É sɔgbe ɖɔ mǐ ni ɖi xɛsi nú kú, lee mǐ sixu ɖi xɛsi nú kɛntɔ́ ɖé gbɔn é ɖɔhun, bo na ɖè afɔ e ɖò jlɛ̌ jí lɛ é dó nya xɛ ɖò mǐɖée jí. (1 Kɔlɛntinu lɛ 15:26) É ɖò mɔ̌ có, xɛsi masɔgbe ɖiɖi nú kú e jinjɔn adingban-núkplɔnmɛ, alǒ xɛxó jí é ko zɔ́n bɔ gbɛtɔ́ gegě “cí kannumɔ ɖɔhun ɖò gbɛzán yetɔn bǐ mɛ.” (Eblée lɛ 2:15) Nǔgbo ɔ tuùntuùn na hwlɛn we sín xɛsi ɖiɖi nú kú zɛ xwé wu sí, xɛsi ɖé wɛ bo sixu zɔ́n bɔ a sɔ́ na ɖu gbɛ̀ ɔ sín vivǐ ǎ.—Jaan 8:32.

Nǔgbo ɔ dó kú wu

•   Mɛkúkú lɛ sɔ́ tuùn nǔtí ǎ. (Ðɛhan 146:4) É byɔ ɖɔ xɛsi ni ɖi we ɖɔ ɖò kú gudo ɔ, a na sè wuvɛ̌ alǒ jiya ǎ, ɖó Biblu jlɛ́ kú dó amlɔ wu.—Ðɛhan 13:4; Jaan 11:11-14.

•   Mɛkúkú lɛ sixu wà nǔ dó mǐ wu ǎ. Kɛntɔ́ mǐtɔn xóxó e tlɛ nyí adakaxotɔ́ bo ko kú lɛ é sɔ́ ɖó hlɔnhlɔn ɖě ǎ. Biblu ɖɔ: “Ye sɔ́ ɖò wǎn gbɛ́ nú mɛ ɖě wɛ ǎ, nǔɖe ka sɔ́ ɖò ye jló wɛ ǎ.”—Nǔnywɛtɔ́xó 9:6.

•   Kú nyí vivɔnu gbɛzán mǐtɔn tɔn bǐ mlɛ́mlɛ́ dandan ǎ. Gbɔn fínfɔ́n sín kú gblamɛ ɔ, Mawu na fɔ́n mɛ ɖěɖee ko kú lɛ é wá gbɛ̀.—Jaan 5:28, 29; Mɛsɛ́dó 24:15.

•   Mawu d’akpá ɖɔ hwe ɔ nu na wá sù bɔ ‘kú kún sɔ́ na tíìn ó.’ (Nǔɖexlɛ́mɛ 21:4) Biblu ɖɔ dó hwe enɛ nu wu ɖɔ: ‘Ayikúngban ɔ na nyí hwɛjijɔnɔ lɛ tɔn, bɔ ye na nɔ jí kaka sɔyi,’ bo sɔ́ na ɖi xɛsi ɖebǔ nú kú ǎ.—Ðɛhan 37:29.