Ðo aklúnɔzángbla e ja lɛ́ é mɛ ɔ, è ná sɔ́ gǎn ɖo to gěgé mɛ gbɔn gbɛ ɔ bǐ mɛ. Gbɛtɔ́ lɛ́ ɖo gbeta tají lɛ́ kɔn wá wɛ dó gǎn e yě ná sɔ́ lɛ́ é wú.

 Étɛ́ Biblu ka ɖɔ?

 Biblu ɖɔ dogbó e gbɛtɔ́ lɛ́ bǐ ɖó é ɖokpó.

•   “Mi ma gán jɛ gǎnhúnǔtɔ́ gbɛ mɛ fí tɔn lɛ́ wú ó. Gbɛtɔ́ wɛ yě nyí, yě kpé wú bo ná hwlɛ́n mɛ gán ǎ. Funfún ná jó yě dó gbe ɖokpó, bɔ yě ná lɛ́ kɔ yi kɔ́ glɔ́, bɔ gbe nɛ́ ɔ gbe ɔ, linnáwa yětɔn lɛ́ ná fó ɖó fínɛ́.”—Ðɛhan 146:3, 4.

 Gǎn ɖěɖěe tlɛ kpé nǔ wú hú gǎn lɛ́ é ná wá kú. Gɔ́ ná ɔ, yě sixú ná gǎnjɛwú mɛ ɖɔ mɛ e ná wá jɛ tɛn émítɔn mɛ lɛ́ é ná gbɛ kan dó azɔ̌ ɖagbe e émí wa lɛ́ é ɖěbǔ nu ǎ.—Nǔnywɛ́tɔ́xó 2:18, 19.

 Nǔgbó ɔ wɛ nyí ɖɔ Biblu ɖe xlɛ́ ɖɔ è kún dá gbɛtɔ́ lɛ́ gbeɖé bónú yě ná kp’acɛ dó yěɖésúnɔ jí ó.

•   “Gbɛtɔ́ ɖésú sixú xlɛ́ ali e é ná gbɔn é éɖée ǎ.”—Jelemíi 10:23.

 Mɛɖé ka ɖe bo sixú nyí gǎn ɖagbe égbé a?

 Biblu tínmɛ ɖɔ Mawu ko sɔ́ gǎn e kpé nǔ wú hú gǎn bɔ è sixú ɖeji dó wǔ tɔn é; é wɛ nyí Jezu Klísu. (Ðɛhan 2:6) Jezu wɛ nyí Axɔ́sú nú Axɔ́súɖuto Mawu tɔn; acɛkpikpa ɖé wɛ bo nɔ kp’acɛ sín jǐxwé.—Matíe 6:10.

 A ka ná yí gbe ɖɔ Jezu ní nyí gǎn nú we a? Biblu tɛ ɖɛ̌ nǔ e wú nǔkanbyɔ́ énɛ́ ɖo tají é jí:

•   “Mi sɔ́ vǐ ɔ [Jezu Klísu] su, é ma nyí mɔ̌ ǎ ɔ, Mawu Mavɔmavɔ ná sin xomɛ. Mi sɔ́ ɛ su, é ma nyí mɔ̌ ǎ ɔ, mi táá kú vawun. Ðó é nɔ lín sin xomɛ ǎ. Nǔ nyɔ́ nú mɛ e nɔ bɛ ta ɖo glɔ̌ tɔn lɛ́ bǐ.”—Ðɛhan 2:12.

 Din wɛ nyí hwenu e a ná wá gbeta towe kɔn é. Nǔɖɔɖayǐ Biblu tɔn lɛ́ ɖe xlɛ́ ɖɔ Jezu jɛ acɛ kpa jí ɖo 1914, bɔ malínmálín mɛ din ɔ, Axɔ́súɖuto Mawu tɔn ná ɖyɔ́ acɛkpikpa gbɛtɔ́ tɔn lɛ́ bǐ.—Daniyɛ́li 2:44.

 Nú a ná ɖó mɔjɛmɛ ɖěvo lɛ́ dó lěe a sixú nɔ gǔdo nú acɛkpikpa Jezu tɔn gbɔn é wú hǔn, xa xóta “Wǎ gbeta ɔ kɔn bo nɔ gǔdo nú Axɔ́súɖuto Mawu tɔn din!”