E NGAE ngke e uota te bure ao te mate nakoia aomata aia aki ongeaba ara moani karo ake Atam ao Ewa, ma e aki bitaki iai ana kantaninga te Atua ibukia aomata. E okioki ni kamatoaa n Ana Taeka ae te Baibara bwa e bon aki bitaki ana kantaninga.

• “A na abana te aonnaba akana raoiroi, ao a na maeka i aona n aki toki.”​—Taian Areru 37:29.

• “E na onga te mate n aki toki, ao e na kaoi rannimata mani maata ni kabane te Uea ae Moan te Rietata ae Iehova.”​—Itaia 25:8.

• “E na boni kamaunaaki te tia kairiribai are te kabane, are te mate.”​—1 I-Korinto 15:26.

• “E nang akea riki te mate, ke te nanokawaki ke te tang ke te maraki.”​—Te Kaotioti 21:4.

E na kangaa te Atua n “onga te mate” n te aro ae e na kamauna iai te tia kairiribai ae te mate? N aron ae taekinaki, e katerea te Baibara bwa ‘a na maiu n aki toki akana raoiroi.’ Ma e kangai naba bwa “akea te aomata ae raoiroi n te aonnaba ae kakaraoa ae raoiroi n taai nako.” (Te Minita 7:20) Te koaua bwa e na kakeai ana kaetieti te Atua bwa e aonga ni kamaunaaki te mate? E bon aki kona n iangoa karaoan anne! E na bon aki karaoa anne, bwa “te Atua . . . [e] aki kona ni kewe.” (Tito 1:2) Tera ngkanne ae e na karaoia te Atua ni kakororaoa iai ana kantaninga ae tatangira aei ae karikaia aomata?

E karaoa ana babaire ae tatangira Iehova ae te Atua, ae kamaiuaia aomata man te mate ni kabwakaan te kaboomwi. Oin te iango ibukin te kaboomwi boni kabwakaan te mwaiti ae titeboo boona ma te baere uruaki ke te mwaiti ae tangiraki n te tua. Ibukina bwa a bane ni bure aomata ao n reke n te tuuaa ae te mate, e a taekina te koaua ae kangai te Baibara: “Akea i buakoia ae e kona ni manga kabooa tarina, ke n angan te Atua te kaboomwi ibukin tarina (moan te kakawaki te kaboomwi ibukini maiuia, n te aro are e a riaon aia konaa n taai nako).”​—Taian Areru 49:​7, 8

Ngkana e mate te aomata ae aki kororaoi, e bon tii kona ni kabwakai boon ana bure, e aki kona ni kamaiua i bon irouna ke ni kabwakaa boon ana bure temanna. (I-Rom 6:7) Ti kainnanoa te aomata ae kororaoi ao ae aki bure bwa e na anga maiuna, tiaki ibukin ana bure ma ibukin ara bure.​—Ebera 10:​1-4.

Bon anne ana babaire te Atua. E kanakomaia Natina are Iesu mai karawa bwa e na bungiaki n te aonnaba bwa te aomata ae kororaoi ao ae akea ana bure. (1 Betero 2:22) E taku Iesu bwa e roko bwa “e na anga maiuna bwa te kaboomwi ibukia aomata aika bati.” (Mareko 10:45) E mate bwa e aonga ni kamauna te tia kairiribai ae te mate, bwa ti aonga ni karekea te maiu.​—Ioane 3:16.

Kakororaoan te taetae ni burabeti n te Baibara ngkai, nanona bwa ti a mena n “taai aika okoro aika karuanikai,” ike e a oti iai bwa ti a mena ni ‘kabaneani bongin’ te waaki ae buakaka ae ngkai. (2 Timoteo 3:1) E na roko n tokina kabaneani boong n “te bong ni motikitaeka ao bongini kamaunaaia aomata ake a aki karinea te Atua.” (2 Betero 3:​3, 7) Ma a na kamaiuaki aomata ake a tangira te Atua ao a na kakabwaiaaki n anganaki “te maiu are aki toki.”​—Mataio 25:46.

Iai naba mirion ma mirion aomata ake e na reke irouia te maiu n aki toki ngkana a kautaki man te  mate. E karaoa te kautiuti Iesu n rokona n te kaawa are Nain. E mate ana rikitemanna neie e a tia ni mate buuna, ao “e korakora nanoangaana” iroun Iesu ao e a kautia. (Ruka 7:​11-15) E korea ae kangai te abotoro Bauro: “Iai ae I kantaningaia mairoun te Atua . . . ae a na boni mangauti akana raoiroi ma akana aki raoiroi.” Te kantaninga ae nene aei boni kaotan ana tangira ae rianako te Atua ibukia aomata.​—Mwakuri 24:15.

Birion ma birion aomata aika nang kona ni kariaa te maiu n aki toki. E taku te Baibara: “A na abana te aonnaba akana raoiroi, ao a na maeka i aona n aki toki.” (Taian Areru 37:29) N te tai anne, a nang kukurei ao ni kaungaaki n nori koroni bukin taeka ake e korei te abotoro Bauro 2,000 tabun te ririki n nako ake a kangai: “Te mate, e nga am tokanikai? Te mate, e nga am kainnewa?” (1 I-Korinto 15:55) E nang kamaunaaki te tia kairiribai nakoia aomata ae korakora ae te mate!