MAJI 21, 2023
IROGO MAI VEIYASA I VURAVURA

Tini na Yabaki ni JW.ORG —Wasewase 3

Tokona na Cakacaka Vakaitalatala

SARAVA/ROGOCA

E sa vakamacalataki oti na kena vakayagataki na noda website na jw.org me veisoliyaki na noda ivola kei na vidio. E dau tabaki tale ga kina na itukutuku dina me baleti ira na tacida e veiyasa i vuravura. Ena vakamacalataki ena iotioti ni ulutaga qo na sala e tokona kina na jw.org na noda cakacaka vakaitalatala e vuravura raraba.

Vosa: E vakarautaki ena 139 na vosa ena gauna e sevutaki kina na noda website vou ena Okosita 2012. Me yacova mai na Okosita 2014, e sa vakadewataki na noda website ena sivia ni 500 na vosa. E veisoliyaki tale ga ena yabaki qori na tikidua me baleta na noda website. E okati tale ga ena iwiliwili ni vosa e 22 na vosa vagalu. Nikua, e sa vakarautaki na noda website ena sivia ni 1,070 na vosa, okati kina e 100 vakacaca na vosa vagalu.

Ulutaga Veiganiti: Ena Okotova 2019, e tekivu biu ena mata ni website na ulutaga e volai ena matanivola lelevu, qai salavata kei na kena iyaloyalo e dreta vakalevu na vakasama. E biu yani ra e tolu tale na ulutaga lalai. E vakarautaki qori, me rawa nira wilika na lewenivanua na ulutaga e dau veivosakitaki ena cakacaka vakaitalatala. Ni toso na gauna, e tuvanaka na tabana ni Volavola kei na Droini na sala me dau vakarautaki kina vakatotolo na ulutaga kei na iyaloyalo e dau biu ena mata ni website. E dau vakamacalataki kina na itukutuku butakatakata e veiyasa i vuravura. Kena ivakaraitaki, na ulutaga me baleta na COVID-19, na nodrau veivaluvaluti o Rusia kei Ukraine kei na kena isenivalu.

Veika me Baleti Keda: E yaga vakalevu na website vei ira na tataleitaki, nira raica kina na itukutuku me baleta na noda isoqosoqo kei na cakacaka eda qarava. E rawa tale ga nira veitaratara kei keda na iVakadinadina i Jiova ke ra via kila e levu na tale na ka. Ni se vuli tiko ena paraimari e dua na marama e galu, e vulica na iVolatabu kei keda na iVakadinadina i Jiova. Ia e sega tale ni veitaratara kei ira na tacida ena gauna e toki kina. E vinakata me tomani na nona vuli, ia e sega ni dua e sikovi koya yani. E mani kerea ena fomu ena noda website me sikovi koya yani e dua na tacida. Ni oti ga e vica na siga, rau gole yani vua e rua na painia lavotaki. E tomana sara na nona vuli qai dau tiko tale ga ena soqoni. E sa papitaiso ena gauna qo, qai vuli iVolatabu tiko kei ratou na tolu na luvena. E kaya: “Au vakavinavinakataka vei Jiova na noda website, keu a sega ni kerea me dua e sikovi au yani, au na wawa tu vakabalavu me yacova niu sotava e dua na iVakadinadina.”

Niu toso tiko ga na noda cakacaka vakaitalatala, eda marau ni vakarautaka na isoqosoqo i Jiova na iwalewale yaga me vukei ira na tataleitaki.—Aisea 60:22.