MǏ NI ɖɔ ɖɔ a ɖò mɛ e è tuùn ganji é ɖé sín fímu kpɔ́n wɛ, vlafo hansinɔ nukúnɖeji e a yí wǎn na é ɖé. Ðò bǐbɛ̌mɛ ɔ, è xlɛ́ yɔkpɔvumɛ tɔn, hwenu e é ɖò hanjiji kplɔ́n wɛ é, kpo lee é nɔ ɖò azɔ̌ wà wɛ hwebǐnu bonu hanjiji ni bí alɔ n’i gbɔn é kpo. Enɛ gudo ɔ, è xlɛ́ lee é nɔ ɖò tomɛ yì wɛ bo nɔ ɖò nǔ xò wɛ, lobo huzu hansinɔ nukúnɖeji gbɔn gbɛ̀ ɔ bǐ mɛ gbɔn é. Zaan kpowun ɔ, è xlɛ́ kpikpoxɔmɛ tɔn sín fɔtóo ɖé lɛ, bɔ gudo mɛ ɔ, é kú.

Fímu enɛ nyí xókpaɖɔ ǎ, nǔ e jɛ ɖò gbɛzán mɛ e ko kú dìn é ɖé tɔn mɛ lɛ é wɛ. Nú mɛ ɔ na bo nyí hansinɔ, nǔnywɛ xwitixwitizɔ́watɔ́, alǒ mɛ e è tuùn ganji é ɖé ɔ, nǔ ɖokpo ɔ jɛn nɔ jɛ. Mɛ ɔ sixu ko wà nǔ gegě ɖò gbɛzán tɔn mɛ, amɔ̌, enyi é ma ko kpò bo kú wɛ ǎ ɔ, é ɖò wɛn ɖɔ é na ko lɛ́ wà nǔ gegě ɖevo lɛ.

É blawǔ, amɔ̌, nǔ e ɖò te kpɔ́n mǐ bǐ é nɛ. (Nǔnywɛtɔ́xó 9:5) Mǐ na bo dó gǎn gbɔn ɖebǔ ɔ, mǐ sixu xógló kpikpo kpo kú kpo ǎ. Gbɔn vo nú enɛ ɔ, gbɛ̀ ninɔ mǐtɔn sixu lɛ́ hwegli ɖó alitawoví ajiji ɖé, alǒ azɔn syɛnsyɛn ɖé wu. Lee Biblu ɖɔ gbɔn é ɔ, mǐ cí ahǔn zǎnzǎn tɔn e nɔ “sú nú hwenu kpɛɖé, bɔ zaanɖé kpowun ɔ, é nɔ hɔ́n ɔ ɖɔhun.”—Jaki 4:14.

Ðó gbɛ̀ ɔ cí nǔ e ma ɖó jiɖe ǎ é ɖɔhun wutu ɔ, mɛɖé lɛ nɔ zán “mǐ ni ɖu nǔ, bo nu ahan, ɖó sɔ ɔ, mǐ na kú” sín gbɛ̀. (1 Kɔlɛntinu lɛ 15:32) Gbɛtɔ́ lɛ nɔ zán gbɛ̀ gbɔn mɔ̌, ɖó ye tuùn ɖɔ emi sixu kú hweɖebǔnu, bo ka lɛ́ ɖó nukúnɖiɖó ɖě ǎ wutu. Ðò hweɖenu ɖò gbɛzán mǐtɔn mɛ ɔ, taji ɔ, hwenu e mǐ ɖò ninɔmɛ vɛwǔ ɖé mɛ gbɔn dín wɛ é ɔ, mǐ sixu kanbyɔ mǐɖée ɖɔ, ‘Nǔ e gbɛ̀ nyí é bǐ jɛn ko ɖíe à?’ Fitɛ a ka sixu mɔ xósin ɔ ɖè?

Mɛ gegě nɔ mɔ ɖɔ nǔnywɛ xwitixwiti na na xósin ɔ. Nukɔnyiyi e tíìn ɖò nǔnywɛ xwitixwiti kpo lanmɛ na nɔ ganji kpo linu é ko zɔ́n bɔ mǐ nɔ dɔ́ji kpɛɖé. Nǔnywɛ xwitixwitizɔ́watɔ́ ɖé lɛ tlɛ ɖò azɔ̌ wà wɛ bonu gbɛtɔ́ na lɛ́ dɔ́ji hú mɔ̌. Nú gǎndidó yetɔn hɛn lè wá kpo é gbɔ kpo ɔ, nǔkanbyɔ ɖé lɛ kpó ɖò te: Etɛwu mǐ ka nɔ kpò bo nɔ kú? Nukúnɖiɖó ka ɖè ɖɔ mǐ na wá ɖu ɖò kɛntɔ́ mǐtɔn kú ɔ jí à? Xóta ɖěɖee bɔ d’ewu lɛ é na gbéjé nǔkanbyɔ enɛ lɛ kpɔ́n, bo na na xósin nú nǔkanbyɔ elɔ: Nǔ e gbɛ̀ nyí é bǐ jɛn ko ɖíe à?