Era bulia tiko na idinia e dua na misini me vukei ira na vuniwai nira veisele, vakauasivi nira seleta na gacagaca ni yago mamare qai dredre, ra qai sega ni vinakata me tadola levu na vanua e sele. Era vakatotomuria kina na liga ni kuita malumu qai rawarawa na kena veimoiyaki.

 Vakasamataka mada: Ni dodoka na kuita na walu na ligana ena dre, taura se qumia kina na ka, rawa sara mada ga ni curumaka ena dua na vanua e basoga lailai sara. E rawarawa tale ga ni lobika se vakaukauataka eso na kena masela.

 Era nanuma gona na idinia ke buli e dua na misini me tautauvata na liga ni kuita na kena malumu kei na kena veimoiyaki rawarawa, ena yaga vakalevu vei ira na vuniwai ena nodra veisele vereverea, e dredre, qai matailalai. Ena yaga tale ga me vakayagataki vei ira na tauvimate e vakayacori vei ira na veisele lelevu qai dredre.

 Raica mada na veimoiyaki ni liga malumu ni kuita

 Sa buli na misini va qori e vakayagataki tale tiko ga ena so na veisele. E lima na idi na balavu ni dua na ligana. Ni vakayacori tiko na veisele ena rawa ni vakayagataka e dua na ligana qori me taura cake tu e dua na gacagaca malumalumu, ia ena sega ni vakamavoataka, dua tale na ligana ena qai veisele. E vakamacalataka o vuniwai Tommaso Ranzani e vakaitavi tale ga ena buli ni misini qo, “keimami vakabauta ni ka e caka qo e idewadewa ni kena buli eso tale na misini e vinaka sara na kena ivakatagedegede.”

 Na cava o nanuma? E buli se bula vakaidewadewa na liga ni kuita