti ae tei n aki kabonganaaki.”

Akea te kakorakora ni kaungaunga man Aaro nakoia angiia aomata bwa a na kaotiota te aroaro ni maiu ae riai. A bati ni boong aikai aika “a baka n tangira te Atua” ma a kaotiia bwa “a kabwaka ni maiuakina tangirana.” (2 Timoteo 3:5) A aki katea te banna ni katoto ae eti mataniwi n Aaro, ao e aki naba reiakin taeka n reirei man te Baibara te mitinare nakoia ana nanai ibukin te aroaro ni maiu ae riai. Maroaka ae a a bati ake a kakoauaa bwa e aki tabe te Atua ma baike a kakaraoi ni maiuia.

E kaotaki n te Baibara bwa iai ana namakin te Atua, ngaia are a rangi ni kakawaki irouna mwakuri aika ti kakaraoi. ‘A boni kauna’ te Atua tibun Iteraera rimoa ngke a karitei nakoina. (Taian Areru 78:40, BG) E ngae n anne, e bati riki “te kimwareirei i karawa” ibukin temanna ae bitii aroarona aika bubuaka. (Ruka 15:7) Ngkana iai ae e a moanna ni kaitaua Tamara are i karawa n aroarona aika raraoi, e na rikirake iai tangiran te Atua irouna, e na kairia bwa e na tangira te baere E tangiria ao n ribaa te baere E ribaia.—Amota 5:15.

E taekinaki n te nuutibeeba ae te Deseret News mai Salt Lake City, Utah, U.S.A aroia Ana Tia Kakoaua Iehova bwa “a kaungaia utu bwa a na kakorakorai aia reitaki i marenaia, a ibuobuoki nakoia aomata ao a karikirakea te kakaonimaki irouia kaain te aba.” E reitaki riki iai ni kangai: “E kakawaki naba irouia kaaina maiuakinani booto n reirei ni kaineti ma te aroaro ni maiu ae riai. A kakoauaa bwa mwakuri aika a urua te iraorao ma te Atua bon te moko, te koro ni manging, kabonganaan te drug n te aro ae riao, te takaakaro n te mwane, te wene ni bure ma aomata aika bati ao i marenan te mwaane ma te mwaane ke te aine ma te aine.”

A kanga ni buokaki taani Kakoaua man reiakinan aroaron te Atua? E taku Sylvia are taekinaki mai moa: “E bwabwainaki te kewe n te tabo ni bitineti ae irekereke ma bwainnaoraki. E bebete karaoana ngkana ko mena i buakona. Ma I buokaki bwa N na karaoa ae eti man ataan ana namakin Iehova * iai. I a kukurei ao e a rau nanou.” E kakoauaa raoi Sylvia bwa e nakoraoi maiuna mani maiuakinani booto n reirei n ana Aro.