Gbɔn gbɛ̀ ɔ bǐ mɛ ɔ, acɛkpikpa gegě byɔ ɖɔ mɛ lɛ ni ma nɔ sɛkpɔ́ yeɖée tútútú ó, bo lɛ́ gbɛ́ ɖɔ mɛ gegě ni ma nɔ kplé ɖó kpɔ́ ó. Kúnnuɖetɔ́ Jehovah tɔn lɛ kánɖeji bo na setónú nú sɛ́n enɛ lɛ, bo ka na lɛ́ kpò ɖò Mawu sɛn ɖó kpɔ́ wɛ ɖò ayijayǐ mɛ ɖò hwe ɖokpo ɔ nu. Bo na dó kpé enɛ wu ɔ, agun lɛ nɔ zán azɔ̌wanú visioconférence tɔn lɛ, ɖi Zoom, dó bló kplé lɛ.

 Bonu è na kpéwú bo na nɔ bló kplé lɛ ɖò gbesisɔmɛ ɔ, Hagbɛ̌ Alixlɛ́mɛtɔ́ ɔ yí gbè bɔ è na zán nǔnina lɛ dó xɔ kɔ́ntu Zoom tɔn lɛ nú agun lɛ. Enɛ d’alɔ agun ɖé lɛ tawun, ɖó ye sixu xɔ kɔ́ntu visioconférence tɔn e nɔ xɔ ɖɔ̌la Amɛlika tɔn 15 jɛ 20 alǒ hú mɔ̌ é ǎ. Azɔ̌wanú ɖěɖee nyí vɔ̌nu bɔ mɛ gegě ma nɔ sixu cá kan ɖ’eji ǎ, lobɔ è ma ka nɔ nɔ ayijayǐ mɛ sɔmɔ̌ ɖ’eji ǎ lɛ é wɛ agun enɛ lɛ nɔ zán ɖ’ayǐ. Amɔ̌ dìn ɔ, é bɔwǔ bɔ agun ɖěɖee nɔ zán kɔ́ntu Zoom tɔn tutoblonunu ɔ tɔn lɛ é sixu kpé nukún dó ayijayǐ kɔ́ntu yetɔn tɔn wu, lobɔ mɛ gegě sixu lɛ́ cá kan xá ye ɖò kplé ɖokpo ɖokpo hwenu. Kaka jɛ dìn ɔ, agun 65 000 jɛji wɛ nɔ zán kɔ́ntu enɛ lɛ ɖò tò 170 jɛji mɛ.

 Ðò Indonésie ɔ, agun Kairagi tɔn ee ɖò Manado ɖò Totaligbé Sulawesi tɔn é jó azɔ̌wanú visioconférence tɔn vɔ̌nu e zán wɛ é ɖè é dó bo jɛ kɔ́ntu Zoom tɔn tutoblonunu ɔ tɔn zán jí. Nɔví Hadi Santoso tinmɛ ɖɔ: “Dìn ɔ, nɔví sunnu kpo nɔví nyɔnu kpo ɖěɖee ma tlɛ nyɔ́ alokan alǒ tablɛti zán sɔmɔ̌ ǎ lɛ é sixu ɖu vivǐ kplé lɛ tɔn; nǔ e ka zɔ́n tawun é wɛ nyí ɖɔ é sɔ́ byɔ ɖɔ ye ni nɔ cá kan xá kɔ́ntu agun ɔ tɔn azɔn gegě ɖò kplé ɖokpo hwenu ǎ.”

 Ðò Équateur ɖò Guayaquil ɔ, Lester Jijón Jr. ee nyí mɛxo agun tɔn ɖé ɖò agun Guayacanes-Est tɔn mɛ é ɖɔ: “Ðó nɔví sunnu kpo nɔví nyɔnu kpo gegě ma ɖó alɔnu kaka ɖé ǎ wu ɔ, agun ɖé lɛ sixu xɔ kɔ́ntu Zoom tɔn e na zɔ́n bɔ agun ɔ bǐ na bló kplé lɛ é ǎ kpowun bɔ xó fó. Dìn ɔ, tutoblonunu ɔ nyí tɔn bɔ mǐ ɖó kɔ́ntu Zoom tɔn e mɛ gegě sixu cá kan xá é ɖé. Enɛ wu ɔ, mǐ kpéwú bo nɔ ylɔ́ mɛ ɖevo lɛ nú kplé lɛ faa, lobo sɔ́ nɔ ɖi xɛsi ɖɔ kan ɔ na gɔ́ ǎ.”

 Ðò Zambie ɖò Lusaka ɔ, Johnson Mwanzan ee nyí mɛxo agun tɔn ɖé ɖò agun Ngwerere-Nord tɔn mɛ é ɖɔ: “Nɔví sunnu kpo nɔví nyɔnu kpo gegě nɔ ɖɔ ɖɔ kɔ́ntu Zoom tɔn e tutoblonunu ɔ sɔnǔ na é zɔ́n bɔ ye sɛkpɔ́ yeɖée; enɛ kɛɖɛ ka wɛ ǎ, ye nɔ lɛ́ mɔ ɖɔ Jehovah yí wǎn nú emi bo nɔ lɛ́ kpé nukún dó emi wu.”

 Akwɛ e è sɔ́ ɖó vo nú sɔhɛnmɛzɔ́ lɛ é mɛ wɛ è kpɔ́n dó xɔ kɔ́ntu tutoblonunu ɔ tɔn enɛ lɛ. Akwɛ ɖěɖee è sɔ́ jlǒ dó na dó azɔ̌ e mǐ nɔ wà gbɔn gbɛ̀ ɔ bǐ mɛ é kanta lɛ é sín akwɛ wɛ nyí akwɛ enɛ lɛ. È nɔ na akwɛ enɛ lɛ gegě gbɔn donate.isa4310.com jí. É na cɛ nú we nú alɔ e a nɔ hun dó na nǔ bɔ é nɔ zɔ́n bɔ è nɔ wà sɔhɛnmɛzɔ́ ɖevo lɛ gbɔn gbɛ̀ ɔ bǐ mɛ é.—2 Kɔlɛntinu lɛ 8:14.