Galátinu lɛ́ 6:1-18
6 Nɔví lɛ́ mi, ényí mɛɖé tlɛ ɖe afɔ nyi do cóbó wá ɖ’ayi wú hǔn, mi mɛ e ɖó nǔwúkpíkpé ɖo gbigbɔ lixo lɛ́ é ní tɛ́n kpɔ́n bo lɛ́ kɔ nú mɛ mɔ̌hun wá ali jlɔ́jlɔ́ ɔ jí kpó xomɛfífá kpó. Amɔ̌, mi nɔ acéjí, bónú è ma wá tɛ́n mi lɔ kpɔ́n ó.
2 Mi ní nɔ hɛn wǔvɛ́gban mitɔn lɛ́ xá miɖée lɛ́, mɔ̌ mɛ ɔ, Klísu sín sɛ́n ɔ se tónú ná wɛ mi ɖe.
3 Ðó ényí mɛ ɖěbǔ lin ɖɔ émí nyí nǔɖé, lobo ma ka nyí nǔtí ǎ ɔ, éɖée blɛ́ wɛ é ɖe.
4 Amɔ̌, mi nú mɛ ɖokpó ɖokpó ní nɔ gbéjé nǔwiwa éɖésúnɔ tɔn lɛ́ kpɔ́n. Énɛ́ ɔ, é ná j’awǎ ɖó nǔ e kan éɖésúnɔ lɛ́ é wútu, é ná nyí ɖó é jlɛ́ éɖée dó mɛ ɖěvo lɛ́ wú wútu ǎ.
5 Ðó mɛ ɖokpó ɖokpó wɛ ná hɛn agban éɖésúnɔ tɔn.*
6 Gɔ́ ná ɔ, mi nú mɛ ɖěbǔ e kplɔ́n xó ɔ* wɛ è ɖe é ní má nǔ ɖagbe alɔkpa lɛ́ bǐ xá mɛ e ɖo nǔ mɔ̌hun kplɔ́n ɛ* wɛ é.
7 Mi ma blɛ́ miɖée* ó: È sixú wa yɛ nú Mawu ǎ. Ðó nǔ e mɛɖé dó é wɛ é ná ya.
8 Mɛ e nɔ xwedó hwɛhuhu gbaza tɔn dó dó nǔ é ɔ, hwɛhuhu gbaza tɔn ná ji nǔ nyanya n’i. Amɔ̌, mɛ e nɔ xwedó gbigbɔ ɔ dó dó nǔ é ɔ, gbigbɔ ɔ ná zɔ́n b’ɛ ná mɔ gbɛ mavɔmavɔ.
9 Énɛ́ wú ɔ, mi ma nú awakanmɛ kú mǐ dó nǔɖagbewiwa wú ó. Ðó é jɛ hwetɔnnu ɔ, mǐ ná ya sínsɛ́n tɔn lɛ́, ényí nǔ ma cikɔ nú mǐ ǎ ɔ nɛ́.*
10 Ényí mɔ̌ hǔn, nú ali tɔn hun* nú mǐ hweɖébǔnu hǔn, mi nú mǐ ní nɔ wa nǔ ɖagbe nú mɛ bǐ, ɖo tají ɔ, nú nǔɖitɔ́ hǎtɔ́ mǐtɔn lɛ́.
11 Mi kpɔ́n wěkwín kloklo e un zán dó wlán nǔ sɛ́dó mi kpó alɔ ce ɖésú kpó lɛ́ é.
12 Mɛ ɖěɖěe ɖo tíntɛ́nkpɔ́n wɛ bo ná hɛn mi gǎnnugǎnnu, bɔ mi ná gbo ada lɛ́ é ɔ, gbɛtɔ́ sí ba ná nyɔ́ ɖe wɛ yě bǐ ɖe.* Nǔ ɖokpó e wú yě nɔ wa mɔ̌ é wɛ nyí ɖɔ è ní ma dó ya nú yě, ɖó yatín* Klísu tɔn wú ó.
13 Ðó yě mɛ e tlɛ gbo ada lɛ́ é ɖésúnɔ nɔ nyi Sɛ́n ɔ ǎ. Amɔ̌, yě ba ɖɔ mi ní gbo ada, bónú yě ná dó sixú nɔ yí nugo, ɖó nǔ e è wa nú agbaza mitɔn é wútu.
14 Amɔ̌, nyɛ ɔ, un ní ma yí nugo gbeɖé ó, afi ɖó yatín* Aklúnɔ mǐtɔn Jezu Klísu tɔn wútu. Nú nyɛ ɔ, è ko hu gbɛ ɔ,* gbɔn gbla tɔn mɛ. Amɔ̌, nú gbɛ ɔ ɔ, è ko hu mì,* gbɔn gbla tɔn mɛ.
15 Ðó adagbigbo kpó adamagbo kpó ɖě ɖo tají ǎ. Loɔ, è ní nyí nǔɖíɖó yɔ̌yɔ́ wɛ nyí nǔ e ɖo tají é.
16 Fífá kpó nǔbláwǔkúnúmɛ kpó ní nɔ kpɔ́ xá mɛ ɖěɖěe nɔ zán gbɛ sɔgbe xá xó énɛ́ lɛ́ é bǐ, ɛɛn, ní nɔ kpɔ́ xá Izlayɛ́li Mawu tɔn ɔ.
17 Bɛ́sín din ɔ, mɛ ɖěbǔ ní ma sɔ́ dó ya nú mì ó, ɖó wuntun ɖěɖěe nɔ ɖe xlɛ́ ɖɔ è nyí kannumɔ Jezu tɔn é ɖo agbaza ce wú.
18 Nɔví lɛ́ mi, fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi, hwenu e mi ná ɖo jijɔ ɖagbe lɛ́ ɖe xlɛ́ wɛ é. Amǐ.
Tínmɛ e ɖo do lɛ́ é
^ Alǒ “ná wa azɔ̌ e nyí étɔn é.”
^ Alǒ “kplɔ́n xó ɔ ɖó nu wú.”
^ Alǒ “kplɔ́n ɛ ɖó nu wú.”
^ Alǒ vlafo, “Mɛɖé ní ma blɛ́ mi ó.”
^ Alǒ “ényí mǐ ma jó gbe ǎ ɔ nɛ́.”
^ Blǔju tɔn, “hwenu e è ɖó dó é su.”
^ Alǒ “biba wɛ yě bǐ ɖe bo ná nyí mɛ ɖagbe ɖo nukúnta.”
^ Kpɔ́n Xógbe ɖé lɛ́ sín tínmɛ.
^ Kpɔ́n Xógbe ɖé lɛ́ sín tínmɛ.
^ Alǒ “xwe gbɛ ɔ nyi atín wú.”
^ Alǒ “xwe mì nyi atín wú.”
