ST. PETERSBURG, Russia​—Yɛ July 21, 2015 lɛ, Russia maŋ lɛ gu jw.org, ni ji Yehowa Odasefoi awɛbsaiti lɛ, kɛnitsumɔ yɛ maŋ lɛ mli, ni tsɔɔ akɛ kɛ́ mɔ ko tee jw.org saiti lɛ nɔ lɛ, etɔ̃ maŋ lɛ mla, ni abaanyɛ awo lɛ tsuŋ. Yɛ je lɛŋ fɛɛ lɛ, Russia pɛ ji maŋ ni egu jw.org lɛ kɛnitsumɔ.

Yekaterina Elbakyan, ni eji jamɔ he nilelɔ kpanaa kɛ tsɔɔlɔ nukpa hu yɛ Russia skul ko (Academy of Labor and Social Relations) lɛ wie jw.org lɛ he akɛ: “Misusuɔ akɛ wɛbsaiti nɛɛ he yɛ sɛɛnamɔ waa, ejaakɛ saji ni yɔɔ nɔ lɛ ji Yehowa Odasefoi lɛ ahe saji ni ja ni amɛ diɛŋtsɛ amɛkɛ wo nɔ, shi jeee nɔ ni jɛ mɛi krokomɛi aŋɔɔ. . . . Jeee Yehowa Odasefoi lɛ pɛ ji mɛi ni yaa wɛbsaiti nɛɛ nɔ; mɛi ni jeee Odasefoi ni nyaa jamɔ he lɛ hu yaa nɔ. Jeee jamɔi ahe nilelɔi kpanai tamɔ mi lɛ pɛ ahe miwieɔ lɛ, shi mɛi ni tswaa jamɔ saji ahe adafi kɛ mɛi ni kalaa saji ni kɔɔ jamɔi ahe lɛ hu.”

Be ni Lev Levinson, ni eji mlalelɔ kpanaa ni tsuɔ nii yɛ Russia mla nitsumɔhe ko (Human Rights Institute) lɛ, wieɔ yiŋ ni amralo lɛ ekpɛ nɛɛ he lɛ, ewie akɛ: “Ŋmɛnɛŋmɛnɛ beiaŋ Russia yɛ mla ni hãa mɔ fɛɛ mɔ hegbɛ akɛ edɔmɔ jamɔ ni esumɔɔ, ni jamɔi hu fɛɛ yeɔ egbɔ yɛ mla naa. Kɛ̃lɛ, taakɛ Russia fee yɛ afi 1800 afii lɛ amli lɛ, ŋmɛnɛ hu eetsi hegbɛ ni mɛi yɔɔ akɛ amɛkɛ mɛi krokomɛi gbaa amɛhemɔkɛyeli he sane lɛ naa ekoŋŋ, kɛtsɔ woji kɛ wɛbsaiti ni eguɔ lɛ nɔ. Ni dɔlɛ sane ji akɛ mɛi ni feɔ enɛ ji kojolɔi kɛ mlalelɔi kpanai, amɛtsɔɔ mla lɛ hiɛ amɛbuɔ shi ni amɛkwaa amɛkɛɔ akɛ amɛkɛ no feemɔ miiku mɛi ni woɔ maŋ hirihiri lɛ naa.”

Nɔ ni kɛ enɛ ba ji sane ko ni abua yɛ saneyelihe ko yɛ afi 2013 tɔ̃ɔ. Yɛ August 7 yɛ nakai afi lɛ mli lɛ, Russia saneyelihe ko bua akɛ nibii ni yɔɔ wɛbsaiti lɛ nɔ lɛ baahã mɛi awo maŋ lɛ mli hirihiri. Aye sane nɛɛ be ni Yehowa Odasefoi lɛ ateŋ mɔ ko bɛ jɛmɛ, akɛni awooo amɛtoi nɔ lɛ hewɔ. Shi yɛ January 22, 2014 lɛ, saneyelihe kroko tswa nakai sane ni abua lɛ efɔ̃. Fɛɛ sɛɛ lɛ, Russia maŋ lɛ najiaŋdamɔlɔ ko bi koni Russia saneyelihe wulu fe fɛɛ lɛ asaa akwɛ sane lɛ mli ekoŋŋ koni agu wɛbsaiti lɛ. Yɛ December 2, 2014 lɛ, Russia saneyelihe wulu fe fɛɛ lɛ bo Russia najiaŋdamɔlɔ lɛ toi kɛkwɛ sane lɛ mli, shi akɛni atsɔɔɔ Yehowa Odasefoi lɛ gbi ni abaaye sane lɛ hewɔ lɛ, amɛteŋ mɔ ko bɛ jɛmɛ ni baafã amɛhe. Saneyelihe wulu fe fɛɛ lɛ bua akɛ agu wɛbsaiti lɛ, ejaakɛ ebaahã mɛi awo maŋ lɛ mli hirihiri, tsɛbelɛ saneyelihe lɛ kpɛlɛ nɔ akɛ, nibii ni kulɛ Russia nɔyeli lɛ damɔ nɔ ekɛɛ agu wɛbsaiti lɛ, eko bɛ wɛbsaiti lɛ nɔ dɔŋŋ. Odasefoi lɛ ekpɛlɛɛɛ bɔ ni abua sane lɛ ahã lɛ nɔ, no hewɔ amɛbi saneyelihe wulu fe fɛɛ lɛ koni esaa ekwɛ sane lɛ mli ekoŋŋ, shi saneyelihe lɛ ekpɛlɛɛɛ nɔ. Enɛ hewɔ lɛ, yɛ July 21, 2015 lɛ, Russia maŋ lɛ nitsumɔhe ni kwɛɔ mla saji anɔ (Ministry of Justice of the Russian Federation) lɛ kɛ jw.org wɛbsaiti lɛ fata nibii ni Russia maŋ lɛ buɔ akɛ ehãa awoɔ maŋ hirihiri lɛ ahe, ni agu wɛbsaiti lɛ kɛnitsumɔ yɛ Russia fɛɛ.

Be ni Yaroslav Sivulskiy, ni eji Yehowa Odasefoi ni yɔɔ Russia lɛ anaawielɔ lɛ, wieɔ naagba ni wɛbsaiti lɛ ni agu lɛ kɛbaaba lɛ he lɛ, ekɛɛ akɛ: “Edɔ wɔ waa akɛ Russia maŋ onukpai lɛ ekpɛ yi ni esaaa nɛɛ. Yiŋkpɛɛ nɛɛ baatsĩ Yehowa Odasefoi 170,000 kɛ sɛɛ ni yɔɔ maŋ nɛɛ mli lɛ ajamɔŋ nifeemɔi anaa. Shi kɛ́ okwɛ lɛ, daa gbi lɛ, mɛi aaafee 285,000 yɛ Russia yaa saiti nɛɛ nɔ. Enɛ tsɔɔ faŋŋ akɛ ahã nibii kpakpai ni baaye abua mɛi kɛkase Biblia lɛ eŋmɛɛ mɛi po ni jeee Yehowa Odasefoi.”

Be ni J. R. Brown, ni eji Yehowa Odasefoi anaawielɔ lɛ, wieɔ sane nɛɛ he yɛ Yehowa Odasefoi anitsumɔhe yitso ni yɔɔ Brooklyn, yɛ New York lɛ, etsɔɔ mli akɛ: “Vidioi ni ahã wɔ juromɔ nii yɛ he, woji kɛ nibii ni afee yɛ wiemɔi ohai abɔ amli ni akɛkaseɔ Bibliai lɛ, kɛ Buu-Mɔɔ kɛ Awake! lɛ, ni ji woji enyɔ ni ajara fe woji fɛɛ yɛ je lɛŋ lɛ, ji nibii ni yɔɔ wɛbsaiti nɛɛ nɔ. Wɔkɛtee majimaji ateŋ woji agwabɔi ni ehe gbɛ́i waa lɛ ashishi, ni akɛtsɔɔ nii waa yɛ skul srɔtoi amli hu. Mɛi ni yɔɔ je lɛŋ hei srɔtoi, ni Russia hu fata he lɛ ená wɛbsaiti nɛɛ he sɛɛ waa diɛŋtsɛ. Anɔkwa, wɛbsaiti nɛɛ ji saiti ko ni esa akɛ ajie yi ahã mɛi fɛɛ.”