Bɔfoi Lɛ Anitsumɔi 18:1-28
18 Enɛ sɛɛ lɛ, eshi Atene ni eba Korinto.
2 Ni ena Yudanyo ko ni atsɛɔ lɛ Akwila+ kɛ eŋa Priskila. Afɔ Akwila yɛ Ponto ni ejɛ Italia eba etsɛko, ejaakɛ Klaudio efã akɛ Yudafoi lɛ fɛɛ ashi Roma. No hewɔ lɛ, etee amɛŋɔɔ,
3 ni akɛni ekɛ amɛ fɛɛ tsuɔ nitsumɔ kome hewɔ lɛ, ehi amɛshĩa lɛ, ni ekɛ amɛ tsu nii,+ ejaakɛ nɔ ni amɛtsuɔ ji, amɛfeɔ mama tsũi.
4 Hejɔɔmɔ Gbi fɛɛ Hejɔɔmɔ Gbi+ nɔ lɛ, eyahãa wiemɔ* yɛ kpeehe+ lɛ ni etsɔɔ Yudafoi kɛ Greekbii ayiŋ.
5 Agbɛnɛ, be ni Sila+ kɛ Timoteo+ fɛɛ kpeleke shi kɛjɛ Makedonia kɛba lɛ, Paulo kɛ be babaoo shiɛ wiemɔ lɛ, ni eye Yudafoi lɛ odase kɛtsɔɔ akɛ Yesu ji Kristo lɛ.+
6 Shi be ni amɛtee nɔ amɛte shi amɛwo lɛ, ni amɛwie wiemɔi fɔji lɛ, ekpokpo etadei lɛ amli+ ni ekɛɛ amɛ akɛ: “Nyɛlá abua nyɛ diɛŋtsɛ nyɛyiteŋ.+ Mi lɛ, miyeee mɔ ko lá yi sɔ̃.+ Kɛjɛ be nɛɛ nɔ kɛyaa lɛ, maya jeŋmajiaŋbii lɛ aŋɔɔ.”+
7 No hewɔ lɛ, eje jɛmɛ* ni etee nuu Nyɔŋmɔ jálɔ ko ni atsɛɔ lɛ Titio Yusto lɛ shĩa, eshĩa lɛ kpɛtɛ kpeehe lɛ.
8 Shi Krispo,+ ni ji onukpa ni kwɛɔ kpeehe lɛ nɔ lɛ, he Nuŋtsɔ lɛ nɔ eye, ni eshĩabii lɛ fɛɛ hu fee nakai nɔŋŋ. Ni Korintobii lɛ ateŋ mɛi babaoo ni nu lɛ he amɛye ni abaptisi amɛ.
9 Agbɛnɛ nyɔɔŋ lɛ, Nuŋtsɔ lɛ tsɔ ninaa ko nɔ ekɛɛ Paulo akɛ: “Kaashe gbeyei, shi yaa nɔ owie ni okamua onaa,
10 ejaakɛ mikɛ bo yɛ,+ ni mɔ ko mɔ ko etaŋ ohe ni eye bo awui; ejaakɛ miyɛ mɛi pii yɛ maŋ nɛɛ mli.”
11 No hewɔ lɛ, ehi jɛmɛ afi kome kɛ nyɔji ekpaa, ni etsɔɔ Nyɔŋmɔ wiemɔ lɛ yɛ amɛteŋ.
12 Be ni Galio yeɔ prokɔnsɔl* yɛ Akaia lɛ, Yudafoi lɛ fee ekome kɛte shi amɛwo Paulo ni amɛkɛ lɛ tee kojomɔ sɛi lɛ hiɛ,
13 amɛkɛɛ: “Gbɔmɔ nɛɛ miikɔne mɛi ayiŋ koni amɛjá Nyɔŋmɔ yɛ gbɛ ni mla lɛ eŋmɛɛɛ gbɛ nɔ.”
14 Shi be ni Paulo miiba ebagbele enaa ni ewie lɛ, Galio kɛɛ Yudafoi lɛ akɛ: “Nyɛ Yudafoi, anɔkwa, eji nɔ ko gbonyo loo efɔŋ ko ni yɔɔ hiɛdɔɔ nuu nɛɛ efee kulɛ, ebaafee nɔ ni nilee yɔɔ mli akɛ mato mitsui shi kɛbo nyɛ toi.
15 Shi kɛ́ eji wiemɔi kɛ gbɛ́ii kɛ nyɛ diɛŋtsɛ nyɛmla lɛ ahe saji ahe ŋwanejei lɛ,+ nyɛ diɛŋtsɛ nyɛyakwɛa nɔ. Misumɔɔɔ akɛ mikojoɔ nɛkɛ saji.”
16 Kɛkɛ ni eshwie amɛ kɛje kojomɔ sɛi lɛ hiɛ.
17 No hewɔ lɛ, amɛ fɛɛ amɛmɔ Sostene,+ onukpa ni kwɛɔ kpeehe lɛ nɔ lɛ, ni amɛbɔi lɛ yii yɛ kojomɔ sɛi lɛ hiɛ. Shi Galio efeee nibii nɛɛ ahe nɔ ko kwraa.
18 Shi be ni Paulo ehi shi gbii saŋŋ efata he lɛ, ekɛ nyɛmimɛi lɛ ye shɛɛ ni ebote lɛlɛ mli kɛtee Siria, ni Priskila kɛ Akwila kɛ lɛ tee. Ehã aku eyitsɔi lɛ nɔ yɛ Kenkrea,+ ejaakɛ ewo Nyɔŋmɔ shi.
19 Ni amɛyashɛ Efeso, ni eshi amɛ yɛ jɛmɛ; shi ebote kpeehe lɛ ni ekɛ Yudafoi lɛ yasusu nii ahe.+
20 Eyɛ mli akɛ amɛtee nɔ amɛkɛɛ lɛ akɛ ekɛ amɛ ahi shi be fioo kɛfata he moŋ, shi ekpɛlɛɛɛ,
21 moŋ lɛ, ekɛ amɛ ye shɛɛ ni ekɛɛ amɛ akɛ: “Kɛ́ Yehowa* miisumɔ lɛ, maku misɛɛ maba nyɛŋɔɔ ekoŋŋ.” Ni ewo lɛlɛ kɛjɛ Efeso
22 ni ekpeleke shi kɛba Kaisarea. Ni ekwɔ kɛtee* eyaŋa asafo lɛ, ni ekpeleke shi kɛba Antiokia.+
23 Be ni ehi jɛmɛ be fioo lɛ, eshi ni etee maŋ fɛɛ maŋ ni yɔɔ Galatia kɛ Frigia kpokpai lɛ anɔ+ lɛ mli, ni eyawaje kaselɔi lɛ fɛɛ.+
24 Agbɛnɛ, Yudanyo ko ni atsɛɔ lɛ Apolo+ ni afɔ lɛ yɛ Aleksandria lɛ ba Efeso; eji nuu ni naa tse, ni ele Ŋmalɛ lɛ mli jogbaŋŋ.
25 Atsɔɔ* nuu nɛɛ Yehowa* gbɛ lɛ he nii, ni akɛni eyɛ ekãa yɛ mumɔ lɛ naa hewɔ lɛ, ewieɔ ni etsɔɔ Yesu he nii yɛ gbɛ ni ja nɔ, shi Yohane baptisimɔ lɛ kɛkɛ ele.
26 Ekɛ ekãa bɔi wiemɔ yɛ kpeehe lɛ, ni be ni Priskila kɛ Akwila+ nu ewiemɔ lɛ, amɛhã eba amɛŋɔɔ ni amɛgbála Nyɔŋmɔ gbɛ lɛ mli jogbaŋŋ amɛtsɔɔ lɛ.
27 Agbɛnɛ hu, akɛni Apolo miitao ni efo mli kɛya Akaia hewɔ lɛ, nyɛmimɛi lɛ ŋma wolo amɛyahã kaselɔi lɛ ni amɛwo amɛ hewalɛ akɛ amɛhere lɛ hiɛmɛɛ. No hewɔ lɛ, be ni eyashɛ jɛmɛ lɛ, eye ebua mɛi ni etsɔ Nyɔŋmɔ dromɔ lɛ nɔ amɛbahe Nuŋtsɔ lɛ nɔ amɛye lɛ waa;
28 ejaakɛ ekɛ hewalɛ babaoo tsɔɔ naa fitsofitso yɛ faŋŋ akɛ Yudafoi lɛ asusumɔ lɛ ejaaa, ni ejɛ Ŋmalɛ lɛ mli etsɔɔ amɛ faŋŋ akɛ Yesu ji Kristo lɛ.+
Shishigbɛ Niŋmaa
^ Loo “ekɛ mɛi yasusuɔ nii ahe.”
^ Ni ji, kpeehe lɛ.
^ Ni ji, Roma amralo kɛhã kpokpaa ko. Kwɛmɔ Wiemɔi Titrii Amligbalamɔ lɛ.
^ Kwɛmɔ Saji Krokomɛi A5 lɛ.
^ Eeenyɛ efee akɛ, etee Yerusalem.
^ Loo “Akɛ naabu etsɔɔ.”
^ Kwɛmɔ Saji Krokomɛi A5 lɛ.
