Era kaya eso ni dredre mera vakacaucautaki vakalevu na luvedra. So tale era kaya ke ra vakacaucautaki vakalevu era na rawa ni viavialevu tale kina, ra qai nanuma ni dodonu me muri ga na lomadra.

Se mani vakacava na levu ni nomu vakacaucautaki luvemu, mo vakasamataka tale tiko ga na ka o vakacaucautaki koya kina. Vakacava ena uqeti koya se ca tale kina nona itovo? Na veivakacaucautaki cava e rawa ni yaga vua?

E sega nira tautauvata na veivakacaucautaki kece. Dikeva mada qo.

Rawa ni ca tale ke sivia na veivakacaucautaki. Eso na itubutubu era dau vakacaucautaki ira ga na luvedra mera kua kina ni beci ira. Ia e veivakasalataki o Dr.  David Walsh “nira sega ni yalowai na gone, era rawa ni kila ni o vakalevutaka tiko na ka o tukuna qai sega ni vu mai lomamu. Era kila vinaka ni a sega ni dodonu nodra vakacaucautaki, rawa sara ga nira sega ni nuitaki iko kina.” *

Vinaka mera vakacaucautaki ena ka era maqosa kina. Kaya mada ke dau droini o luvemu yalewa. Macala ga ni o na via vakacaucautaki koya, ni na uqeti koya tale ga qori me vakavinakataka nona dau droini. Ia e rawa ni basika kina e dua na leqa. Ke dau vakacaucautaki wasoma ena ka e vinaka kina ena makutu ga ni cakava na ka e rawarawa vua. Ena sega ni via cakava eso na ka vovou, de nanuma ni sega ni vinaka kina. Ena kaya va qo, ‘ke vinakati kina na sasaga, au sega ni rawata qori—cava meu via tovolea kina?’

Vinaka duadua ke ra vakacaucautaki ena ka era sasagataka. So na gone era dau vakacaucautaki ena vuku ni nodra cakacaka vakaukaua kei na gumatua, sega ni nodra taledi, ra qai vakadinadinataka ni vinakati na vosota kei na gumatua mera qai vinaka ena dua na ka. Na nodra kila tiko qori, e kaya kina na ivola Letting Go With Love and Confidence  nira “na cakacaka kina vakaukaua mera rawata na ka e vinakati. Ke sega mada ga ni yaco na nodra sasaga, era na raica qori me ka ni vuli, era na sega ni datuvu.”

Kua ni vakacaucautaka ga nodra taledi, nodra sasaga tale ga. Ena vinaka mo tukuna vua na luvemu, “Sa bau dua dina na cakacaka levu o cakava ena nomu droini” mai na nomu kaya tu ga “Iko sa gone dau droini sara ga.” E vinaka ruarua na ka o tukuna qori, ia na kena ikarua e vaka mo tukuna tiko vua ni ka ga ena vinaka kina oya na nona taledi, sega ni dua tale na ka.

Ni o vakacaucautaka nona sasaga, o sa vakavulici koya sara tiko ga ni na vinaka ena ka e cakava wasoma. Ena doudou kina ni cakava eso tale na ka vovou.—iVakavuvuli vakaivolatabu: Vosa Vakaibalebale 14:23.

Vukei koya ke sega ni vinaka ena so na ka. O ira mada ga na tamata vinaka ena sega ni dau donu tu ga na ka era cakava, so na gauna ena vinakati mera cakava vakavica me qai donu. (Vosa Vakaibalebale 24:16) Ia na gauna va qori, era sega ni datuvu, era sasaga mera vakavinakataka na ka era cakava. O na dusimaki luvemu vakacava me va tale ga qori nona rai?

Ena vinaka mo vakabibitaka tiko ga na ka e dau gumatua kina. Vakasamataka mada na ivakaraitaki qo: O dau tukuna vei luvemu yalewa, “O gone vuku ena veika vakafika,” oti qai sega ni rawata nona veitarogi ena lesoni qori. Ena rairai kaya ni sa sega ni rawata na ka e dau vinaka kina, cava na yaga ni nona gumatua?

Ni o vakabibitaka ga na veika e dau gumatua kina, o sa uqeti koya tiko me dau vosota. O rawa tale ga ni vukei koya me raica ni so na gauna ena sega ga ni rawata na ka e sasagataka tiko, ia qori e sega sara ni leqa levu. Me kua ni datuvu kina, me saga ga me vakavinakataka se gumatua ena ka e cakava.—iVakavuvuli vakaivolatabu: Jemesa 3:2.

Kua ni vakalewai koya vakasivia. Ke o vakalewa na ka e cakava ena inaki donu ena vinaka vua, ena sega ni yalolailai. Ke dau veiganiti tale ga nomu vakacaucautaki koya, ena taleitaka nomu ivakasala me vakavinakataka na ka e cakava tiko. Ena vu ni marau ruarua qori vei kemudrau.—iVakavuvuli vakaivolatabu: Vosa Vakaibalebale 13:4.