Sega, e sega ni lewai oti tu na gauna meda mate kina. Na iVolatabu e sega ni tokona na vakabauta ni sa lewai oti tu na noda bula. E kaya ga nida mate ni yacovi keda na ka e “sega ni namaki.”​—Dauvunau 9:​11.

Vakacava ni tukuna na iVolatabu ni tiko na “gauna ni mate?

 Io, e kaya na Dauvunau 3:2 ni tiko na “gauna ni sucu kei na gauna ni mate, na gauna ni teitei kei na gauna me cavu kina na ka e tei.” (King James Version) Ia eda kila ena tikina wavolita ni vakamacalataki kina ni tiki ni noda bula na mate. (Dauvunau 3:​1-8) Me vaka ga nona sega ni vakasaurarataka na dauteitei na Kalou na gauna me teitei kina, e sega tale ga ni lewa rawa tu na gauna meda mate kina. Ia meda kua ga ni vakaogai keda ena ka e sega ni bibi, meda guilecava kina na Dauveibuli.​—Dauvunau 3:​11; 12:​1, 13.

Rawa ni vakabalavutaki na bula

 Eda sega ni namaka na ka e yaco e noda bula, ia eda rawa ni bula balavu ke da vakatulewa vakavuku. E kaya na iVolatabu: “Na ivakavuvuli ni tamata vuku e ivurevure ni bula me lako tani kina e dua mai na dai ni mate.” (Vosa Vakaibalebale 13:14) E kaya tale ga o Mosese vei ira na Isireli ni rawa nira “bula dede” ke ra talairawarawa ena ivakaro ni Kalou. (Vakarua 6:2) Ia ena rawa ni lekaleka noda bula ke da vakatulewa cala.​—Dauvunau 7:​17.

 Eda na sega ni drovaka rawa na mate, se mani vakacava na noda qaqarauni se vakatulewa vinaka. (Roma 5:​12) Ia ena veisau qori ni yalataka na iVolatabu na gauna sa na ‘sega kina na mate.’​—Vakatakila 21:4.