Tokunɔ kpo mɛ e ma nɔ sè nǔ ganji ǎ lɛ é kpo livi mɔkpan wɛ ɖò Indonésie, ee è nɔ lɛ́ ylɔ́ ɖɔ Emɛlodu Équateur tɔn é. Bo na dó d’alɔ mɛ enɛ lɛ ɔ, Kúnnuɖetɔ́ Jehovah tɔn lɛ sɔnǔ nú wema jinjɔn Biblu jí lɛ kpo tuto nǔ kplɔnkplɔn mɛ tɔn lɛ kpo tɛnmɛ tɛnmɛ dó Tokunɔgbe Indonésie tɔn mɛ. È ɖ’ayi gǎndidó enɛ lɛ wu.

Ðò 2016, ɖò Medan ɖò Totaligbé Sumatra tɔn ɔ, Kúnnuɖetɔ́ Jehovah tɔn lɛ bló kpléɖókpɔ́ ɖaxó ɖé dó Tokunɔgbe Indonésie tɔn mɛ. Kponɔzɔ́watɔ́ nukúnɖeji xá ɔ mɛ tɔn ɖé wá nǔwiwa ɔ tɛnmɛ, bo kpa Kúnnuɖetɔ́ lɛ nú tuto nǔkplɔnmɛ tɔn enɛ e nyí vɔ̌nu é. Nǔ e é mɔ é jiwǔ n’i sɔmɔ̌, b’ɛ gɔ́ nú mɛ e wá lɛ é bo tɛ́n kpɔ́n bo na sɔ́ alɔ dó jihan xá ye.

È bló kpléɖókpɔ́ ɖaxó ɔ “ɖò ayijayǐ mɛ, b’ɛ lɛ́ yì ganji,” wɛ mɛ e nɔ kpé nukún dó fí ɔ wu é ɖɔ. “Un ba ɖɔ Kúnnuɖetɔ́ lɛ ni kpó ɖò tuto vɔ̌nu mɔhun lɛ bló wɛ, bá dó d’alɔ nɔzo mǐtɔn tokunɔ lɛ.” É ɖɔ gɔ́ na ɖɔ hwenu e gǎn e kp’acɛ nú fí ɔ é sè ɖɔ tokunɔ lɛ wɛ ɖò kpléɖókpɔ́ ɖaxó ɔ bló wɛ é ɔ, “é jló na wà nǔ ɖagbe ɖé nú Kúnnuɖetɔ́ lɛ. Enɛ wu ɔ, é ɖɔ nú mì ɖɔ má sɔnǔ nú nǔɖuɖu hwemɛ tɔn nú ye mɛ [300] e wá lɛ é” bǐ.

Kúnnuɖetɔ́ Jehovah tɔn lɛ lɛ́vɔ yì ba tokunɔ lɛ kpɔ́n, bo má wɛn Biblu tɔn xá ye. Hwɛhwɛ ɔ, Kúnnuɖetɔ́ lɛ nɔ zán video e ɖò Tokunɔgbe Indonésie tɔn ɖěɖee è sɔnǔ na, bɔ ye na d’alɔ mɛ lɛ bonu ye na ɖu gbɛ̀ ɔ sín vivǐ, bonu é na lɛ́ jɛmɛ nú ye lɛ é.

Mahendra Teguh Priswanto, ee nyí gǎnbɔdógǎnwu nú Tutomɛ Indonésie Tɔn E Nɔ Kpé Nukún Dó Ganjininɔ Tokunɔ E Ðò Toxo Semarang Tɔn Mɛ, ɖò Tɛntin Java tɔn lɛ é wu é ɖɔ: “É jɛ ɖɔ è ni kpa mi nú azɔ̌ e mi nɔ wà dó kpé nukún dó tokunɔ lɛ kpo hudo yetɔn lɛ kpo wu lɛ é. Ði kpɔ́ndéwú ɔ, video Xwédo Towe Sixu Nɔ Awǎjijɛ Mɛ ɔ d’alɔ tawun. Enyi azɔ̌ enɛ kpó ɖò nukɔn yì wɛ ɔ, é na sù nukún mǐtɔn mɛ.”

Gǎn e Kúnnuɖetɔ́ lɛ dó lɛ é byɔ lanmɛ nú Yanti, ee nyí nyɔnu tokunɔ ɖé é tawun. É tinmɛ ɖɔ: “Mɛ lɛ nɔ ko tokunɔ lɛ hwɛhwɛ, amɔ̌, Kúnnuɖetɔ́ Jehovah tɔn lɛ nɔ ɖè wanyiyi xlɛ́ ye. Kúnnuɖetɔ́ e nɔ sè nǔ lɛ é gegě kplɔ́n tokunɔgbe, bo na dó sixu d’alɔ tokunɔ lɛ nú ye na tuùn Gbɛɖotɔ́ ɔ, bo jla gbɛzán yetɔn ɖó. Gǎn e ye dó dó nǔjɔnǔ mɛ lɛ é byɔ lanmɛ nú mì tawun.”

Gudo mɛ ɔ, Yanti huzu ɖokpo ɖò Kúnnuɖetɔ́ Jehovah tɔn lɛ mɛ, bɔ dìn ɔ, é lɔ ɖò gbɛ̌ta lilɛdógbeɖevomɛ tɔn e nɔ bló video lɛ dó Tokunɔgbe Indonésie tɔn mɛ é ɖé mɛ. É ɖɔ: “Nǔ e mǐ nɔ bló lɛ é nɔ d’alɔ mɛ ɖěɖee ma syɛn ɖò tokunɔgbe mɛ sɔmɔ̌ ǎ é ɖé lɛ, bɔ tokunɔgbe didó yetɔn nɔ kpɔ́n te d’eji. Amɔ̌, nǔ enɛ lɛ nɔ lɛ́ kplɔ́n lee mɛ lɛ na ɖó awǎjijɛ, bɔ gbɛ̀ yetɔn na lɛ́ ɖó nu gbɔn é ye.”