Me rawa nira vuka, qasi, qai vakila na manumanu lalai na veika e tu wavoliti ira ena vinakati mera savasava. Kena ivakaraitaki, ni duka nona lawe na kadi ena berabera nona veitosoyaki, veivosaki, se boica na ka. E kaya e dua e dau dikevi ira na manumanu o Alexander Hackmann: “O na sega ni kunea e dua na manumanu lalai e duka. E kila na kadi na sala me vakasavasavataki koya kina.”

 Vakasamataka mada: E vulica o Hackmann kei ratou nona itokani na iwalewale era vakayagataka na kadi qo (yacana vakasaenisi na Camponotus rufifemur), mera samaka kina na nodra lawe. Era dikeva ni dau lobika na yavana na kadi, me vaka e dua na iqamu oti qai savata tiko kina na nona lawe. E tiko e ligana e dua na ka e vaka na barasi e dau barasitaka na duka matailalai, e tautauvata ga na raba ni vuti ni nona lawe na laqalaqa ni barasi qori. Na duka matailalai mada ga e tiko tale ga na barasi e ganita me samaki kina.

 Sarava mada na sala e samaka kina nona lawe na kadi qo

 E vakabauta o Hackmann kei ratou nona ilawalawa ni iwalewale e vakayagataka qori na kadi me samaka kina nona lawe, e vakayagataki ena tabana ni buli iyaya. Kena ivakaraitaki, na iwalewale vata qori e vakayagataki ena kena samaki na tikitiki lalai sara ni dua na misini vakalivaliva, e rawa ni vakacacani ke dua mada ga na duka lailai e kune kina.

 Cava o nanuma: E bula vakaidewadewa se buli na lawe ni kadi na carpenter?