Dua na gauna balavu nona liutaki ira tiko na Isireli o Mosese, ia qo sa voleka ni mate. E tukuna vua o Jiova: ‘O na sega ni kauti ira na Isireli ina Vanua Yalataki. Ia au na vakaraitaka ga vei iko.’ Sa qai kerei Jiova o Mosese me digia e dua na nodra iliuliu vou na Isireli. E mani kaya vua: ‘Lai tukuna vei Josua niu sa digitaki koya.’

E tukuna o Mosese vei ira na Isireli ni sa voleka ni mate, e sa digi Josua tale ga o Jiova me liutaki ira ina Vanua Yalataki. E qai tukuna vei Josua: ‘Kua ni rere. Ena vukei iko o Jiova.’ E gole sara o Mosese i Ulu i Nipo, e qai vakaraitaka vua o Jiova na vanua e yalataka vei Eparama, Aisake, kei Jekope. A mate o Mosese ni sa yabaki 120.

E tukuna vei Josua o Jiova: ‘Takosova na Uciwai na Joritani, gole sara i Kenani. Au na vukei iko me vaka ga au cakava vei Mosese. Nanuma mo wilika noqu Lawa e veisiga. Kua ni rere. Mo yaloqaqa. Lai cakava na ka au sa vakaroti iko kina.’

E tala e rua na yamata o Josua ina koro o Jeriko. Eda na  qai vulica ena wase tarava e levu tale na ka a yaco e kea. Ni rau lesu mai, rau tukuna ni sa kena gauna mera gole i Kenani. Ena siga tarava, e tukuna o Josua mera sa vakarau, me ratou liu tale ga ina Uciwai na Joritani na bete eratou cola tiko na kato ni veiyalayalati. A luvu tu na uciwai, ni tara ga na wai na yavadratou na bete, e mudu na kena drodro, e maca sara! Ratou lai duri tu na bete ena lomadonu ni uciwai ra qai takoso na Isireli. De dua era na vakasamataka kina na Isireli na ka e cakava o Jiova ena Wasa Damudamu, se vakacava?

Era sa qai tawana na Isireli na Vanua Yalataki. Sa rawa nira tara nodra vale, nodra koro, ra vakaiteitei, loganivaini kei na kauvuata. E vanua ni sucu kei na oni.