Yacana. E kaya sara ga na Kalou: “O yau o Jiova. Qori na yacaqu.” (Aisea 42:8) E voleka ni basika vaka7,000 na yaca ni Kalou ena iVolatabu. Ia e levu na vakadewa ni iVolatabu era sosomitaka na yacana ena icavuti “Turaga.” E vinakata na Kalou mo nona itokani, e uqeti iko gona mo “kaciva na yacana.”—Same 105:1.

iCavuti. E tukuni o Jiova ena iVolatabu ena icavuti me vaka “Kalou,” “Kaukaua Duadua,” “Dauveibuli,” “Tamada,” “Turaga,” kei “Turaga Cecere.” E levu na masu e volatukutukutaki ena iVolatabu e vakatokai kina o Jiova ena icavuti kei na yacana.—Taniela 9:4.

 iBulibuli. E kabula vakayalo tawarairai na Kalou. (Joni 4:24) E vakadeitaka na iVolatabu ni “sega ni dua na tamata sa raica na Kalou.” (Joni 1:18) E vakaraitaka tale ga na iVolatabu na ivakarau ni lomana. E dau rarawa ke vakararawataki koya nodra itovo eso, ia e ‘taleitaki’ ira na ivalavala dodonu.—Vosa Vakaibalebale 11:20; Same 78:40, 41.

iTovo Talei. E sega ni vakaduiduitaka e dua se mani vanua cava e cavutu mai kina se duidui nona isususu. (Cakacaka 10:34, 35) E “dauyalololoma qai dauveinanumi, e berabera ni cudru, qai vuabale ena loloma e dei kei na dina.” (Lako Yani 34:6, 7) E uasivi sara e va nona itovo na Kalou.

Kaukaua. Ni “Kalou Kaukaua Duadua,” e sega ni yalani nona kaukaua me vakayacora na ka e yalataka.—Vakatekivu 17:1.

Vuku. E uasivi duadua nona vuku. E kaya kina na iVolatabu ni o ‘koya ga na Kalou vuku duadua.’—Roma 16:27.

Lewadodonu. E cakava ga na ka e dodonu. E “uasivi” nona ivalavala qai “sega vakadua ni lewacala.”—Vakarua 32:4.

Loloma. E kaya na iVolatabu ni “Kalou ga na loloma.” (1 Joni 4:8) E sega wale ga ni vakaraitaka, ia e vatuka sara ga ni loloma. Na ka kece gona e cakava ena yavutaka sara tiko ga ena nona loloma, e yaga tale ga vakalevu vei keda.

Noda iTokani. E Tamada vakalomalagi dauloloma. (Maciu 6:9) Ke da vakabauti koya eda na qai rawa ni nona itokani. (Same 25:14) E sureti keda mada ga meda torovi koya ena masu, meda ‘biuta tale ga vua noda lomaocaoca kece, ni kauaitaki keda.’—1 Pita 5:7; Jemesa 4:8.

Sega ni Kalou o Jisu. E duatani duadua o Jisu ni buli koya sara ga na Kalou. E vakatokai kina ena iVolatabu me Luve ni Kalou. (Joni 1:14) Ni buli koya oti o Jiova, e vakayagataki koya sara me “matai ligamaqosa” me bulia na veika bula kece.—Vosa Vakaibalebale 8:30, 31; Kolosa 1:15, 16.

 Sega vakadua ni kaya o Jisu ni Kalou. E kaya ga: ‘Au matataki koya [Kalou], ni o koya ga e talai au mai.’ (Joni 7:29) Ni vosa tiko vua e dua nona tisaipeli e kaya ni o Jiova na ‘tamana, e tamadratou tale ga,’ e nona ‘Kalou, nodratou Kalou tale ga.’ (Joni 20:17) Ni mate o Jisu, e vakaturi koya o Jiova ena bula e lomalagi qai solia vua na lewa me dabe tale ga ena ligana imatau.—Maciu 28:18; Cakacaka 2:32, 33.

E Rawa ni Vukei Iko o Jisu Karisito mo Toro Voleka Vua na Kalou

Bula e vuravura me vakavulici keda ena veika me baleti Tamana. E kaya o Jiova me baleti Jisu: “Qo na Luvequ lomani, dou rogoci koya.” (Marika 9:7) O Jisu duadua ga e kila vinaka na Kalou, e kaya: “E sega tale ga ni dua e kila na Tamana, o Luvena ga, kei koya ena vinakata na Luvena me vakatakilai Tamana vua.”—Luke 10:22.

Vakatotomuria nona itovo talei na Kalou. E vakatotomuria vinaka na itovo i Tamana, rawa kina ni tukuna: “O koya sa raici au sa raici Tamaqu tale ga.” (Joni 14:9) Era toro voleka vua na Kalou e levu, ni vakaraitaka o Jisu na loloma i Tamana ena ka e tukuna kei na ka e cakava. E kaya: “O yau na sala, na dina, kei na bula. Ena vukuqu ga ena qai torovi Tamaqu rawa kina e dua.” (Joni 14:6) E kaya tale ga: “Mera sokalou kina vakayalo vei Tamada o ira era sokalou dina, ena yavutaki tale ga ena dina nodra sokalou, ni o ira sara ga qo e qara o Tamada mera qaravi koya.” (Joni 4:23) Vakasamataka mada ya! E vinakata o Jiova mo vulica na ka dina me baleti koya.