E vakayadrati Brother Femi Durodola kei na watina o Yana nona qiriti rau ena 5 na kaloko ena mataka lailai e dua na qase ni ivavakoso. E kaya o Yana: “E kaya vei keirau na tacida qori: ‘Drau vakavakarau, drau kua ni leqataka e dua na ka. Era sa gole tiko mai Kyiv na mataivalu ni Rusia!’ Dua na ka noqu lomaleqa.”

O Femi e turaga ni Nigeria, o Yana e marama ni Ukraine. Rau vakavakarau sara na veiwatini qori, rau vakarautaka tale ga na medrau kofi rau qai wilika na tikinivolatabu ena mataka ni siga ya. E kaya: “Oni na kaukaua ke oni tiko vakacegu, oni vakanuinui tiko.” (Aisea 30:15) Oti e masu vagumatua o Femi vei Jiova. Rau taura sara nodrau beki ni leqa tubukoso (go bag), rau biuta tu mai na ka kece qai dro i Necaladi.

Qori sara ga na ka era sotava e levu na tacida era vakatulewataka mera dro laivi mai Ukraine ena gauna e valuta kina na matanitu qori o Rusia ena ika24 ni Feperueri 2022. E rauta ni 130,000 na iVakadinadina i Jiova era tiko e Ukraine. Gauna qo, sa sivia e 36,000 na iVakadinadina i Jiova era sa dro laivi mai nodra vale, qai sivia e 16,000 era dro ina dua tale na matanitu. E levu era biuta tu mai nodra vale, cakacaka kei na ivavakoso. Ni yaco tiko na ivalu, e sega ni vakatarai mera biuti Ukraine na tagane yabaki 18 ina 60. O ira ga na tagane era sega ni lewenivanua e Ukraine e vakatarai mera biubiu.

O ira na tacida era dro era kauta ga e vica na ka e yaga vei ira. Era vodo ena sitima se basi me rawa nira gole ena vanua mera taqomaki kina. Eso na gauna era sega sara ga ni kila na vanua era na lai taqomaki kina. Ia na nodra nuitaki Jiova vakatabakidua e vakaukauataki ira mera biuti Ukraine, qai sega ni macala era na lesu tale ena nodra vanua se sega.

E kaya o Yana: “Keirau biuta tu mai na ka kece, qai kauta e vica ga na ka. Keirau vulica ena ituvaki qo, ni bibi duadua na noda veiwekani kei Jiova.”

E vakaitikotiko o Sister Lilia Antoniuk e Kyiv. E rogoca tu mai nona vale na tagi ni alamu me vakasalataki ira na lewenivanua ni sa vakarau kacabote na bomu. Era kama na motoka, ra qai sinai e gaunisala na tikitiki ni veika e kama ena veivale kei na wavu.

E vakatulewataka o Lilia kei na luvena yalewa o Oleksandra e yabaki 17, me rau dro i Poladi. E vica vata na siga nodrau vodo tiko ena dua na sitima osooso me rawa ni rau yaco ena vanua qori. E lailai na kedrau kakana, qai vica vata na aua nodrau duri tu e loma ni sitima. Ia rau sega tale ni taqaya ni rau sa yaco i Przemyśl, e Poladi.

E kaya o Lilia: “Ni keirau raici ira na tacida era taura tu na ivakatakilakila ni ‘JW.ORG,’ keirau nuidei nira na taqomaki keirau.” Rau mani kau sara na veitinani ena dua na Vale ni Soqoni me rau lai vakaruru kina vakawawa, kana qai vakacegu vakalailai ni bera ni rau kau ena vale me rau na tiko kina.

E kaya o Lilia: “Keirau vakila nona veitaqomaki o Jiova, e vaqaqacotaka tale ga na neirau vakabauta. Au vakavinavinakataka vakalevu na nona loloma, kei na nodra tu vakarau tale ga na tacida mera veivuke ena ituvaki dredre qo.”

E vakamacalataka o Sister Anastasiia Kovalyova na nodra vakalutu bomu mai macawa na sotia ena siti o Zaporizhzhia. E raica ni vanataki tiko na dakai, qai rogoca na kacabote ni bomu ena vanua e tiko kina. Na veitaravi ni kacabote ni bomu rau lai rere kina e rua na vugona, e dua e yabaki vitu, dua tale e yabaki tolu. Ratou mani vakatulewataka vakavuvale me ratou dro. E kaya o Anastasiia: “E lailai na neitou isulu kei na so tale na ka, ni sega ni levu na ka keitou rawa ni kauta. Ia era vakarautaka na mataveitacini na ka keitou gadreva, e levu tale ga.” Ratou dro i Jamani o Anastasiia, na dauvena o Anya kei rau na gone.

Rau dau vuni o Sister Anastasiia Shchukina kei tinana o Sister Olha Lysenko ena nodrau tabavale e ra, ena gauna kece e tagi kina na alamu ni vakarau kacabote na bomu. Rau painia tiko na veitinani qori, qai veiqaravi ena vanua e vinakati vakalevu kina na veivuke ena tauni o Brailiv, e Vinnytsia Oblast. E dredre me rau vakatulewataka me rau dro se kua. Ia me vaka ni sa qai ca tiko ga na ituvaki, rau mani vakatulewataka me rau dro. Rau kauta ga na ka e yaga vei rau, rau qai vodo sitima me rua na siga, rau sega tale ga ni moce vinaka. E sega ni rawarawa vei Olha na ituvaki qori, ni sa yabaki 58 qai dau tautauvimate. Rau yaco yani i Rzeszów e Poladi ena 2 na kaloko ena mataka. Era tavaki rau tu mai eso na mataveitacini. E kaya o Anastasiia: “Dina ni sa bogilevu, era waraki keirau tu ga na mataveitacini. Dua na ka neirau vakavinavinakataki Jiova kei ira na tacida.”

O Brother Andrzej Chyba e turaga ni Poladi, na watina o Elizabeth e marama ni Peritania rau vakaitikotiko ena siti o Sumy. Rau vuni tu kei na lima tale na tacida ena nona tabavale e ra e dua na tacida tagane. Ratou rogoca na waqavuka ni vala, vanataki ni dakai kei na kacabote ni bomu. Ia e vakayaloqaqataki ratou na nodratou sarava na drama vakaivolatabu e kena ulutaga, I Jiova, . . . Au Nuitaki Kemuni. E vakaraitaki kina na ka e cakava o Tui Esekaia nira via ravuti Jerusalemi na kai Asiria.

E kaya o Andrzej sa tiko qo mai Poladi kei watina: “Era vakauta mai na tacida vei keirau e levu na tikinivolatabu, me vaka na vosa ni veivakayaloqaqataki e tukuni ena Same 27.”

Eda nuidei ni o Jiova ena vakalougatataki ira na tacida era ‘vakanadakuya na ka kece vakayago,’ ra qai nuitaka tu na vuravura ena sega tale kina na ivalu.—Filipai 3:8.