E sega ni dua na ivola e tautauvata kei na iVolatabu ni tu kina na nona ivakasala na Dauveibuli. (2 Timoci 3:16) E rawa sara ga ni veisautaka noda bula na kena itukutuku ni kaya mada ga na iVolatabu: “E bula na vosa ni Kalou qai kaukaua.” (Iperiu 4:12) E rua na sala e rawa ni yaga kina ena noda bula na iVolatabu. Kena imatai, e veivakasalataki ena veika e vauca noda bula e veisiga. Kena ikarua, ena vukei keda meda kila na Kalou kei na ka e yalataka.—1 Timoci 4:8; Jemesa 4:8.

Ena veisautaka na noda ivakarau ni bula. E veivuke vakalevu na iVolatabu ena ka e vauca noda bula, qai veivakasalataki ena so na ka qo.

• Noda ivakarau ni veimaliwai.—Efeso 4:31, 32; 5:22, 25, 28, 33.

•   Na ivakarau ni lomada kei na noda bula vakayago.—Same 37:8; Vosa Vakaibalebale 17:22.

• iTovo kilikili.—1 Korinica 6:9, 10.

• Veika vakailavo.—Vosa Vakaibalebale 10:4; 28:19; Efeso 4:28. *

Erau vakavinavinakataka e dua na veiwatini ena yasayasa vakaEsia na yaga ni ivakasala ena iVolatabu. Me vaka ga era dau vakila na veiwatini vou, e ka ni sasaga me rau veivosakitaka qai walia na duidui e dau basika ena kedrau maliwa. Ia ni rau muria na ivakasala ena iVolatabu, e kaya o Vicent: “Noqu wilika na iVolatabu e vukei au meu dauloloma niu walia na ituvaki dredre e dau basika. Keirau mamarau ni keirau muria na ivakavuvuli ena iVolatabu.” E kaya o Annalou na wati Vicent: “Na ivakaraitaki era tu ena iVolatabu e vukei keirau dina. Sa vakilai na marau kei na lomavakacegu ena gauna qo ena neirau vakawati, qai vakainaki na neirau bula.”

Kila na veika me baleta na Kalou. E kaya tale ga o Vicent: “Au vakila ena gauna qo niu volekati Jiova ena noqu wili iVolatabu.” Na veika e tukuna qori o Vicent e vakaraitaka ni rawa ni vukei keda na iVolatabu meda kila vinaka na Kalou. Ni o kila vinaka na Kalou, o na vakila na yaga ni nona ivakasala, drau na veitokani vinaka tale ga. O na rawa ni marautaka ena gauna se bera mai na “bula dina,” oya na bula tawamudu. (1 Timoci 6:19) Na bula qori e yalataki duadua ga ena iVolatabu.

Ke o qacoya na wili iVolatabu, o na vakila na kena yaga. Ena veisautaka nomu bula ena gauna qo, o na kila tale ga kina na Kalou. Ke o lomatarotarotaka eso na ka, nanuma na nona ivakaraitaki na vakailesilesi ni Iciopea ena 2,000 na yabaki sa oti. A levu nona taro me baleta na iVolatabu. Ni tarogi ke kila na ka e wilika tiko, e sauma: “Meu kila vakacava ke sega ni dua e vakavulici au?” * A mani vukei koya o Filipi, e dua na tisaipeli i Jisu e kila vinaka na iVolatabu. (Cakacaka 8:30, 31, 34) Ke o via kila e levu tale na ka me baleta na iVolatabu, kerekere ena www.isa4310.com se volavola ina itikotiko voleka duadua vei iko e volai toka ena ilavelave ni mekesini qo. O rawa tale ga ni veitaratara kei na dua na iVakadinadina i Jiova e volekati iko se sikova e dua nodra Vale ni Soqoni. Ke o wilika na iVolatabu, ena dusimaki iko ina ivakarau ni bula vinaka duadua.