Ena dreve tu ga na sasaga ni tamata me rawati na bula veiyaloni e vuravura, ena vuku ni:

•   ‘E sega ni vu vua na tamata e lako tu me lewa na nona ilakolako.’ (Jeremaia 10:23) E sega ni buli na tamata me lewai koya ga, ena sega gona ni rawati na bula veiyaloni.

•   “Kua ni nuitaki ira na iliuliu vakatamata; ni sega ni dua na tamata ena vakabulai iko rawa. Ni mate o koya, sa lesu ina qele, ena siga tiko ga oya sa takali na nona vakanananu.” (Same 146:3, 4, Good News Translation) O ira mada ga na iliuliu vinaka era sega ni walia rawa na veika e vakavuna tiko na ivalu.

•   Ena ‘duatani sara na iotioti ni veisiga, ena vakilai kina e levu na ka dredre. Nira na . . . voravora [na tamata], era na sega ni vinakata na ka dodonu, era na dau veiliumuritaki, domoqa, era na dokadoka.’ (2 Timoci 3:1–4) Eda bula tu qo ena iotioti ni veisiga ni vuravura ca qo, ena dredre kina na bula veiyaloni ena itovo era sa takalevu tu nikua.

•   “Drau na rarawa na vuravura kei na wasawasa, ni sa lako sobu vei kemudrau na Tevoro, e cudru vakalevu, ni kila tiko ni sa lekaleka nona gauna.” (Vakatakila 12:12) Sa kolotaki mai vuravura o Setani na Tevoro qai uqeti ira tiko na tamata mera muria na yalo ni vuravura. Eda na sega ni rawa ni bula veiyaloni ni se bula tiko na “turaga ni vuravura qo.”—Joni 12:31.

•   Na ‘[Matanitu ni Kalou] ena vurumemeataka, ena vakawabokotaki ira na veimatanitu kece qori [era saqata na Kalou], ena tu ga me tawamudu.’ (Taniela 2:44) Na matanitu ga ni Kalou ena rawa ni kauta mai na bula veiyaloni, sega ni matanitu vakatamata.—Same 145:16.