Annan artik-a ki ka vini anvan, nou wè plizyèr détay asou sign Jézi té palé. Sa sign-an ka byen montré ki rwayonm Bondjé-a ja an plas annan syèl-a, ké Jézi Kris ka dirijé l’.

Labib-a ka di ki, lò Jézi divini Rwa, i mété Satan ké so démon-yan dèrò di syèl-a. Dipi sa jou-a, a asou latè-a rounso yé pouvé aji. A pou sa osi ki bagaj-ya ka alé mal konsa dipi 1914 (Révélation 12:7, 9).

Menm si bagaj-ya ka vini plizanpli mové asou latè-a, Jézi ki Rwa annan rwayonm Bondjé-a ka aji pou idé moun-yan. Gras a aktivité pou ansényé Labib-a asou tout latè-a ki Jézi té palé, bokou moun ka anprann prensip Labib-a é yé ka swiv sa prensip-ya annan yé lavi touléjou (Isaïe 2:2-4). Sa prensip-ya ka idé milyon moun gen roun pi bon lavi fanmi, é ka anprann yé osi pa lésé travay ouben bagaj matéryèl divini pi enpòrtan pasé pyès ròt kichoz. Yé ka anprann viv pi byen dipi aprézan é yé ka divini moun ki Bondjé lé wè viv anba dominasyon so rwayonm.

Menm si Jézi ja Rwa annan syèl-a, a imen-yan ki ka dirijé latè-a toujou. Mé, Bondjé bay Jézi sa lòrd-a : « Alé an mitan to lèlmi épi dominé asou yé » (Psaume 110:2). Titalò, Jézi ké tiré nèt tout sa-ya ki ka opozé yé kò kont Rwayonm-an, é sa ké poté soulajman pou sa-ya ki ka obéyi Bondjé ké tout yé tchò.

A sa moman-an, men sa rwayonm Bondjé-a ké fè :

• I ké fè tout fo rélijyon-yan disparèt. Rélijyon-yan ki ansényé manti asou Bondjé é ki randé lavi moun difisil pa ké èkzisté ankò. Labib-a ka konparé tout fo rélijyon-yan ké roun fanm ki ka mennen vyé lavi. Lò i ké disparèt, bokou moun ké èstébékwé (Révélation 17:15, 16).

• I ké fini ké dominasyon imen-yan. Rwayonm Bondjé-a ké fini ké tout dominasyon imen-yan (Révélation 19:15, 17, 18).

• I ké détrwi moun-yan ki mové. Kisa ki ké rivé moun-yan ki ka kontinyé fè sa ki mové é ki pa lé obéyi Bondjé ? « Mé yé ké tiré méchan-yan di latè-a » (Proverbes 2:22).

• I ké tiré Satan ké démon-yan. Satan ké démon-yan pa ké pouvé ‘bloublou nasyon-yan’ ankò (Révélation 20:3, 10).

Kouman lavi-a ké fika pou sa-ya ki ké anba dominasyon rwayonm Bondjé-a ?

Kou i Rwa annan syèl-a, Jézi ké pouvé fè bokou plis bagaj pasé nenpòrt ki chèf asou latè-a. Pou idé l’, i ké gen 144 000 moun chwazi asou latè-a ki ké chèf ké li (Révélation 5:9, 10 ; 14:1, 3). I ké fè volonté Bondjé fèt asou latè-a. Ki bénédiksyon rwayonm Bondjé-a ké poté pou moun ki ké viv asou latè-a ?

• I ké tiré maladi ké lanmò. « Pyès moun pa ké di : “Mo malad” », é « i pa ké gen lanmò ankò » (Isaïe 33:24 ; Révélation 21:4).

• I ké mété vré lapè ké sékirité-a. « To pitit ké gen roun gran lapè », é « yé chak ké asiz anba yé pyé rézen ké anba yé pyé fig, é pyès moun pa ké fè yé pè » (Isaïe 54:13 ; Michée 4:4).

• I ké bay tout moun roun travay ki chwit. « Sa-ya mo chwazi ké profité di yé travay toubonnman. Yé pa ké las pou anyen » (Isaïe 65:22, 23).

• I ké réglé problèm lanvirònman. « Dézèr-a ké koté ki sèk-a ké kontan toubonnman. Savann ki sèk-a ké kontan é i ké fè flèr kou safran » (Isaïe 35:1).

• I ké ansényé moun-yan sa yé divèt fè pou yé viv pou tout-tan. « Men sa ki sa lavi pou tout-tan-an : a pou yé anprann konnèt to, ki sa sèl vré Bondjé-a, ké sa-la to voyé-a, Jézi Kris » (Jean 17:3).

Bondjé lé ki ou trapé sa bénédiksyon-yan (Isaïe 48:18). Artik-a ki ka vin dèyè-a ka èspliké kisa ou pouvé fè dipi aprézan pou konnèt sa bèl bagaj-ya pou dimen.