NA BULA nikua sa sega ni vaka na kena e nakita taumada na Kalou. E vinakata mera bula e vuravura o ira kece era doka nona veiliutaki cecere na Dauveibuli, muria nona veidusimaki, qai vakatotomuria nona itovo talei. E vinakata tale ga na Kalou mera veitokoni vakavuvale, kila e levu na ka vovou, ra qai vakatetea na parataisi e vuravura taucoko.

• “Ena mai vakaotia o koya na ivalu e vuravura taucoko.”—Same 46:9.

• “Sa kena gauna . . . moni vakawabokotaki ira tale ga na vakarusai vuravura tiko.”—Vakatakila 11:18.

• “Ena sega ni kaya e dua na lewenivanua: ‘Au tauvimate.’”—Aisea 33:24.

• “Era na marautaka vakalevu na cakacaka ni ligadra o ira au digitaka.”—Aisea 65:22.

Ena vakayacori vakacava na parofisai qori? Na Kalou e lesi Luvena o Jisu me Tui ni nona matanitu uasivi, ena qai veiliutaki mai lomalagi me lewa na vuravura. E vakatoka na iVolatabu me Matanitu ni Kalou. (Taniela 2:44) E kaya na iVolatabu me baleti Jisu: “Ena solia vua na Kalou . . . , na idabedabe vakaturaga . . .  ena lewa vakatui.”—Luke 1:32, 33.

E cakava o Jisu e levu na cakamana ena nona bula voli e vuravura, qori e dusia ni na vinaka cake sara noda bula ni sa veiliutaki.

• E vakabula na veimataqali tauvimate, e vakaraitaka ni na vakaotia vakadua na tauvimate kei na bula vaqase.—Maciu 9:35.

• E vakavuna na maravu ni wasawasa, e vakaraitaka na sala ena veitaqomaki kina ni lewa na veika buli.—Marika 4:36-39.

• E vakani ira na le vica vata na udolu, e vakaraitaka ni na vakaceguya noda gagadre.—Marika 6:41-44.

• E veisautaka na waini ena dua na vakamau, vakaraitaka kina ni vinakata meda dau marautaka na bula.—Joni 2:7-11.

O na rawa ni marautaka vakacava na bula e vakarautaka qori o Jiova vei ira na lomani koya? E tiko na “sala” e dodonu mo muria. E vakamacalataki ena iVolatabu ni “sala e basika ina bula, e le lailai tale ga era kunea.”—Maciu 7:14.

Na sala cava e basika ina bula? E kaya na Kalou: “O yau o Jiova na nomu Kalou, o koya e vakavulici iko mo vinaka kina, o koya e tuberi iko ena sala mo lakova.” (Aisea 48:17) O na marautaka na ivakarau ni bula vinaka duadua ni o muria na sala qori.

 E kaya o Jisu: “O yau na sala, na dina, kei na bula.” (Joni 14:6) Noda vakabauta na ka dina e vakavulica o Jisu, kei na noda muria nona ivakaraitaki ena vinaka kina noda bula qai vakavolekati keda vua na Kalou.

O na kunea vakacava na sala e basika ina bula? Dua na ka na levu ni lotu, ia e veivakasalataki o Jisu: “Era na sega ni curu kece ina Matanitu vakalomalagi o ira era tukuna vei au, ‘Turaga, Turaga,’ o koya ga e cakava na loma i Tamaqu mai lomalagi.” (Maciu 7:21) E kaya tale ga: “Dou na kilai ira ena vuadra.” (Maciu 7:16) E vukei iko na iVolatabu mo kila kina na sokalou dina mai na sokalou lasu.—Joni 17:17.

O na muria vakacava na sala e basika ina bula? E okati kina nomu kilai koya na iVurevure ni bula: O cei o koya? O cei na yacana? Cava e kilai kina? Cava e cakava ena vukuda? Cava e vinakata meda cakava? *

E sega ni vinakata ga o Jiova meda cakacaka, qito qai vakavuvale. E rawa tale ga nida kila na Dauveibuli qo da qai nona itokani. Noda lomani koya ena laurai sara ga ena noda cakava na lomana. E kaya o Jisu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga.”—Joni 17:3.

Noda vulica meda vakamarautaki koya duadua ga na Kalou dina ena vinakati meda cakava eso na veiveisau. E rairai ka ni sasaga toka, ia ena marautaki ni qo sara ga na imatai ni ka mo cakava mo bula kina. Mo kila eso tale na taro bibi me baleta na Kalou, era na marautaka na iVakadinadina i Jiova mo vulica wale na iVolatabu ena gauna kei na vanua e ganiti iko. E rawa tale ga ni o veitaratara kei keimami ena neimami website na www.isa4310.com.