“Malínmálín mɛ ɔ, ninɔmɛ ayǐ mɛ tɔn ɔ ná wá gblé bǐ. To gěgé ná wá nɔ sin nukúnmɛ. Yǒzo e è ma ko mɔ kpɔ́n ǎ é ná tíin. Jɔhɔn syɛ́nsyɛ́n e dó xɛsi lɛ́ é ná nyi. Sin ná hán gbɔn fí gěgé. Atín kpó kanlin kpó tɛnmɛ tɛnmɛ lǐvi mɔ̌kpán ná kú. É nyí xɛxó alǒ sin dó xó jí ǎ. Nǔ e nǔnywɛ́ xwítíxwítí ɖɔ nú mǐ ɖɔ é ná jɛ, ényí acɛkpikpa lɛ́ ma húzú alɔ e zán mɔ jinganjingan lɛ́ ná wɛ yě ɖe é ǎ ɔ nɛ́.”—Xó e António Guterres, éé nyí wěgbójínɔtɔ́ ɖaxó Gbɛ̌ kplékplé akɔta lɛ́ tɔn tɔn é ɖɔ é wɛ; xó énɛ́ kúnkplá gbe e akɔwé e gosín to vovo mɛ lɛ́ é ɖó dó ninɔmɛ ayǐ mɛ tɔn e ɖo hǔzúhúzú wɛ é wú bɔ è ɖe tɔ́n ɖo 4 avril 2022 é.

 “Nǔnywɛ́ xwítíxwítízɔ́watɔ́ lɛ́ ɖo akpá gba nú mɛ wɛ ɖɔ ɖo zaanɖé din ɔ, ninɔmɛ ayǐ mɛ tɔn e ɖo hǔzúhúzú wɛ é ná ɖibla wa nǔ dó jikpá 423 [e ɖo États-Unis] lɛ́ é bǐ wú, tají ɔ, ɖó yǒzo e fɔ́n bo ɖo syɛ́nsyɛ́n d’é jí wɛ é wú. Nǔ nyanya e sixú jɛ, bɔ Biblu ko kɛ nu d’é wú é cí adla ɖɔhun: sinɖanǔ kpó tɔgbamɛ kpó, singó ɖaxó ɖaxó e nɔ sínsín lɛ́, xu gba wu kpó yǒzo syɛ́nsyɛ́n kpó.”—“Inondations chaotiques à Yellowstone, signe de crises à venir,” New York Times, 15 juin 2022 mɛ.

 È ka sixú ɖe ɖɛ tagba e kúnkplá ninɔmɛ ayǐ mɛ tɔn lɛ́ é a? Ényí nǔ sixú nyí mɔ̌ hǔn, mɛ̌ ka ná ɖe ɖɛ? Kpɔ́n nǔ e Biblu ɖɔ dó xó ɔ wú é.

 Biblu ɖɔ ɖɔ Mawu ná “vívá mɛ e nɔ hɛn ayǐkúngban ɔ gblé lɛ́ sín kún dó.” (Nǔɖexlɛ́mɛ 11:18) Wěmafɔ énɛ́ kplɔ́n nǔ atɔn mǐ:

1.  1. Lěe gbɛtɔ́ lɛ́ nɔ wa nǔ gbɔn é ná hɛn ayǐkúngban ɔ gblé titewungbe tɔn.

2.  2. Ayǐkúngban ɔ e hɛn gblé wɛ è ɖe é ná wá nɔ te.

3.  3. Mawu wɛ ná ɖe ɖɛ ninɔmɛ ayǐ mɛ tɔn planɛ́ti mǐtɔn tɔn sín tagba lɛ́, ényí gbɛtɔ́ lɛ́ ǎ.

 Biblu ɖɔ ɖɔ “ayǐkúngban ɔ ɖo te tɛgbɛ.” (Nǔnywɛ́tɔ́xó 1:4, nwt) È ná nɔ nɔ jí tɛgbɛ.

•   “[Ayǐkúngban] ɔ ná nyí hwɛjijɔnɔ lɛ́ tɔn, bɔ yě ná nɔ [jí] káká sɔ́yi.”—Ðɛhan 37:29.

 È ná vɔ́ planɛ́ti mǐtɔn jlá ɖó bǐ mlɛ́mlɛ́.

•   “Gbětótló kpó ayǐkúngban xúxú kpó ní j’awǎ. Nǔ ní víví nú to e mɛ sin ma ɖe ǎ é, bónú é ní gba sɛ́ folówa ɖɔhun.”—Ezayíi 35:1.