Etamɔ nɔ ni obi lɛ sumɔɔɔ skulyaa, no hewɔ lɛ ekaseee nii ni kɛ́ ahã lɛ homwɛk hu lɛ efeee. Mɛni ejɛ mli kɛba? Kɛ́ afee kaa lɛ, ebɔɔɔ mɔdɛŋ ni ejeŋba hu efite. Te obaafee tɛŋŋ ni oye obua lɛ ni ebɔ mɔdɛŋ yɛ skul kaa mli lɛ?

•  Nɔ ni esa akɛ ole

•  Nɔ ni obaanyɛ ofee

 Nɔnyɛɛ fiteɔ sane lɛ. Kɛ́ onyɛ obi lɛ nɔ lɛ, ebaahao yɛ skul kɛ shĩa fɛɛ! Bɔ ni afee ni okagba enaa lɛ, ebaabɔi malemɔ, ekɛ eskul kaa woji lɛ baabɔi too, lɛ diɛŋtsɛ ebaabɔi ekaa woji lɛ saimɔ, loo ebaabɔi ko bɔɔ. Sane lɛ baafite kwraa.

 Kɛ́ ofɔɔ lɛ nikee lɛ, sane lɛ baafite kwraa. Papa ko ni atsɛɔ lɛ Andrew lɛ kɛɛ akɛ, “Bɔ ni afee ni wɔwo wɔbi lɛ hewalɛ ni ekase nii waa lɛ, be fɛɛ be ni ebaabɔ mɔdɛŋ lɛ wɔkeɔ lɛ nii, shi ekɛ ejwɛŋmɔ ma nibii ni wɔkeɔ lɛ nɔ fe nine. Kɛ́ ebɔɔɔ mɔdɛŋ lɛ, edɔɔ lɛ akɛ enine shɛŋ nikeenii lɛ nɔ, shi jeee mɔdɛŋ ni ebɔɔɔ lɛ.”

 Kɛ́ oshwa tsɔɔlɔi lɛ eyeŋ ebuaŋ. Obi lɛ baanu he akɛ, ehe ehiaaa ni emia ehiɛ dani ebɔ mɔdɛŋ yɛ skul. Ebaashwa mɛi krokomɛi akɛ amɛ ni amɛhãaa ebɔ mɔdɛŋ lɛ, ni ebaakpa gbɛ akɛ mɛi krokomɛi baatsu enaagba lɛ he nii amɛhã lɛ. Yɛ kukufoo mli lɛ, gbekɛ lɛ nyɛŋ akase nɔ ko ni baawa lɛ kɛ́ eda, ni ji, ni ebaakpɛlɛ naagba ni baajɛ enifeemɔi amli kɛba lɛ nɔ.

 Ye ohe nɔ. Kɛ́ omli efu lɛ, okɛ obi lɛ akawie mɔdɛŋ ni ebɔɔɔ yɛ skul lɛ he. Papa ko ni atsɛɔ lɛ Brett lɛ wie akɛ, “Akɛni mikɛ miŋa fɛɛ kwɛɔ be ni wɔmli fuko ni wɔbaanyɛ wɔkɛ wɔhe awo wɔbi lɛ shihilɛ mli dani wɔkɛ lɛ wieɔ mɔdɛŋ ni ebɔɔɔ lɛ he hewɔ lɛ, nibii kpakpai ejɛ mli kɛba.”

 Taomɔ naagba lɛ. Nibii ni hãaa gbekɛbii abɔ mɔdɛŋ yɛ skul lɛ ekomɛi ji, yiwaa, skultsakemɔ, kaa gbeyeishemɔ, wɔ ni awɔɔɔ, gbɛjianɔtoo ni abɛ, loo jwɛŋmɔ ni kpaa shi. Kaamu sane naa oya akɛ obi lɛ miifee awɛŋ.

 Too gbɛjianɔ ohã obi lɛ ni enyɛ ekase nii. Too be ni ekɛbaafee ehomwɛk kɛ be ni ekɛbaakase nii. Hã lɛ he ko ni ebaanyɛ efee ehomwɛk lɛ yɛ ni nibii tamɔ TV kɛ mobail fon gbalaŋ ejwɛŋmɔ. Kɛ́ efee homwɛk kome lɛ, hã ejɔɔ ehe fioo dani efee ekroko, ni kɛ́ homwɛk ekome ni, shi efa lɛ, kɛ́ efee fioo lɛ hã ejɔɔ he, koni ekatɔ ejwɛŋmɔ. Papa ko ni jɛ Germany ni atsɛɔ lɛ Hector lɛ wie akɛ, “Kɛ́ wɔná wɔle akɛ be miishɛ ni abaafee kaa yɛ skul lɛ, wɔkɛ lɛ kaseɔ nii fiofio daa gbi, moŋ fe ni wɔbaamɛ ni be ashɛ dani wɔtsɔɔ lɛ nii.”

 Hã ena nɔ hewɔ ni esa akɛ ekase nii. Kɛ́ obi lɛ na sɛɛnamɔ ni yɔɔ nikasemɔ he bianɛ lɛ, ebaawo lɛ hewalɛ koni ekase nii. Akɛ nɔkwɛmɔnɔ lɛ, akɔntaa ni atsɔɔ yɛ skul lɛ baawa lɛ ni ekafite shika ni ohãa lɛ lɛ kɛkɛ.

 Nɔ ni baawa bo: Wa obi lɛ ni efee ehomwɛk lɛ, shi kaafee ohã lɛ. Andrew wie akɛ, “Wɔbiyoo lɛ sumɔɔɔ ni lɛ diɛŋtsɛ efeɔ ehomwɛk, esumɔɔ ni wɔfee wɔhã.” Tsɔɔmɔ obi lɛ bɔ ni lɛ diɛŋtsɛ ebaafee efee ehomwɛk.