Afɔ mi yɛ Santo Domingo yɛ Dominican Republic, ni mi ji nakutsoŋbi yɛ bii ejwɛ ateŋ. Mifɔlɔi tee skul waa, ni amɛsumɔɔ akɛ amɛtsɔse wɔ yɛ mɛi kpakpai kɛ anɔkwafoi ateŋ. Afii ejwɛ dani abaafɔ mi lɛ, mifɔlɔi lɛ kɛ Mormon maŋsɛɛ sɔɔlɔi kpe. Oblahii nɛɛ atade kɛ amɛhesaamɔ lɛ fee mifɔlɔi lɛ fɛo waa, etsɛɛɛ nɔŋŋ kɛkɛ ni mifɔlɔi lɛ kpɛ mli akɛ wɔweku lɛ baafee klɛŋklɛŋbii ni yɔɔ ŋshɔkpɔ nɛɛ nɔ ni kɛ amɛhe baadɔmɔ Mormon Jamɔ ni atsɛɔ lɛ Church of Jesus Christ of Latter-day Saints lɛ.

Beni midaa lɛ, minya henaabuamɔi kɛ hiɛtserɛjiemɔi ni jamɔ lɛ feɔ lɛ ahe waa, ni mihiɛ sɔ Mormonbii asusumɔ yɛ weku shihilɛ kɛ jeŋba he lɛ he. No mli lɛ, eŋɔɔ minaa waa akɛ mi ji Mormonnyo, ni mikɛfee oti ni ma mihiɛ akɛ matsɔ Mormon maŋsɛɛ sɔɔlɔ.

Beni miye afii 18 lɛ, wɔweku lɛ fã kɛyahi United States bɔni afee ni manyɛ maya yunivɛsiti kpakpa. Aaafee afi sɛɛ lɛ, minyɛkwɛ̃ kɛ mitsɛkwɛ̃, ni amɛji Yehowa Odasefoi lɛ ba Florida amɛbasara wɔ. Amɛfɔ̃ wɔ nine koni wɔkɛ amɛ aya kpee ko ni abaafee ni damɔ Biblia lɛ nɔ lɛ. Bɔ ni mɛi ni tara mimasɛi lɛ gbeleɔ ŋmalɛi lɛ ni amɛŋmalaa nii lɛ fee mi fɛo waa. No hewɔ lɛ, mibi ni aha mi pɛn kɛ wolo, ni mihu mibɔi nakai feemɔ.

Beni agbe kpee lɛ naa lɛ, minyɛkwɛ̃ lɛ kɛ mitsɛkwɛ̃ lɛ kɛɛ akɛni miisumɔ matsɔ maŋsɛɛ sɔɔlɔ hewɔ lɛ, amɛbaasumɔ ni amɛye amɛbua mi koni makase Biblia lɛ. Mina akɛ nɔ ni amɛwie lɛ hi waa, ejaakɛ no beaŋ lɛ mile Mormon wolo lɛ mli nii babaoo kwraa fe Biblia lɛ.

Beni minyɛkwɛ̃ lɛ kɛ mitsɛkwɛ̃ lɛ kɛ mi kaseɔ Biblia lɛ yɛ tɛlifoŋ nɔ lɛ, be fɛɛ be lɛ, amɛwoɔ mi hewalɛ koni mikɛ nibii ni miheɔ miyeɔ lɛ ato Biblia tsɔɔmɔi lɛ ahe. Amɛsumɔ akɛ mi diɛŋtsɛ mana nɔ ni Biblia lɛ kɛɔ.

 No mli lɛ, mikpɛlɛ Mormon tsɔɔmɔi lɛ babaoo anɔ, shi minyɛɛɛ matsɔɔ kɛji nakai tsɔɔmɔi lɛ kɛ Biblia lɛ kpãa gbee lo. Minyɛkwɛ̃ lɛ maje mi November 8, 1995, Awake! ni Yehowa Odasefoi kala lɛ eko, ni saji ni yɔɔ mli lɛ ekomɛi kɔɔ Mormon tsɔɔmɔi lɛ ahe. Minaa kpɛ mihe pam, asomoaŋ Mormon tsɔɔmɔi babaoo yɛ ni mileee. No tsirɛ mi ni miyakpa Mormonbii a-Wɛb saiti lɛ nɔ koni makwɛ akɛ saji ni yɔɔ Awake! lɛ mli lɛ ji anɔkwale lo. Mina akɛ saji fɛɛ ni Awake! lɛ wie he lɛ ji anɔkwale, ni beni miyasra Mormonbii ablema nitoohe ni yɔɔ Utah lɛ, no hu ma nɔ mi eha mi.

No beaŋ lɛ, miheɔ miyeɔ akɛ Mormon wolo lɛ kɛ Biblia lɛ kpãa gbee. Shi beni mibɔi Biblia lɛ kanemɔ jogbaŋŋ lɛ, mibayɔse akɛ Mormon tsɔɔmɔi lɛ teɔ shi woɔ saji ni yɔɔ Biblia lɛ mli lɛ. Akɛ nɔkwɛmɔnɔ lɛ, Biblia lɛ kɛɔ yɛ Ezekiel 18:4 lɛ akɛ susuma lɛ gboɔ. Shi Mormon Wolo lɛ kɛɔ yɛ Alma 42:9 lɛ akɛ: “Susuma lɛ gbooo kɔkɔɔkɔ.”

Yɛ Mormonbii atsɔɔmɔi ni kɛ Biblia lɛ kpãaa gbee lɛ sɛɛ lɛ, nɔ kroko hu ni gba minaa ji bɔ ni amɛtsɔɔ mɛi koni amɛdɔ maŋ he lɛ. Akɛ nɔkwɛmɔnɔ lɛ, atsɔɔ Mormonbii lɛ akɛ Eden abɔɔ lɛ hi Jackson County, ni yɔɔ Missouri, yɛ U.S.A. lɛ. Ni amɛjamɔŋ hiɛnyiɛlɔi lɛ kɛɔ akɛ gbi ko baaba ni “Nyɔŋmɔ baatsɔ United States nɔyeli lɛ nɔ eye shikpɔŋ lɛ fɛɛ nɔ.”

Mishwie miyiŋ akɛ belɛ mɛni baaba mijakumaŋ—loo maji krokomɛi anɔ—yɛ sane nɛɛ mli? Gbi ko gbɛkɛ beni oblanyo ko ni aatsɔse lɛ koni ebatsɔ Mormonbii amaŋsɛɛ sɔɔlɔ lɛ tswa mi tɛlifoŋ lɛ, miwo sane nɛɛ nɔ yɛ wɔsanegbaa lɛ mli. Mibi lɛ yɛ faŋŋ mli koni etsɔɔ mi kɛji ebaasumɔ ni ewu eshi Mormonbii ni yɔɔ maŋ kroko nɔ beni ta ete shi yɛ emaŋ lɛ kɛ nakai maŋ lɛ teŋ. Eha hetoo akɛ hɛɛ, ni enɛ ha minaa kpɛ mihe pam! Mipɛi mijamɔ lɛ mli tsɔɔmɔi lɛ amli jogbaŋŋ, ni kɛfata he lɛ mibibii Mormon Jamɔŋ hiɛnyiɛlɔi lɛ ekomɛi saji. Akɛɛ mi akɛ saji ni mibiɔ lɛ ahetoi lɛ teemɔŋ sane ni, ni no lɛ ja la lɛ ekpɛ gbi ko dani abaaná naa tsabaa.

Niiamlitsɔɔmɔ ni amɛkɛha mi nɛɛ je minijiaŋ wui, no hewɔ lɛ mipɛi mimli, ni mipɛi yiŋtoo hewɔ ni mitaoɔ akɛ matsɔ Mormon maŋsɛɛ sɔɔlɔ lɛ mli jogbaŋŋ. Miyɔse akɛ, yiŋtoo kome hewɔ ni mitaoɔ akɛ matsɔ maŋsɛɛ sɔɔlɔ lɛ ji koni maye mabua mɛi. Yiŋtoo kroko hu hewɔ ji koni mɛi abu mi. Shi yɛ Nyɔŋmɔ gbɛfaŋ lɛ, no mli lɛ mileee ehe nɔ ko kwraa. Tsɛ be ni eho lɛ mikwɛ Biblia lɛ mli shii abɔ moŋ nɛ, shi mináaa hiɛsɔɔ kpakpa ko mihaaa Biblia lɛ. No mli lɛ, mileee Nyɔŋmɔ yiŋtoo kɛha shikpɔŋ lɛ loo kɛha adesa lɛ he nɔ ko kwraa.

Kɛtsɔ Biblia lɛ ni Yehowa Odasefoi kɛ mikase lɛ nɔ lɛ, mibale nibii babaoo, ni ekomɛi ji Nyɔŋmɔ gbɛ́i, nɔ ni baa gbɔmɔ nɔ yɛ gbele mli, kɛ gbɛfaŋ nɔ ni Yesu tsuɔ koni Nyɔŋmɔ yiŋtoi aba mli. Agbɛnɛ, mibale wolo fɛfɛo nɛɛ mli nibii lɛ ekomɛi fiofio, ni miná miishɛɛ akɛ magba mɛi krokomɛi anɔkwalei ni mikaseɔ lɛ. No mli lɛ, mile akɛ Nyɔŋmɔ yɛ, shi amrɔ nɛɛ minyɛɔ mi kɛ lɛ wieɔ yɛ sɔlemɔ mli tamɔ minaanyo ko ni bɛŋkɛ mi kpaakpa. Abaptisi mi akɛ Yehowa Odasefoi lɛ ateŋ mɔ kome yɛ July 12, 2004 mli, ni nyɔji ekpaa sɛɛ lɛ mibatsɔ be fɛɛ sɔɔlɔ yɛ Kristofoi ashiɛmɔ nitsumɔ lɛ mli.

Mikɛ afii enumɔ tsu nii yɛ Yehowa Odasefoi ajeŋ muu fɛɛ nitsumɔhe yitso ni yɔɔ Brooklyn, yɛ New York lɛ. Miná miishɛɛ waa akɛ miye mibua kɛkala Biblia kɛ Yehowa Odasefoi awoji ni adamɔ Biblia lɛ nɔ aŋmalaa ni mɛi akpekpei abɔ yɛ je lɛŋ fɛɛ náa he sɛɛ lɛ, ni mikã he miiye miibua mɛi krokomɛi koni amɛkase Nyɔŋmɔ he nii.