E sega ni tukuna na iVolatabu. Ia e vakaraitaka eso na ka vakasakiti e rairai uqeta nodrau vakatulewa.

E tukuna vei Meri e dua na agilosi ni na bukete qai vakasucu. Ni vakasavuya na agilosi na itukutuku qori, rau a tiko e Nasareci o Meri kei Josefa, na koro nei Josefa e Kalili. (Luke 1:26-31; 2:4) Dua na gauna e muri, ni ratou lesu mai Ijipita, rau gole i Nasareci. E tubu cake e kea o Jisu, e vakatokai kina me kai Nasareci. (Maciu 2:19-23) Oya na vuna eda vakasamataki Nasareci nida rogoca na yaca i Jisu, Josefa kei Meri.

E tiko e Jutia e dua na wekai Meri na yacana o Ilisapeci. Na wati Ilisapeci o Sakaraia na bete, e qai tinai Joni na Dauveipapitaisotaki o Ilisapeci. (Luke 1:5, 9, 13, 36) E sikovi Ilisapeci e Jutia o Meri, e tiko e kea me tolu na vula. Oti e lesu o Meri i Nasareci. (Luke 1:39, 40, 56) Oya na vuna e kila vinaka kina o Meri na yasayasa o Jutia.

Toso na gauna, e muria o Josefa na lawa me lai “volayaca.” E mani biuti Nasareci me lako i Peceliema na “koro i Tevita,” e parofisaitaki ni na sucu e kea na Mesaia. (Luke 2:3, 4; 1 Sam. 17:15; 20:6; Maika 5:2) Ni vakasucumi Jisu oti o Meri e kea, e sega ni vinakata o Josefa me lesu o watina ena ilakolako balavu i Nasareci kei na luvena sucuvou. Ratou tiko ga e Peceliema, e rauta ni ciwa na kilomita (se rauta ni 6 na maile) mai Jerusalemi. E vinaka tale ga qori me rawa ni rau kauta na gone ina valenisoro, me rau cabora na isoro e vakaroti ena Lawa.—Vunau 12:2, 6-8; Luke 2:22-24.

Sa tukuna oti na agilosi ni Kalou vei Meri ni na soli vei luvena tagane na “idabedabe vakaturaga i Tevita,” ena “lewa vakatui.” Kena irairai ni rau vakasamataka o Josefa kei Meri ni bibi me sucu o Jisu ena koro i Tevita. (Luke 1:32, 33; 2:11, 17) De dua rau nanuma ni ka vakayalomatua me ratou tiko mada e kea, me rau waraka eso tale na ka ena dusimaki rau kina na Kalou.

Eda sega ni kila na balavu ni gauna ratou tiko kina e Peceliema ni ratou yaco yani eso na dauraikalokalo. Ena gauna qori ratou sa tiko ena dua na vale o Josefa, sa ka levu tale ga na “gone,” sa sega ni gonedramidrami. (Maciu 2:11) Kena irairai ni ratou sega ni lako i Nasareci, ia sa dede nodratou tiko e Peceliema, ratou sa vakavale toka kina.

E vakarota o Eroti mera vakamatei o ira “kece na gonetagane lalai era yabaki rua lako sobu e Peceliema.” (Maciu 2:16) E tukuna e dua na agilosi na lawa qori vei Josefa, ratou mani dro i Ijipita o Josefa, Meri, kei Jisu, ratou tiko e kea me yacova ni mate o Eroti. Oti e kauta cake nona vuvale o Josefa i Nasareci. Na cava ratou sega ni lesu kina i Peceliema? Ni a veiliutaki tiko e Jutia ena gauna qori na luvei Eroti o Arikelo, e turaga voravora. E muria o Josefa na ivakasala ni Kalou. E vanua vinaka o Nasareci me susugi Jisu kina o Josefa me qarava na Kalou dina.—Maciu 2:19-22; 13:55; Luke 2:39, 52.

Kena irairai ni a mate o Josefa ni bera ni mate o Jisu me vakarautaka na inuinui ni bula i lomalagi. Ena vakaturi gona o Josefa e vuravura. Ena rawa nira sotavi koya e levu mera vulica eso tale na vuna e tiko ga kina e Peceliema kei Meri ni sucu oti o Jisu.