Yehowa Adebɔɔ Ni Yɔɔ Fɛo Waa Lɛ

“Yehowa, Kwɛ Bɔ ni Onitsumɔi lɛ Fá Ha!”

ADEBƆƆ nibii ni yɔɔ fɛo kɛ naakpɛɛ ebɔle wɔ kɛkpe, ekɔɔɔ he eko he ni wɔyɔɔ, kɛ́ eji akrowa loo maŋtiase, gɔji anɔ loo ŋshɔnaa. No hewɔ lɛ, eja gbɛ jogbaŋŋ ákɛ akɛ Yehowa ninenaa nitsumɔi ni yɔɔ naakpɛɛ lɛ ahe mfonirii srɔtoi aaawo afi 2004 Calendar of Jehovah’s Witnesses lɛ mli.

Adesai ni hiɛ sɔɔ nii lɛ susuɔ Nyɔŋmɔ nitsumɔi lɛ ahe be fɛɛ be. Ákɛ nɔkwɛmɔnɔ lɛ, susumɔ Salomo, ni “[e]nilee fe bokagbɛbii lɛ fɛɛ anilee” lɛ he okwɛ. Biblia lɛ kɛɔ akɛ: “Ewie tsei ahe, kɛjɛ tsenedrutso ni yɔɔ Lebanon lɛ nɔ aahu kɛyashi hisopo ni kwɛ̃ɔ kɛjɛɔ gbogbo mli lɛ nɔ; ni asaŋ ewie koolooi kɛ loofɔji kɛ waamɔ nii kɛ nuŋ looi ahe.” (1 Maŋtsɛmɛi 5:10, 13) Maŋtsɛ David, ni ji Salomo tsɛ lɛ fɔɔ Nyɔŋmɔ ninenaa nitsumɔi ni yɔɔ fɛo jogbaŋŋ lɛ anɔ jwɛŋmɔ. Enɛ tsirɛ lɛ ni ekɛ gbee ni wa kɛɛ e-Bɔlɔ lɛ akɛ: “Yehowa, kwɛ bɔ ni onitsumɔi lɛ fá ha! Nilee okɛfee fɛɛ; shikpɔŋ lɛ nɔ eyi tɔ́ kɛ onibɔɔ nii lɛ!”—Lala 104:24. *

Esa akɛ wɔ hu wɔkase nii yɛ adebɔɔ nibii ahe ni wɔjwɛŋ nɔ. Ákɛ nɔkwɛmɔnɔ lɛ, wɔbaanyɛ ‘wɔhole wɔhiŋmɛii anɔ kɛya ŋwɛi’ ni wɔbi akɛ: “Namɔ bɔ enɛɛmɛi?” Hɛɛ, Lɛ ji Yehowa, mɔ ni yɔɔ ‘nyɛmɔ ni fa’ ni yɔɔ ‘hewalɛ kpele’ diɛŋtsɛ lɛ.—Yesaia 40:26.

Te esa akɛ Yehowa nibɔɔ nitsumɔi lɛ anɔjwɛŋmɔ aná wɔnɔ hewalɛ aha tɛŋŋ? Kɛ hooo lɛ, yɛ gbɛ̀i etɛ nɔ. Ebaanyɛ (1) ekai wɔ ni wɔbu wala mli ni wɔyɔɔ lɛ waa, (2) etsirɛ wɔ ni wɔye wɔbua mɛi krokomɛi koni amɛkase nii kɛjɛ adebɔɔ mli, kɛ (3) ni ekanya wɔ ni wɔle wɔ-Bɔlɔ lɛ jogbaŋŋ ni wɔná hiɛsɔɔ ni mli kwɔ wɔha lɛ.

Wɔshihilɛ akɛ adesai ni nɔ kwɔ kwraa fe ‘kooloi ni bɛ yitseiaŋ’ anɔ lɛ yeɔ ebuaa wɔ ni wɔnyɛɔ wɔkaseɔ adebɔɔ nibii ni yɔɔ naakpɛɛ lɛ ahe nii ni wɔhiɛ sɔɔ amɛ. (2 Petro 2:12) Wɔhiŋmɛii naa bɔ ni shikpɔŋ lɛ shikamɔ yɔɔ fɛo jogbaŋŋ ha. Wɔtoii nuɔ loofɔji alalai ni ŋɔɔ lɛ. Be he akɔntaa ni wɔnyɛɔ wɔbuɔ kɛ hei ni wɔyaa ni wɔhiɛ kpaaa nɔ lɛ yeɔ ebuaa wɔ ni wɔnyɛɔ wɔkaiɔ nibii ni yɔɔ miishɛɛ. Ŋwanejee bɛ he akɛ wala ŋɔɔ, eyɛ mli akɛ shihilɛ ni wɔyɔɔ mli amrɔ nɛɛ yeee emuu moŋ!

Fɔlɔi baanyɛ ajie miishɛɛ kpo yɛ bɔ ni amɛbii lɛ nyaa adebɔɔ nibii ahe waa amɛhaa lɛ he. Kwɛ bɔ ni gbekɛbii sumɔɔ ŋshɔŋ looi ŋoŋoi ahalamɔ yɛ ŋshɔnaa, kooloi kɛ shwɛmɔ, kɛ tsei akwɔɔ ha! Fɔlɔi baasumɔ ni amɛye amɛbua amɛbii lɛ koni amɛna tsakpãa ni kã adebɔɔ nibii kɛ Bɔlɔ lɛ teŋ. Enɛ baanyɛ aha gbekɛbii lɛ aná woo kɛ bulɛ aha Yehowa adebɔɔ nibii lɛ yɛ amɛwala shihilɛ fɛɛ mli.—Lala 111:2, 10.

Kɛji akɛ wɔnyaa adebɔɔ nibii lɛ ahe shi wɔkɛ ehe yijiemɔ lɛ haaa Bɔlɔ lɛ, no lɛ wɔbafeɔ mɛi ni  kwɛɛɛ nii kɛyaaa shɔŋŋ. Yesaia gbalɛ lɛ yeɔ ebuaa wɔ koni wɔsusu sane oti nɛɛ he, beni ekɛɛ akɛ: “Ani oleee, ani onuko? naanɔ Nyɔŋmɔ lɛ, Yehowa ni bɔ shikpɔŋ lɛ naagbeehei lɛ, egbɔjɔɔɔ ni asaŋ etɔɔɔ lɛ, ni ejwɛŋmɔ lɛ anyɛɛɛ mli atao.”—Yesaia 40:28.

Hɛɛ, Yehowa nitsumɔi lɛ yeɔ enilee kɛ ehewalɛ ni mɔ ko kɛ lɛ yeee egbɔ yɛ mli, kɛ suɔmɔ ni mli kwɔ ni eyɔɔ kɛha wɔ lɛ he odase. Yɛ be mli ni wɔkwɛɔ nibii fɛfɛji ni ebɔle wɔhe kɛkpe lɛ ní wɔyɔseɔ sui ni Mɔ ni fee nibii nɛɛ fɛɛ lɛ yɔɔ lɛ, eba akɛ no aaatsirɛ wɔ koni taakɛ David jaje lɛ, wɔ hu wɔjaje akɛ: “Nuŋtsɔ [Yehowa], mɔ ko mɔ ko bɛ ni tamɔo . . . , ni asaŋ nɔ ko nɔ ko bɛ ni tamɔ onitsumɔi lɛ.”—Lala 86:8.

Wɔbaanyɛ wɔná nɔmimaa akɛ adesai ni feɔ toiboo lɛ baaya nɔ aná Yehowa nibɔɔ nitsumɔi lɛ ahe miishɛɛ. Wɔbaaya nɔ wɔná hegbɛi babaoo kɛkase Yehowa he nii kɛya naanɔi anaanɔ. (Jajelɔ 3:11) Ni babaoo ni wɔkaseɔ wɔ-Bɔlɔ lɛ he nii lɛ, babaoo ni wɔbaasumɔ lɛ ji no.

[Shishigbɛ niŋmaa]

[Akrabatsa ni yɔɔ baafa 9]

Bɔlɔ lɛ Yijiemɔ

Jeŋ nilelɔi ni yɔɔ hiɛsɔɔ lɛ ateŋ mɛi pii kpɛlɛɔ nɔ akɛ Nyɔŋmɔ ji adebɔlɔ. Amɛteŋ mɛi fioo komɛi awiemɔi nyiɛ sɛɛ nɛɛ:

“Beni minaa nɔ ko hee ni mikɛɔ mihe akɛ, ‘No hewɔ lɛ, nɛkɛ ji bɔ ni Nyɔŋmɔ fee lɛ’ lɛ ji bei ni minine shɛɔ oti kɛ miishɛɛ ni yɔɔ jeŋ nilee ni mikaseɔ lɛ sɛɛ lɛ nɔ. Oti ni ma mihiɛ ji ni maná Nyɔŋmɔ yiŋtoo lɛ he shishinumɔ fioo.”—Henry Schaefer, tsofa futumɔ he nilelɔ.

“Yɛ nɔ ni kɔɔ bɔ ni fee ni Je lɛ mli lɛɛ lɛ he lɛ, no lɛ ashiɔ ahaa nikanelɔ lɛ koni emu sane naa eha lɛ diɛŋtsɛ ehe, shi wɔshishinumɔ yɛ bɔ ni fee ni eba lɛ nakai lɛ tɔɔ fã kɛji [Nyɔŋmɔ] E-bɛ mli.”—Edward Milne, ŋulamii ahe nilelɔ ni jɛ Britain.

“Wɔle akɛ bɔ ni ato nibii ahe gbɛjianɔ jogbaŋŋ aha lɛ nɔ atsɔɔ akɛtsɔɔ adebɔɔ mli ejaakɛ Nyɔŋmɔ ji mɔ ni bɔ.”—Alexander Polyakov, akɔntaabulɔ kpanaa ni jɛ Russia.

“Adebɔɔ nibii ahe nii ni wɔkaseɔ lɛ haa wɔsusuɔ Bɔlɔ lɛ yiŋtoi ahe, wɔbaleɔ esusumɔi, ni wɔtsɔɔ gbɛjianɔ ni eto lɛ shishi, shi jeee wɔnɔ̃.”—Louis Agassiz, wala shishijee he nikasemɔ he nilelɔ ni jɛ Amerika.

[Mfoniri ni yɔɔ baafa 8, 9]

Gentoo ŋshɔnaa dɔkɔdɔkɔi yɛ Antartic Ŋshɔkpɔ lɛ nɔ

[Mfoniri ni yɔɔ baafa 9]

Grand Teton National Park ni yɔɔ Wyoming yɛ U.S.A.

[He ni Sane lɛ Jɛ]

Jack Hoehn/Index Stock Photography