GBƐTƆ́ LƐ

Nǔ e Biblu ɖɔ é: Mawu “ɖó [ayikúngban ɔ] sɔ́ nyi vɔ̌ ǎ. Loɔ, é bló bɔ è na nɔ jí wɛ.”—EZAYÍI 45:18.

AYIKÚNGBAN Ɔ

Nǔ e Biblu ɖɔ é: “Mɛ ɖě nɔ ɖò kúkú wɛ, mɛ ɖě nɔ ɖò gbɛ̀ wá wɛ, ayikúngban ɔ ka huzu ǎ.”—NǓNYWƐTƆ́XÓ 1:4.

TINMƐ TƆN: Sɔgbe xá Biblu ɔ, è na sú ayikúngban ɔ sín kún dó kpɔ́n gbeɖé ǎ, é nyɔ́ wà ɔ, gbɛtɔ́ lɛ na nɔ nɔ jí hwebǐnu. Enɛ wu ɔ, etɛ ka nyí tinmɛ gbɛ̀ ɔ na vɔ tɔn?

LIN TAMƐ D’EJI: Biblu sɔ́ gbɛ̀ elɔ e ɖò na vɔ wɛ zaanɖé dìn é jlɛ́ dó nǔ e jɛ ɖò Nɔwée hwenu é wu. Hwe ɔ nu ɔ, gbɛtɔ́ lɛ nɔ “ɖò daka xò gbɔn ayikúngban ɔ bǐ jí wɛ.” (Bǐbɛ̌mɛ 6:13) Nǔ ɖò mɔ̌ có, Nɔwée ka nɔ wà nǔ jlɔjlɔ. Enɛ wu ɔ, Mawu hwlɛn Nɔwée kpo xwédo tɔn kpo, amɔ̌, É sɔ́ sin dó sú nǔnyanyawatɔ́ lɛ sín kún dó. Biblu ɖɔ xó dó nǔ e jɛ hwe ɔ nu é wu, bo ɖɔ: “Sin wɛ Mawu dó vɔ gbɛ̀ xóxó ɔ na; tɔ̀ ɖi sin kpé fí bǐ; sin enɛ wɛ é dó vɔ gbɛ̀ ɔ na.” (2 Piyɛ́ɛ 3:6) Lee Mawu vɔ gbɛ̀ ɔ gbɔn hwe ɔ nu é nɛ. Amɔ̌, etɛ sín kún é ka sú dó? É nyí ayikúngban ɔ ǎ, loɔ, mɛ nyanya e ɖò ayikúngban ɔ jí lɛ é wɛ. Enɛ wu ɔ, enyi Biblu ɖɔ gbɛ̀ ɔ sín vivɔ xó ɔ, è na vívá ayikúngban ɔ ɖɔ wɛ é ɖè ǎ. É nyɔ́ wà ɔ, kún e è na sú dó nú mɛ nyanya e ɖò ayikúngban ɔ jí lɛ é kpo nǔ nyanya e ɖò jijɛ wɛ ɖò ayikúngban ɔ jí lɛ é kpo é dó gesí wɛ é nɔ ɖè.

TAGBA LƐ KPO NǓNYANYAWIWA KPO

Nǔ e Biblu ɖɔ é: “Zaanɖé dìn ɔ, mɛdídá sɔ́ na ɖè ǎ; a nyi kɔ kpɔ́n fí e é nɔ ɔ, a sɔ́ na mɔ ɛ ǎ. Tò ɔ ka na nyí mɛ e nɔ sɔ́ yeɖée hwe lɛ tɔn, bɔ fífá ma ɖó dogbó e ye na mɔ ɔ wɛ na nyí nǔ e na nɔ víví nú ye é.”—ÐƐHAN 37:10, 11.

TINMƐ TƆN: Sin e vɔ gbɛ̀ ɖò Nɔwée hwenu é ɖè nǔnyanyawiwa sín ayikúngban ɔ jí bǐ mlɛ́mlɛ́ bɔ xó bǐ fó ǎ. Sinvɔgbɛ ɔ gudo ɔ, nǔnyanyawatɔ́ lɛ lɛ́ bló bɔ gbɛ̀ vɛwǔ nú gbɛtɔ́ lɛ bǐ. Amɔ̌, zaanɖé dìn ɔ, Mawu na sú nǔnyanyawiwa sín kún dó bǐ mlɛ́mlɛ́. Lee ɖɛhanwlantɔ́ ɔ ɖɔ gbɔn é ɔ, “Mɛdídá sɔ́ na ɖè ǎ.” Mawu na zán Axɔ́suɖuto tɔn dó ɖó nǔ nǔnyanyawiwa nu; Axɔ́suɖuto enɛ ɔ na kp’acɛ sín jixwé dó gbɛtɔ́ nǔjlɔjlɔwatɔ́ ɖěɖee na ɖò ayikúngban ɔ jí lɛ é bǐ jí.

LIN TAMƐ D’EJI: Acɛkpatɔ́ égbé tɔn lɛ ka na hun xomɛ dó nɔ gudo nú acɛ e Axɔ́suɖuto Mawu tɔn na kpa é à? Biblu ɖɔ ɖɔ ye kún na wà mɔ̌ ó. Xlo yixa e ɖò xomɛ nú ye é na zɔ́n bɔ ye na klán gbè xá Axɔ́suɖuto Mawu tɔn. (Ðɛhan 2:2) Etɛ mɛ é ka na tɔ́n kɔ dó? Mawu na sɔ́ Axɔ́suɖuto tɔn dó ɖyɔ acɛkpikpa gbɛtɔ́ lɛ tɔn lɛ bǐ na, bɔ “éyɛ [tɔn] na nɔte kaka sɔyi.” (Daniyɛli 2:44) Amɔ̌, aniwu è ka na sú kún dó nú acɛkpikpa gbɛtɔ́ lɛ tɔn?

Nǔ E Biblu Ðɔ É: “Gbɛtɔ́ ɖesu sixu xlɛ́ ali e é na gbɔn é éɖée ǎ.”—JELEMÍI 10:23.

TINMƐ TƆN: È bló gbɛtɔ́ lɛ bonu ye na kp’acɛ dó yeɖée jí ǎ. Ye nɔ kpé nǔ nabi ɖé wu bo nɔ wà nú mɛ e jí kp’acɛ dó wɛ ye ɖè lɛ é ǎ, ye ka nɔ lɛ́ kpéwú bo nɔ ɖeɖɛ tagba mɛ e jí kp’acɛ dó wɛ ye ɖè lɛ é tɔn lɛ ǎ.

LIN TAMƐ D’EJI: Wema alɔdlɛndónǔ tɔn ɖé ɖɔ ɖɔ é cí ɖɔ acɛkpikpa gbɛtɔ́ lɛ tɔn lɛ kún sixu wà nǔɖe dó “ɖeɖɛ awě elɔ lɛ e nɔ xò gbɛ̀ ɔ bǐ é ó ɖɔhun. Awě enɛ lɛ wɛ nyí hɛ̌n, xovɛ́, azɔn, adla, ahwan, kpo awě ɖevo lɛ kpo.” Enɛ gudo ɔ, é ɖɔ gɔ́ na ɖɔ: “Mɛɖé lɛ . . . lin ɖɔ acɛkpikpa ɖokpo géé jɛn sixu kp’acɛ gbɔn gbɛ̀ ɔ bǐ mɛ bo na dó sixu kpéwú bo ɖeɖɛ tagba enɛ lɛ bǐ mlɛ́mlɛ́.” Amɔ̌, enyi acɛkpikpa e ɖò gbɛ̀ ɔ mɛ lɛ é bǐ na bo tlɛ ɖó gbè kpɔ́ ɔ, acɛkpatɔ́ e nyí hwɛhutɔ́ lɛ é sín alɔ mɛ jɛn gbɛ̀ ɔ na kpò ɖè. Acɛkpatɔ́ enɛ lɛ ka sixu ɖeɖɛ nǔ e nɔ dó wuvɛ̌ nú mɛ bɔ mǐ ɖɔ xó yetɔn wá yì lɛ é ǎ. Axɔ́suɖuto Mawu tɔn kɛɖɛ jɛn nyí acɛkpikpa ɖokpo e ɖó hlɔnhlɔn bo na ɖeɖɛ tagba gbɛtɔ́ lɛ tɔn bǐ mlɛ́mlɛ́ é.

Hǔn, sɔgbe xá Biblu ɔ, gbɛ̀ nyanya elɔ sín vivɔ nyí nǔ e mɛ ɖagbe lɛ ɖó na ɖi xɛsi na é ǎ. É nyɔ́ wà ɔ, nǔ e è na ɖó nukún é ɖé wɛ, ɖó gbɛ̀ xóxó elɔ na wá yì, bɔ gbɛ̀ yɔyɔ̌ e sín akpá Mawu dó é na jɛ tɛn tɔn mɛ!

Hwetɛnu wɛ nǔ enɛ ka na jɛ? Xóta e bɔ d’ewu é na tinmɛ xósin e Biblu na dó nǔkanbyɔ enɛ wu é.