Gbɛ̌ta lilɛdógbeɖevomɛ tɔn mǐtɔn e nɔ w’azɔ̌ hwebǐnu lɛ é 60 jɛji ɖò kanweko jí ɖò alaxɔ mɛ ǎ, loɔ, ye ɖò azɔ̌xɔsa lilɛdógbeɖevomɛ tɔn e ma ɖò alaxɔ mɛ ǎ lɛ é (RTO). Etɛwu tuto enɛ ka nyɔ́? Azɔ̌wanú tɛ lɛ sín hudo lilɛdógbeɖevomɛtɔ́ lɛ ka ɖó bo na dó wà azɔ̌ yetɔn ganji ɖò RTO ɖé? Gɔ́ na ɔ, nɛ̌ fí e gbɛ̌ta lilɛdógbeɖevomɛ tɔn ɖé ɖè é ka nɔ kúnkplá lee ye nɔ lilɛ nǔ lɛ dó gbè ɖevo mɛ ganji gbɔn é gbɔn?

 RTO ɖé nɔ hun ali nú lilɛdógbeɖevomɛtɔ́ lɛ bɔ ye nɔ nɔ fí e mɛ gegě nɔ dó gbè yetɔn ɖè é. Karin, ee nyí lilɛdógbeɖevomɛtɔ́ Jǎnmagbe E È Cáká É tɔn ɖé é tinmɛ ɖɔ: “Sín hwenu e mǐ sɛ̀ tɛn wá RTO Cuauhtémoc tɔn e ɖò tokpɔn Chihuahua tɔn mɛ ɖò Mexique é ɔ, mǐ nɔ dó Jǎnmagbe E È Cáká É hwebǐnu xá lilɛdógbeɖevomɛtɔ́ hatɔ́ mǐtɔn lɛ, ɖò sinsɛnzɔ́ ɔ mɛ, kaka jɛ hwenu e mǐ yì cɔ́fu mɛ é jí. Mɛ e nɔ dó gbè mǐtɔn lɛ é kpo mǐ kpo ɖò kpɔ́ bǐ mlɛ́mlɛ́. Mǐ nɔ sè xógbe e ayǐ ɔ jí nu lɛ ɖesu nɔ dó bɔ mǐ ma sɔ́ sè kpɔ́n ǎ sín hwenu línlín ɖíe lɛ é, bo nɔ xwedó lee mɛ lɛ nɔ ɖɔ xó gbɔn é.”

 James, ee nɔ w’azɔ̌ xá gbɛ̌ta lilɛdógbeɖevomɛ tɔn Frafra-gbè tɔn ɖò Ghana é yí gbè ɖɔ hweɖelɛnu ɔ, emi nɔ jɛ gbɛ̌didó xá xwédo Betɛli tɔn e ɖò alaxɔ mɛ é sín dò. Amɔ̌, é ɖɔ gɔ́ na ɖɔ: “Un yí wǎn nú azɔ̌wiwa ɖò RTO. Wɛnɖagbe ɔ jijla dó gbè xá ɔ mɛ tɔn mɛ, kpo lee mɛ lɛ nɔ yí wɛn ɔ gbɔn é kpo mimɔ nɔ byɔ ayi mɛ nú mì tawun.”

 Nɛ̌ nɔví mǐtɔn lɛ ka nɔ wá gbeta fí e è na sɔ́ RTO ɖé ɖó é tɔn kɔn gbɔn? Joseph e nɔ w’azɔ̌ ɖò Azɔ̌xɔsa Xɔgbigbá Tɔn Gbɛ̀ ɔ tɔn ɖò Warwick New York, ɖò États-Unis é ɖɔ: “Wuvɛ̌ e mǐ nɔ mɔ lɛ é ɖokpo wɛ nyí ɖɔ, fí ɖé lɛ nɔ ɖó kuláan kpo sin kpo ɖagbe, alǒ Ɛntɛnɛti ɖagbe e sín hudo è ɖó bá yí nǔ ɖěɖee na lilɛ dó gbè ɖevo mɛ wɛ è ɖè lɛ é ǎ. Enɛ wu ɔ, cobonu mǐ na ɖó RTO ɖé ayǐ ɔ, é sixu byɔ ɖɔ mǐ ni gbéjé fí e è nɔ dó gbè ɔ ɖè é gegě kpɔ́n.”

 Ðò kpaa mɛ ɔ, wlɛnwín e yá hugǎn bo lɛ́ kpɔ́ akwɛ hugǎn é wɛ nyí ɖɔ è ni ɖó RTO ɖé ayǐ ɖò Kpléɖókpɔ́ Sín Xɔ e ɖò vɔ̌ é ɖé, alǒ Kpléxɔ Axɔ́suɖuto ɔ tɔn e ɖò vɔ̌ é ɖé mɛ, abǐ mɛsɛ́dó lɛ sín xwé e ɖò vɔ̌ é ɖé gbè, bonu lilɛdógbeɖevomɛtɔ́ lɛ na sixu nɔ wá wà azɔ̌ ɖ’emɛ. Nú xɔ mɔ̌hun lɛ ɖě ma ɖè ǎ ɔ, è sixu na gbè bɔ nɔví lɛ na xɔ xwé e gbè lilɛdógbeɖevomɛtɔ́ lɛ na nɔ dɔ́ é kpo fí e ye na nɔ wà azɔ̌ ɖè é kpo. Enyi hudo gbɛ̌ta lilɛdógbeɖevomɛ tɔn ɔ tɔn lɛ huzu ɔ, é sixu bɔwǔ bɔ è na sà xwé enɛ lɛ, bo zán akwɛ ɔ ɖò fí e è ɖó hudo tɔn ɖè hugǎn é.

 Ðò xwè sinsɛnzɔ́ tɔn 2020 tɔn mɛ ɔ, mǐ zán ɖɔ̌la Amɛlika tɔn livi 13 bonu RTO lɛ na kpò ɖò azɔ̌ wà wɛ. Gbɛ̌ta e ɖò RTO mǐtɔn lɛ é nɔ ɖó hudo ɔdinatɛ́ɛ lɛ, tito ɔdinatɛ́ɛ jí tɔn bǔnɔ lɛ, azɔ̌wanú xóyidókanji tɔn lɛ, Ɛntɛnɛti kpo dandannú ɖevo lɛ kpo tɔn. Ði kpɔ́ndéwú ɔ, nǔsisɔ nú ɔdinatɛ́ɛ ɖé blebu kɔ́kɔ́ɖɔ́kɔ́ nú azɔ̌watɔ́ ɖokpo sixu ɖu ɖɔ̌la Amɛlika tɔn 750. È sɔnǔ nú tito ɔdinatɛ́ɛ jí tɔn e è xɔ lɛ é kpo tito e è nɔ ylɔ́ ɖɔ Watchtower Translation System é kpo dó ɔdinatɛ́ɛ lɛ jí. Tito ɖé wɛ Watchtower Translation System ɔ nyí bo nɔ d’alɔ lilɛdógbeɖevomɛtɔ́ lɛ bɔ ye nɔ bló tito nú azɔ̌ yetɔn, bɔ é nɔ lɛ́ bɔwǔ nú ye bɔ ye nɔ mɔ alɔdlɛndónǔ lɛ.

 Lilɛdógbeɖevomɛtɔ́ lɛ nɔ lɛ́ mɔ azɔ̌wanú xóyidókanji tɔn lɛ, b’ɛ nɔ zɔ́n bɔ ye nɔ yí nǔ lɛ dó kan jí ɖò azɔ̌xɔsa ɔ. Azɔ̌wanú enɛ lɛ lɛ́ xɔ akwɛ tawun hwenu jɛmɛji Covid-19 ɔ bɛ́ é, ɖó lilɛdógbeɖevomɛtɔ́ gegě kpéwú bo zé ye yì xwé yetɔn lɛ gbè, bo kpò ɖò wema kpo video kpo e è lilɛ dó gbè yetɔn mɛ lɛ é yí dó kan jí wɛ.

 Mɛɖéezejotɔ́ lɛ nɔ d’alɔ hwɛhwɛ gbɔn wema e è lilɛ dó gbè ɖevo mɛ lɛ é gbígbéjé kpɔ́n, kpo RTO lɛ hinhɛn ɖó mimɛ̌ jí kpo gblamɛ. Cirstin e ɖò sinsɛnzɔ́ wà wɛ ɖò RTO e nɔ lilɛ nǔ lɛ dó Afrikaans-gbè mɛ ɖò Cape Town ɖò Afrique du Sud é ɖɔ: “Ali hun nú wɛnjlatɔ́ kpo gbexosin-alijitɔ́ hwebǐnu tɔn kpo gegě bɔ ye nɔ zán nǔwukpíkpé yetɔn lɛ ɖò fí.”

 Mɛɖéezejotɔ́ mɔ̌hun lɛ nɔ ɖu wǔ e è jɔ ye é sín vivǐ. Nɔví nyɔnu e nɔ d’alɔ ɖò RTO ɖé é ɖɔ ɖɔ azɔ̌ wà ɖò finɛ cí “jɔhɔn ɖagbe ɖé yiyí dó awɔntín mɛ ɖɔhun.” Nɔví sunnu kpo nɔví nyɔnu kpo ɖé lɛ nɔ lɛ́ sɔ́ yeɖée jó bɔ è nɔ yí gbè yetɔn lɛ dó kan jí. Juana, ee nyí lilɛdógbeɖevomɛtɔ́ Totonaque-gbè tɔn ɖé ɖò tokpɔn Veracruz tɔn mɛ ɖò Mexique é ɖɔ: “Dìn e mǐ sɛkpɔ́ toxo ɖěɖee mɛ mɛ lɛ nɔ dó gbè mǐtɔn ɖè lɛ é ɔ, é bɔwǔ tawun nú nɔví sunnu kpo nɔví nyɔnu kpo gegě bɔ ye nɔ d’alɔ lobɔ è nɔ yí wema kpo video kpo mǐtɔn lɛ dó kan jí.”

 Amɔ̌, RTO lɛ ka d’alɔ bɔ lilɛdógbeɖevomɛ ɔ nɔ kpɔ́n te d’eji à? Nǔxatɔ́ livi mɔ̌kpan e mǐ ɖó é gegě ɖɔ ɛɛn. Cédric, ee nɔ w’azɔ̌ xá gbɛ̌ta lilɛdógbeɖevomɛ tɔn Kongo-gbè tɔn e ɖò République Démocratique du Congo é ɖɔ: “Ð’ayǐ ɔ, nɔví sunnu kpo nɔví nyɔnu kpo ɖé lɛ nɔ ylɔ́ lee mǐ nɔ lilɛ nǔ lɛ dó Kongo-gbè mɛ gbɔn é ɖɔ, ‘Kongo-gbè wema Watch Tower tɔn lɛ tɔn,’ ɖó é cí lee mɛ lɛ nɔ dó Kongo-gbè ɔ gbɔn ɖò kpaa mɛ é ɖɔhun ǎ. Amɔ̌ dìn ɔ, ye nɔ ɖɔ ɖɔ è nɔ lilɛ wema mǐtɔn lɛ dó Kongo-gbè égbe tɔn mɛ, é wɛ nyí ɖɔ è nɔ lilɛ wema lɛ dó lee mɛ lɛ nɔ ɖɔ xó gbɔn gbè bǐ gbè é lɔ jí.”

 Andile, ee nɔ wà azɔ̌ xá gbɛ̌ta lilɛdógbeɖevomɛ tɔn Xhosa-gbè tɔn é lɔ sè xó mɔ̌hun ɖé ɖò Afrique du Sud. É ɖɔ: “Mɛ gegě ɖɔ nú mǐ ɖɔ emi ɖó ayi wu ɖɔ huzuhuzu ɖé tíìn ɖò lilɛdógbeɖevomɛ ɔ mɛ. Yɔkpɔvu e tlɛ ko ɖó aca bo nɔ xà Atɔxwɛ dó Glɛnsigbe mɛ lɛ é nɔ xà dó Xhosa-gbè mɛ dìn. Ye yí wǎn nú Lẹdogbedevomẹ Aihọn Yọyọ Tọn e è vɔ́ jlaɖó b’ɛ cí lee è nɔ ɖɔ xó gbɔn ayǐvɔ̌gbe é ɖɔhun é tawun.”

 Nǔ e è sɔ́ jlǒ dó na dó azɔ̌ e mǐ nɔ wà gbɔn gbɛ̀ ɔ bǐ mɛ é takúnmɛ lɛ é, kaka jɛ ɖěɖee è nɔ na gbɔn donate.isa4310.com jí lɛ é jí, wɛ nɔ nyí tɔn bɔ è nɔ sú akwɛzinzán ɖěɖee nɔ kúnkplá RTO lɛ ɖiɖó ayǐ, nukúnkpíkpé dó ye wu kpo azɔ̌watɔ́ lɛ kpo é bǐ sín dò.