Klɛŋklɛŋ lɛ, hã anɔkwa wiemɔi nɛɛ ashɛje omii, akɛ: Nyɔŋmɔ naa amanehulu ni yaa nɔ yɛ je lɛ mli ŋmɛnɛ lɛ, ni eto eyiŋ akɛ ebaafee he nɔ ko. (Lala 72:13, 14) Nyɔŋmɔ ewo shi yɛ e-Wiemɔ ni ji Biblia lɛ mli akɛ, ‘mɛi ni naa amanehulu lɛ baaná hejɔlɛ.’ Shi mɛɛ be? “Be ni abaajie Nuŋtsɔ Yesu kpo kɛaajɛ ŋwɛi ní ebɔfoi ni yɔɔ hewalɛ lɛ fata ehe . . . ni etɔɔ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu he sane kpakpa lɛ toi lɛ ahe owele lɛ.” (2 Tesalonikabii 1:7, 8) Biblia lɛ tsɛ be ni abaajie Yesu kpo wɔsɛɛ lɛ akɛ, “Nyɔŋmɔ Ofe lɛ gbi wulu lɛ nɔ ta lɛ,” ni atsɛɔ gbi nɛɛ hu akɛ Harmagedon.—Kpojiemɔ 16:14, 16.

Yɛ nakai ta ni abaawu wɔsɛɛ lɛ mli lɛ, Nyɔŋmɔ kɛ e-Bi Yesu Kristo kɛ mumɔŋ bɔɔ nii krokomɛi ni he wa waa—shi jeee adesai—baatsu nii kɛwu eshi mɛi fɔji lɛ. Ŋwɛi tai nɛɛ kɛ yiwalɛ fɛɛ baaba naagbee.—Yesaia 11:4; Kpojiemɔ 19:11-16.

Kɛbashi bianɛ lɛ, susumɔ ni Nyɔŋmɔ yɔɔ yɛ ta he lɛ tsakeko. Loloolo lɛ, enaa ta akɛ eji gbɛ ni hi ni abaatsɔ nɔ ajie yiwalɛ kɛ efɔŋfeemɔ kɛya. Shi taakɛ eji yɛ yinɔsane mli fɛɛ lɛ, Nyɔŋmɔ pɛ ji mɔ ni yɔɔ hegbɛ akɛ etsɔɔ be ni esa akɛ awu tai ni tamɔ nakai lɛ, kɛ mɔ ni sa akɛ ekɛ ehe awo mli. Taakɛ wɔna lɛ, Nyɔŋmɔ ekpɛ mli momo akɛ abaawu ta ní akɛbaafo efɔŋfeemɔ sɛɛ ní akɛtɔ mɛi ni awaa amɛ yi lɛ ahe  owele lɛ wɔsɛɛ, ni e-Bi Yesu Kristo ji mɔ ni baawu nakai ta lɛ. Enɛ tsɔɔ akɛ, Nyɔŋmɔ ekpɛlɛɛɛ tai ni awuɔ yɛ shikpɔŋ lɛ nɔ ŋmɛnɛ lɛ anɔ, ekɔɔɔ he eko bɔ ni yiŋtoo hewɔ ni wuɔ lɛ ja hã.

Akɛ nɔkwɛmɔnɔ lɛ: Feemɔ nyɛmimɛi enyɔ komɛi ni miinɔ be ni amɛpapa efã gbɛ lɛ he mfoniri yɛ ojwɛŋmɔŋ okwɛ. Amɛfo nɔmɔ lɛ mli fioo ni amɛtswa amɛpapa tɛlifoŋ. Mɔ kome kɛɛ mɔ kroko lɛ ni je nɔmɔ lɛ shishi, ni lɛ hu ekɛɛ no mli lɛ enyɛmi lɛ miiwa lɛ yi. Amɛteŋ mɔ fɛɛ mɔ wie nibii ni baahã amɛpapa afi esɛɛ. Shi be ni tsɛ lɛ ebo amɛ fɛɛ toi sɛɛ lɛ, ekɛɛ amɛ ní amɛkpa nɔmɔ lɛ ní amɛmɛ kɛyashi ebaaba shĩa koni ekwɛ sane lɛ. No hewɔ lɛ, gbekɛbii lɛ kpa nɔmɔ lɛ. Shi etsɛɛɛ kɛkɛ ni amɛbɔi nɔmɔ ekoŋŋ. Be ni tsɛ lɛ ba lɛ, emli fu gbekɛbii enyɔ lɛ fɛɛ ni egbala amɛtoi akɛni amɛbooo lɛ toi lɛ hewɔ.

Ŋmɛnɛ lɛ, bei pii lɛ maji ni wuɔ ta lɛ sɔleɔ koni Nyɔŋmɔ afi amɛsɛɛ. Shi Nyɔŋmɔ fiii tai ni awuɔ ŋmɛnɛ lɛ sɛɛ. Ekɛɔ wɔ faŋŋ yɛ e-Wiemɔ ni ji Biblia lɛ mli akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ,” ni ekɛɔ hu akɛ, “nyɛkatɔa nyɛ diɛŋtsɛ nyɛhe owele.” (Romabii 12:17, 19) Kɛfata he lɛ, ehã ale akɛ esa akɛ adesai ‘ato amɛtsui shi kɛmɛ lɛ’ koni lɛ etsu saji ahe nii, ni ebaafee nakai yɛ Harmagedon. (Lala 37:7) Kɛ́ jeŋmaji lɛ náaa tsui kɛmɛ koni Nyɔŋmɔ diɛŋtsɛ atsu saji ahe nii, ni amɛkɛ amɛhe wo tawuu mli koni amɛkɛtsu saji ahe nii lɛ, Nyɔŋmɔ naa nakai feemɔ akɛ eji henɔwomɔ kɛ atuatsemɔ, ni enáaa he miishɛɛ. No hewɔ lɛ, yɛ Harmagedon lɛ, Nyɔŋmɔ baahã ana bɔ ni emli efu jeŋmaji lɛ, ni ebaatsu béi ni yaa nɔ yɛ amɛteŋ lɛ he nii shi kome nyɔŋlo kɛtsɔ ‘tai asɛɛ ni ebaafo kɛyashi shikpɔŋ lɛ naagbeehei lɛ fɛɛ’ lɛ nɔ. (Lala 46:10; Yesaia 34:2) Eyɛ faŋŋ akɛ, Nyɔŋmɔ baatsɔ Harmagedon ta lɛ nɔ efo tai fɛɛ sɛɛ.

Tai asɛɛ ni abaafo lɛ ji jɔɔmɔi babaoo ni Nyɔŋmɔ Maŋtsɛyeli lɛ kɛbaaba lɛ ateŋ ekome. Yesu wie nakai maŋtsɛyeli lɛ he yɛ sɔlemɔ ko ni ale waa lɛ mli akɛ: “O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:10) Jeee tai pɛ Nyɔŋmɔ Maŋtsɛyeli lɛ baafo sɛɛ, shi moŋ ebaajie nɔ tuuntu ni hãa awuɔ ta ní hãa afeɔ efɔŋ hu lɛ kɛya. * (Lala 37:9, 10, 14, 15) Ebɛ naakpɛɛ mɔ akɛ Yesu sɛɛnyiɛlɔi lɛ kɛ miishɛɛ miikwɛ jɔɔmɔi ni Nyɔŋmɔ Maŋtsɛyeli lɛ kɛbaaba lɛ gbɛ.—2 Petro 3:13.

Shi mɛɛ be esa akɛ wɔmɛ kɛyashi, dani Nyɔŋmɔ Maŋtsɛyeli lɛ baajie nɔnaa, yiwaa, kɛ efɔŋfeemɔ kɛya? Biblia mli gbalɛi tsɔɔ akɛ, wɔyɛ je lɛ “naagbee gbii lɛ amli.” (2 Timoteo 3:1-5) * Etsɛŋ Nyɔŋmɔ Maŋtsɛyeli lɛ baatsɔ Harmagedon ta lɛ nɔ efo naagbee gbii nɛɛ sɛɛ.

Taakɛ atsɔɔ mli kɛtsɔ hiɛ lɛ, mɛi ni kpoɔ akɛ ‘amɛbaabo wɔ-Nuŋtsɔ Yesu he sane kpakpa lɛ toi lɛ’ ji mɛi ni abaakpãtã amɛhiɛ yɛ naagbee ta lɛ mli. (2 Tesalonikabii 1:8) Shi kaimɔ akɛ, Nyɔŋmɔ náaa mɔ ko mɔ ko—ni mɛi fɔji hu fata he lɛ—gbele he miishɛɛ. (Ezekiel 33:11) Akɛni “esumɔɔɔ akɛ akpãtã mɔ ko mɔ ko hiɛ” yɛ naagbee ta lɛ mli hewɔ lɛ, amrɔ nɛɛ eeekwɛ koni ashiɛ wɔ-Nuŋtsɔ Yesu he sane kpakpa lɛ “yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase” dani naagbee lɛ aba. (2 Petro 3:8, 9; Mateo 24:14; 1 Timoteo 2:3, 4) Hɛɛ, kɛtsɔ shiɛmɔ nitsumɔ ni Yehowa Odasefoi lɛ tsuɔ yɛ jeŋ fɛɛ lɛ nɔ lɛ, mɛi fɛɛ ená hegbɛ akɛ amɛbaale Nyɔŋmɔ, ni amɛbo sane kpakpa ni kɔɔ Yesu he lɛ toi, ni enɛ baahã amɛhi shi ní amɛna be ni abaajie ta kɛya kwraa lɛ.