Ni yaco oti ga e dua na vakacalaka ena vanua ni keli waiwai ena Epereli 2010, a tasova i wasawasa e dua na iwase levu ni waiwai kei na kasi me voleka ni tolu na vula. Oti tale e rua veimama na vula, e dikeva e dua na timi ni vakadidike nira sa yali eso na ka era tasova qori i wasawasa​—era tukuna ni kania na beketiria e dau vaqeavutaka na kasi na methane. Ia eso na vuku era vakatitiqataka na tikina qori. Era vakabauta ni dua na iwase levu ni waiwai sa dromu ena botonisauloa.

Ena dua na vakadidike a caka, era vakabauta e 59 na pasede na lewenivanua i Rusia era yabaki 18 ina 35, “ni na vinakati ena so na gauna mo kua ni muria na ivakavuvuli kei na ivakatagedegede dodonu ke o via rawaka,” e ripotetaka na niusiveva na Rossiiskaya Gazeta.

Eso na qa ni sila makawa duadua me bau kune (me vaka e laurai toka e cake) e vakaraitaka ni o ira na vakaitikotiko ena vualiku kei Peru ena rauta na 3,000 na yabaki sa oti, era dau tavu sila (popcorn) ra qaqia tale ga me falawa.

E vakabauta na bisovi ni lotu Katolika mai Adria-Rovigo o Lucio Soravito De Franceschi, ni itukutuku ni lotu e dodonu me “vakasavui sara ga vei ira na tamata” ena nodra itikotiko. E kaya, “Na noda dau veituberi na italatala e sega ni dodonu me vakaraitaki ga ena qiri ni lali e valenilotu, meda lako sara ga e veivale.”

Na isau ni kena volitaki vakailawaki na ileu ni rhinoceros me vakayagataki me wainimate, sa tubu ina $65,000 na ilavo ni Merika dua na kilo. Ena 2011, era vakamatea na daubutako manumanu e 448 na rhino ena vanua mada ga o Sauca Aferika, qori na iwiliwili levu duadua a vakamatei. Era basuka na ilawalawa dauvakacaca na valeniyaya maroroi mai Urope kei na vanua e dau volitaki kina na ileu ni rhino. E ririkotaki mada ga na nodra bula na rhino era tiko ena vanua ni susu manumanu mai Urope.