Keimami dau marau na iVakadinadina i Jiova me keimami veivosakitaka na veika vakayalo kei ira e duidui nodra vakabauta. Ia keimami sega ni vakaitavi ena lotu cokovata se sokalou vata kei ira e duidui na ka era vakabauta. E kaya na iVolatabu nira “duavata” na lotu vaKarisito dina, qai dodonu me laurai na duavata qori ena ka era vakabauta. (Efeso 4:16; 1 Korinica 1:10; Filipai 2:2) E sega ni okati ga e keri na nodra duavata ni bibi na itovo me vaka na loloma, veikauaitaki, kei na veivosoti. Na ka keimami vakabauta e yavutaki sara ga ena kilaka dodonu ena iVolatabu. Ke sega na kilaka qori, e tawayaga na neimami vakabauta.​—Roma 10:2, 3.

 E kaya na iVolatabu ni na vakaleqa nona vakabauta na lotu vaKarisito na nona vauci vata kei na dua e sega ni vakabauta, se na nona sokalou kei ira e duidui na ka era vakabauta. (2 Korinica 6:14-17) Qori na vuna a vakarota kina o Jisu mera kua ni vakaitavi ena lotu cokovata na nona tisaipeli. (Maciu 12:30; Joni 14:6) A vakarota tale ga na Kalou ena Lawa a soli vei Mosese mera kua ni sokalou vata kei ira na veimatanitu voleka na Isireli. (Lako Yani 34:11-14) Dua na gauna nira via veivuke na veimatanitu, era sega ni vakadonuya na Isireli nira kila ni na tarava ga mai na veivuke ya na sokalou vata.​—Esera 4:1-3.

 Io. Dua wale ga kena ivakadinadina, keimami vakayagataka e 1,791,490,713 na aua ena 2023 ena neimami veitalanoa kei ira e duidui na ka era vakabauta. Me vaka ga e cakava na yapositolo o Paula, keimami dau marau na veitalanoa kei ira “e levu” ena cakacaka vakavunau me keimami kila kina na nodra nanuma kei na ka era vakabauta. (1 Korinica 9:19-22) Ni keimami veitalanoa kei ira qori, keimami dau saga me keimami vakaraitaka na “veidokai dina” me vaka e veivakasalataki kina na iVolatabu.​—1 Pita 3:15.