MAJI 29, 2023 | IROGO VOU: EPERELI 18, 2023
RUSIA

IROGO VOU—RATOU VESU NA TACIDA | Veitokoni o Jiova

SARAVA/ROGOCA

Ena ika17 ni Epereli 2023, e kaya na mataveilewai na Ahktubinskiy District Court of the Astrakhan Region ni ratou cala o Brother Rinat Kiramov, Brother Sergey Korolev, kei Brother Sergey Kosyanenko. Ratou totogitaki me ratou bala e valeniveivesu me vitu na yabaki. Ratou se vesu tu me ratou wawa veilewai me tekivu mai na Noveba 2021.

Kedratou iTukutuku

Rinat Kiramov

Sucu: 1987 (Moscow, Yasayasa o Moscow)

Me baleti koya: Ni bera ni vesu, a vuli tiko me dau vakarautaka na website. E daunivakatagi. E dau kauta na meli, me isosomi ni nona curu ina mataivalu

Vakavulica vua o tinana na ka dina. E uqeti koya nodra veilomani qai duavata na mataveitacini. Papitaiso ena 2001

Rau vakamau kei Galina ena 2009

Ka e tukuna o Galina, na wati Rinat a

Cava e vukei Rinat me vosota nona vesu?

E dau saga o Rinat me dau cavuta na yacadra na mataveitacini ni masulaki ira. Au dau vakauta vua ena veivula na yacadra kece na tacida era vesu tu ena vuku ni nodra vakabauta. Ni masulaki ira yadudua na tacida qori, e vakavolekati koya vei Jiova qai sega ni kauaitaka kina na veika dredre e sotava. Keirau dau veivosakitaka ni keirau tokona tiko na dodonu ni nona veiliutaki ena neirau vosota, keirau vakadinadinataki koya tale ga. Qo na ka e vola o Rinat: “Se mani vakacava na nodra kaukaua na keda na meca, eda na rawa ni qaqa ena veivuke i Jiova. Ia e sega ni kena ibalebale nida na sere mai valeniveivesu. Na balebale ga ni noda qaqa, ya nida yalodina me yacova na icavacava.”

E tokoni iko vakacava o Jiova?

Au vakadinadinataka e dua na ka e vola o Rinat: “Au sega ni rawa ni qaravi iko ena gauna qo, ia e sa cakava tiko qori o Jiova.” Me tekivu mai na gauna e tekivu kina na veitusaqati, au vakila na veitokoni ni yalo tabu i Jiova. E yalataka na Same 91:1: “O koya ga e vakaitikotiko ena vanua vuni i koya e Cecere Duadua, ena vakaicili ena ruku ni yaloyalo i koya e Kaukaua Duadua.” Dina ga niu dau wilika qori e liu, ia e sa qai vakaibalebale vakalevu vei au ena gauna qo, au mareqeta tale ga vakalevu na veitaqomaki i Jiova. E vukei au qori meu nuitaki koya vakaoti, qai vosota tiko ga ena marau.

Sergey Korolev

Sucu: 1973 (Penza, Yasayasa o Penza)

Me baleti koya: Dau taleitaka na veitaba kei na ta iyaya ni vale

Sega ni dau taleitaka na lotu, ia e veisautaka na nona rai ni veimaliwai kei ira na iVakadinadina i Jiova kei na nona vulica na veika me baleta na Dauveibuli. Papitaiso ena 1996

Rau vakamau kei Yekaterina ena 2005

Ka e Tukuna

O veivolekati vakacava kei Jiova ena gauna dredre qo?

Niu vesu tu, e dau dredre me donu tiko ga na noqu rai. E vakatovolei na noqu vakabauta, noqu inuinui kei na loloma. E vukei au vakalevu na masu. E sega ni yalani na gauna au rawa ni veivosaki kei na Tamaqu vakalomalagi. Dua na ka na levu ni noqu masu niu tu qo e valeniveivesu! Au sa qai kila na vuna e masu kina o Jisu vei Tamana ena dua na bogi taucoko. Au vulica ena ituvaki qo meu nuitaki Jiova vakalevu. Qori e dua na ka au vakadinadinataka vakalevu niu vesu tu.

Sergey Kosyanenko

Sucu: 1961 (Yelan, Yasayasa o Volgograd)

Me baleti koya: Qasenivuli ni vakaukauayago.

Rau vakamau kei Olga ena 1983. Uqeti koya na dodonu ni volaitukutuku kei na parofisai ena iVolatabu. Papitaiso ena 2002

Ka e tukuna o Olga, na wati Sergey b

O vorata vakacava na yalolailai?

Au dau saga meu vakaogai au ena ka e yaga. Au dau wilika na ivola vakaivolatabu, masu vei Jiova qai kerei koya me vukei au meu kua ni yalolailai. Au dau wilika vakavica na ivola i Sergey, qai vakasamataka na gauna me keirau sota tale kina. E yaga tale ga vakalevu na noqu rogoca qai lagata na noda sere.

Na tikinivolatabu cava e vukei iko mo vosota?

Au dau taleitaka na 1 Korinica 10:13, e yalataka kina na Kalou ‘ni na sega ni vakalaiva meda sotava na ka ni veivakatovolei eda na sega ni taqea rawa.’ Au kila niu na sega ni rawa ni vosota ena noqu kaukaua ga, ia au na rawa ga ni cakava qori ena veivuke i Jiova. Ke da vakatovolei, eda na rawa ni vosota. Ni toso na gauna, ena oti na ituvaki dredre qori.

Eda marau ni o Jiova e nodra idrodro na yalodina vua, e ‘tabei ira ena ligana tawamudu.’—Vakarua 33:27.

Veitaravi ni Gauna

Noveba 9, 2021

Tekivu na veivaqaqai. Era vaqaqara na vakailesilesi ena 15 na nodra vale na iVakadinadina i Jiova e Akhtubinsk kei Znamensk, e wili kina na nodratou vale o Brother Kiramov, Brother Korolev, kei Brother Kosyanenko
Noveba 10, 2021

Vesu o Sergey Korolev
Noveba 11, 2021

Rau vesu o Rinat Kiramov kei Sergey Kosyanenko. Ratou lai wawa veilewai e valeniveivesu na tacida tagane
Noveba 14, 2022

Tekivu na veilewai

a b Rau sega ni rawa ni vakatarogi o Brother Kiramov kei Brother Kosyanenko.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU